證監爭做攔路虎
2016/05/30 10:14:04 網誌分類: 經濟
近日多咗內地民企想話係香港退市，返去A股上市，皆因內地對新興產業估值高，加上人民幣有貶值壓力，好多企業唔想借外債，咁不如返內地上市算數。數雖然係咁計，但執行起上嚟，就未必有原先估計咁理想，好似由大陸首富王健林提出話係香港私有化隻萬達商業（3699），跟住去番A股，就傳出受到香港證監關注，計劃遲遲未能公佈。
萬達私有化被照肺
萬達想去內地A股掛牌，提出私有化香港上市公司，而且出價會高過招股價，陸羽仁對呢個消息一直抱住toogoodtobetrue嘅態度，係佢停牌前已提出有理無理，最好趁靚價賣啲股價食吓胡。萬達後來停牌，但公佈方案嘅時間一推再推，最新說法係話私有化計劃遭證監會質疑，指其計劃出現不尋常現象，具體原因仍未知悉，私有化要約需延遲公佈。
集團係回應傳媒查詢時就話，私有化工作在按部就班進行，唔評論市場傳聞。外傳就話由於私有化計劃要同內地A股掛鈎，惹起證監疑問。萬達私有化要用真金白銀買起公司股份，係中央對外匯調動高度關注下絕對唔容易，所以幫手諗呢單「刁」嘅聰明腦袋聽講頭都爆埋，有人就放定風，話咁複雜嘅交易，無人可以肯定可以一Q搞掂。
話雖然咁講，但係人都知，大陸首富係個爭爭奪秒唔等得嘅人，如果唔係佢都唔使嚟咗香港唔夠兩年，已經話唔耐煩走人啦，所以服侍佢班財技高人，啲錢真係唔易賺㗎。
萬達嘅例子，證明就算係資本主義社會，都仍然係窮不與富敵、富不與官爭，尤其股票監管機構，基本上唔會直接向民意代表問責，所以美國大企業唔係咁怕總統，因為佢要向大企業度水競選，但就好怕證監會，呢個情況放諸香港、大陸都一樣，因為各地法律都賦予呢啲金融警察好大權力，佢哋唔老黎，話之你首富都無符。
講起俾證監砌，由另一大陸超級富豪馬雲揸旗嘅阿里巴巴，係年報自爆美國證券監管機關正就公司會計處理方式展開調查，以評估其有否違反任何聯邦證券法。
美國證監（SEC）要求阿里巴巴提供網上交易，以及光棍節營運數據披露狀況。阿里巴巴自稱，他們自願公開證監提出提交資料的要求，透過法律顧問，交出SEC要求的文件和訊息，仲強調會採取合作態度。雖然當事人講得輕鬆，消息後阿里巴巴在美國重挫6.8%，報75.57美元，上周五則收報80.97美元，升2.62美元。
阿里被人查，多多少少係股價中反映，因為佢上市以來，股價升完又跌，如今距離高位112美元差三成，同美股表現以及其他差咗一大截。有熟悉內地網業嘅中環茶友話，而家大陸科網股，論業務紮實硬件公司首選華為，網企就係騰訊。最近百度出咗事，佢嘅搜尋業務混入廣告做法惹起非議，被認為對騰訊廣告業務有利，而家阿里又自爆被查，間接會唔會益咗騰訊呢？而家騰訊市盈率44倍，阿里巴巴市盈率17倍，由呢度可以見到分別。
阿里甩轆益咗騰訊
由於百度同阿里都有明顯弱點，搞到資金流向騰訊，上周五佢做咗升市主力，推動恒指升101點，更破頂創上市高位，最高見過171.8元，大升4.88%，收造171.2元，升4.52%。而且捧場客谷到佢44幾倍市盈率，雖然同面書嘅71倍比仲係低，但短期都唔可以話平。以科網龍頭嚟講，阿里市盈率真係好低，說明市場對佢面對司法風險嘅憂慮，除咗自己係美國上市嘅旗艦外，係香港都搞咗唔少概念股，不過係調查陰影下，佢係科網界嘅金手指效應相信都會跌WATT啦。
阿里巴巴係消息後大插，跟住兩日略為反彈，阿里健康（241）宣佈將聯合百佳惠蘇禾、德生堂、百草堂、康愛多等65家連鎖藥店，成立「中國醫藥O2O先鋒聯盟」，借助移動互聯網和數據技術打通上下游醫療醫藥服務產業。本來佢有勢想趁消息炒作一番，但撞正咁光景，股價上周收報5.55元，只係略為向上郁咗吓。
理論與實踐
中港經濟麻麻哋，個個老闆都話要慳，呢個時間學習總書記形容特首嘅金句︰疾風知勁草、板盪識誠臣，邊個係大浪吓仲着住條褲，睇吓門面就知道多少嘞。恒隆地產老闆陳啟宗專誠搵人送咗本書畀陸羽仁。呢本書叫做《25YearsinRetrospect》，拎上手嚇你一跳，成本製作係硬皮精裝，封面壓印，用咗個簡約抽象嘅設計顯示25呢兩個字。本書原來係朗尼陳做了25年恒隆董事長（呢個TITLE都夠古雅喇），自上場後佢甚有美國股神巴菲特之風，年年都用英文親筆寫封致股東函，本書就係收集咗佢咁多年嘅函件，夾埋超過二百幾頁。
講番轉頭，朗尼陳係內地商場咁有挑戰性嘅今日夠膽出呢本書，不能夠不讚佢夠膽面對現實，尤其係佢將25年嘅言論逐一擰出嚟畀人睇番，證明唔係事後諸葛亮。成本書有好多言論，事後睇番證明佢係個喜歡思考嘅人，不過，作為投資者，當然關心理論同實際結合成績會點，所以好奇怪本書無將25年來恒隆股價表現放埋一齊參考呢？
陸羽仁由朗尼陳阿叔陳曾燾掌舵年代已經跟呢間公司，當年股壇大俠香植球同股評人曹仁超都好鍾意呢間公司，成日推介。有次陸羽仁撞到陳曾燾，佢話我哋生意唔細，對小股東又好，點解股價落後其他大地產公司呢？我將呢個問題問番基金經理，答案係基金覺得自從80年代前途談判跌咗一跤後，公司變咗穩健有餘，進取不足。
呢個情況去到朗尼陳上場悄然轉變，據朗尼陳形容，佢嘅發展策略係「只選好的只做對的」，我就會話佢嘅理念落實成為「財務保守、策略進取」，即係係借貸融資上堅持無負債，但係發展方向幾乎全向高增長嘅大陸市場傾斜，呢個咁進取嘅態度係大型發展商中無出其右，亦曾令恒隆成為千億元企業，一洗過去偏向穩健嘅形象。
睇番而家恒隆地產市盈率13倍，息率有5厘，數字係地產股中較高者，佢嘅股價亦同高位有相當距離，反映市場對內地商場物業前景有保留。朗尼陳認為自己公司物業同管理質素過人，陰霾過後又會見到青天，但基金經理年年埋年結，只會考慮中、短期表現，所以佢嘅股價暫時只能靠高息撐住，難望大升，咁只能講街外投資者嘅考慮點，與大股東諗住同公司做人世係完全唔同嘅。
陸羽仁
回應 (0)
我要發表