白酒煮花蛤

我份人喜歡食海產：但凡有殼嘅我都鍾意食！蟹同蝦，兩者我較喜歡前者，因為有要向難度挑戰囉！不過我吾喜歡龍蝦，寧願食大蝦。

如果果日我自煮，必會一早買餸，上午做好晒啲準備工作，飯前半小時動工，一般廿分鐘至卅分鐘有得食。

前日一早要去旺角做身體檢查，跟住約左扮靚靚。原本諗住做完體檢、食埋早餐才去扮靚，時間配合得天衣無縫，誰知人算不如天算！

今年約此醫療中心做體檢，貪佢夠大、夠闊落，等同坐都較舒服。以前我去佐敦做體檢，大約45分鐘便可走人，但大有大嘅唔好----人多！抽血等廿分鐘、照X光等廿分鐘、見醫生又等廿分鐘-----唉！人生有幾多個廿分鐘吖？

結果迫住將扮靚時間順延半小時，依然冇時間食早餐！扮完靚又約左曲友交收曲詞，但因為時間改來改去，早餐要等到下午二時十五分才有得食！

攪掂晒所有嘢，果陣係二時四十五分，此時街市大部份檔口都未開，不過即管去睇吓，買倒咩嘢、咪食咩嘢囉，大不了咪食齋，菜一定有得賣！

呵呵呵！居然見倒有海鮮檔開左喎，放左不同種類嘅蜆：

有黃沙蜆($16一斤)、普通蜆($14一斤)、花蛤(靚嘅蜆, $42一斤)....再大隻果啲成左精，叫做蚌：貴妃蚌、太子蚌、胭脂蚌....！

我買左一斤花蛤。趁住當時冇咩嘢人行街市，檔主得閒，咁咪「嗲」兩句囉！

我：「呢幾種蜆有咩嘢分別？我當然知價錢有分別啦！但食味如何？」

檔主：「花蛤最貴，但亦最好食，口感較爽；黃沙蜆較稔身(可能老人家會喜歡喎)。出面日式食肆一般用黃沙蜆，祇有較高級店鋪才會用花蛤。」

蜆係我喜歡食嘅海產，因為佢快熟，永冇甩拖！我一向食開花蛤，不過下次會試吓買黃沙蜆。因為較便宜？單睇價錢「係」，但係佢嘅殼較厚身，即係重秤啦，所以未必真係較便宜，反而要試過，才知食味如何？不過，我記得上次響「板長壽司」叫清酒煮蜆，好似係用黃沙蜆，我覺得OK喎(可能少吃多滋味啦！而且，黃沙蜆殼厚身，造型靚仔啲)！

「白酒煮花蛤」除左花蛤係新鮮買之外，其他材料我屋企都有。

材料：

花蛤一斤略沖水隔水

白酒200毫升

洋芫茜碎1湯匙

蒜茸2粒

牛油1安士

橄欖油

熱鑊加入橄欖油、牛油及蒜茸爆香，撞入白酒煮滾，加入花蛤蓋上，待花蛤張開即倒入芫茜碎炒勻。

註：

1. 依家買花蛤，檔主已預先處理過，很乾淨，不會有沙。

2. 喜歡的話，可以加入忌廉(一般超市賣成三十蚊一小盒，一次用半盒都成十五蚊啦---唔化算。最近發現響「烘焙店」有售，同一牌子價錢便宜左四成！不過，可以唔落嘅，我都係唔落咯)。