滿腦子垃圾！

港產官僚大事做唔到，小事做唔好，好似減廢咁吖，以為縮細垃圾桶個口就掂，隨時可能弄巧成拙，垃圾不減反增，縮細桶口變笑大人個口。冇神經政府冇嗰樣整嗰樣，真係唔到你唔服。

話說垃圾徵費計劃最快兩年後落實，作為過渡措施之一，食環署由尋日起分批更換街道上嘅垃圾桶，入口位由原來三百七十毫米乘一百九十毫米，縮小至二百三十毫米乘一百五十毫米，之後將會逐步減少垃圾桶數量。有市民話如果有大型垃圾，會先握細再扔入垃圾桶，質唔落就會拎住，亦有人話大型垃圾會棄置喺垃圾房喎。(舊果啲垃圾桶無緣無故換左佢，有冇徵詢過民意；垃圾桶廢存，有冇問過「垃圾會議員」？少左垃圾桶係咪會少左垃圾？如果係，咁係咪要減少食環署清潔工人數目？)

講就咁講嘞，唔係個個咁自覺架。記者視察所見，好多垃圾桶旁堆滿一袋二袋，甚至垃圾桶頂都好似玩層層疊咁，烏煙瘴氣，慘不忍睹，清潔工人工作量大增，嗌晒救命。之不過咁，工友就話辛苦啫，烏蠅老鼠不知幾happy，事關今後唔使咁頻撲貢入垃圾桶搵食，鍾意幾時開餐都得。你話嘞，垃圾桶口由大變細已經搞到一鑊粥，之後減少垃圾桶數目，老鼠烏蠅大軍攻陷香港，容乜易爆發瘟疫架。(講就講得好聽，大型垃圾自己拎去垃圾站。但係：唔係個個屋企附近有垃圾站。我家附近嘅垃圾站，十次行過九次都下半閘！)

有環保團體就講得啱嘞，當局改用「細口」垃圾桶，配合日後垃圾徵費，係參照台北嘅做法，但人哋有教育同宣傳配套，而香港就百無，淨係放大垃圾桶上嘅警告標語就當交咗差，點會有效吖。再講，台北同南韓等地減廢措施多管齊下，軟硬兼施，包括喺衞生黑點加裝閉路電視捉「垃圾蟲」，又或者鼓勵市民舉報，將部分罰款當作獎金，港產官僚跟啲唔跟啲，連抄都抄得唔湯唔水，分分鐘事與願違（口架）。(依家市民都習慣左帶環保袋出街，第日係咪要帶多個垃圾袋出街呢？)

等功夫茶點醒班官喇。當年法國政府殖民越南期間，眼見鼠害成災，於是頒布命令，民眾殺一隻老鼠賞銀若干，點知鼠患反而愈演愈烈，鬼咩，原來有人私自繁殖老鼠當作財路。同樣道理，啲人冇公德心，縮細垃圾桶口咪即係變相鼓勵亂拋垃圾。香港人質素有幾高，大家心照喇。

一隻手掌拍不響，部分市民觀念跟唔上，政府宣傳不力，加上配套不足，難怪香港喺環保方面輸人哋九條街。大家有眼睇，「藍廢紙、黃鋁罐、啡膠樽」口號講咗N咁多年，有團體抽查公眾地方嘅三色回收箱，發現真正可回收物料少得可憐；反觀私人屋苑回收箱嘅成效理想得多，講到底咪因為當局管理無方囉。連最基本嘅廢物分類都搞唔掂就學人搞垃圾徵費，向市民荷包開刀，咪盞激起民怨。

一句到尾，減少廢物，由官(同垃圾會議員)做起。大件人形垃圾一日存在，香港環保想成功都幾難！(講得好！)

--------------------------------------

最新情況係：

食環署將「大口仔」垃圾桶換為「細口仔」垃圾桶，原意鼓勵市民將大型垃圾棄置垃圾站，但成效不彰，記者昨於街道上巡視，發現「細口仔」垃圾桶內包括可回收的膠樽，市民無視桶上警告字句，胡亂將體積較大的紙箱等棄置垃圾桶旁。

食環署職工權益工會副主席李美笑指出，「梗係加重（工作量），辛苦好多。」市民將垃圾棄置垃圾桶旁的情況，推行新措施後更嚴重，「多咗一包、二包垃圾喺度。」她批評政府宣傳不足，市民根本不清楚政策目的；配套亦不足，對海外成功例子「一知半解」，例如台北會配合監督工作及獎勵計劃，本港則欠奉。

李美笑亦認為，環保署與食環署協調不足。環保署推出政策，食環署執行，但並沒有因而增撥資源予食環署，「人手都唔加。」她建議，政府支持回收再造的環保工業，提升回收物料的價格，「有需求，就無人再當係垃圾。」

咁係咪可以用呢個理由嚟增加人手做檢控、清潔呢？