我祇信事實

「銅鑼灣書店」事件發展至今，我隻言未提及，因為我唔知內情，唔想憑空判斷！

銅鑼灣書店賣嘅係咩嘢書，我唔知、亦冇興趣知！反正香港言論自由吖馬---教人自殺嘅書、教人殺人嘅書，祇要有錢，隨處買得倒！冇錢咯喎....可能公眾圖書館有得借都唔定！講到呢度，我真係寧願香港冇言論自由，否則「毒果」、「暗報」..之類嘅毒物又點可以存在，禍及下....下一代吖！

銅鑼灣書店五人離奇失蹤事件發生八個月，店長林榮基返港後突然爆料說：「去年十月底返回內地，原定是要與位於東莞的女友歡聚。那知就在羅湖關口被公安拘留，罪名是指他販賣禁書到內地，違反國內憲法，牴觸中國法律。」

唉！一個有妻在港，卻有女友在內地，同時間有兩個女人嘅男人，佢講嘢有公信力咩？雖然話「人不可以貌相」，但係我信「相由心生」架！

尋日竹戰。我地經常都係談笑論兵架啦(所以我咪成日走雞囉)，講到呢位先生，友人表示：佢想借今次事件攪大佢，等內地唔敢郁佢啫！(咁咪正合AV仁意思囉！各取所需)

但係，如果佢女友係內地人，佢有冇諗過咁樣做會連累女友呢？早兩日睇「琅琊榜」，夏江問：為佢一個衛琤，犧牲一個梅長蘇，值得咩？

呢啲事，發生響一個冇承擔嘅人身上，梗係你死好過佢死啦！

他又說：「很對不起內地的女友，幫他投寄禁書受到牽連，冀中方會善待書店的同事及朋友，「如上帝善待人一樣」。」(識著啲咁嘅男友，注定佢冇運行)

而且，如果佢講嘅係真話，我會奇怪：點解佢會有機會返香港？須知道：祇有死人係唔會爆料嘅！

林榮基觸犯了內地法律，鬼遮眼自投羅網，就一味炮轟「一國兩制已名存實亡」「香港冇得救」，可嘆小人心，惡毒似豺狼。(我祇知佢係響內地被捕---即係唔存在「一國兩制」問題啦！佢唔上內地咪冇事囉！)

咁李波又如何？我一樣唔信佢架！

用自己方法返內地？唔係冇可能，以前都不知幾多罪犯乘「大飛」返內地啦。不過呢啲都係罪犯嚟，好人好姊會唔會用呢個方法吖？咁即係佢如果係用呢個方法，即係佢自認係罪犯，如果佢係在不自願情況下響香港被帶返內地，咁就可能會與「一國兩制」有關！問題係：帶佢返內地嘅係咩嘢人？會唔會係佢嘅仇家？

所以，呢件事太多疑點啦，唔係我地局外人可以隨意下判斷嘅！