貪收紅股未必着數
2016/06/20 08:42:29 網誌分類: 經濟
大摩話似大衰退前夕
呢排大戶多數淡聲淡氣，摩根士丹利發表報告，話而家宏觀經濟環境與1930年代有多項相似之處，其中金融震盪及高水平債務負擔，改變了民間部門的風險偏好，加上政府收緊監管，令私人需求將長時間面對疲弱，預期通脹維持低企。
報告仲話，在1936至1937年，政策太早、太快的收緊導致美國經濟二次探底，經濟重陷衰退，並在1938年出現通縮，而家同當時相似嘅係，在當前的經濟周期，當經濟復甦時，決策者開始收緊財政政策，結果引發增速放緩。大摩認為，央行應該繼續維持經濟政策，直至通脹預期穩定下來，以及民間部門願承受更多風險為止。
近日不斷話債市牙煙嘅「債王」格羅斯，係接受CNBC訪問時表示，全球須密切關注中國經濟，因中國槓桿在近年已增加一倍。現時中國債務相當於國內生產總值2.5倍，較大多數發達國家為高。佢擔心如果中國無法保持6%的增長速度，全球就會遇到大麻煩。
煤氣除淨遇跌市
風急浪高下，本來業務穩定的公用股係避風塘，不過呢幾日有伯母就專誠請我飲茶，話有一事要問。兩杯靚茶落肚，伯母就話，佢係煤氣（003）擁躉，以佢作為長、中、短炒嘅對象，意思係手中有買咗十幾廿年的煤氣，同時佢會趁派息除淨或者股價飆高插低時買賣吓走短線，呢招咁多年嚟斬獲唔少，係佢一注獨贏的絕活。不過，佢發覺呢幾年炒煤氣搵食好似難咗，呢期佢買煤氣博收紅股執番筆，點知撞正個市插低，收咗紅股補唔番，所以問吓點算。
伯母買煤氣炒長短棍，陸羽仁過去都讚佢叻，不過呢兩年煤氣似乎就有啲「漏氣」跑得慢咗嘞，尤其係除淨前入貨博收紅股，未必咁易有甜頭，點解呢？主要原因一個，就係佢增長放慢，由以前嘅高增長，變咗低增長，加上佢嘅盈利唔受監管，同時亦唔受保障，所以市場估值無以前咁高，再加上佢用嚟發展內地業務嘅上市公司港華燃氣（1083）因為未變現匯兌虧損及長春燃氣報廢撥備後，上次公佈股東應佔稅後溢利跌至8.07億元，較上年度減少約23%，令市場有啲失望。幾個唔係咁好嘅因素，所以咪難玩咗囉。
散戶買股鍾意睇送紅股呢啲表面嘢，基金買股就計數。煤氣去年溢利為74.1億元，按年增幅2.8%。每股基本盈利0.6315元，公司派末期股息每股0.23元之餘，繼續派紅股10送1。係除淨之前，大行摩根大通就計咗數，發表咗報告將煤氣（003）評級由「中性」降至「減持」。報告話由於投資者尋求防守性股份，公司過去一年已跑贏大市15%，但相信未來股價不會持續跑贏，因其盈利增長微薄，估計未來幾年僅為5%。
該行仲將煤氣2016至2017年每股盈利預測下調10%及9%，以反映內地銷氣增長放緩，新能源項目之盈利情況較預期弱。公司上半年業績，有可能成為負面催化劑。報告預料公司全年營運盈利僅增長6%，相對市場預期增長20%弱，所以股價有下行風險。由呢個報告睇，有啲大行擔心遲啲煤氣公佈業績不及預期，所以係紅股出籠前已叫人沽貨，伯母炒除淨，自然易中招。
公用股有其他選擇
伯母聽完咁講有啲面青，不過陸羽仁即時派番定心丸，話煤氣雖然基本因素轉弱，但好醜都係肉，點講佢都係大型公用股。而家美息難上，對公用股整體有利，煤氣都會受惠，只不過其他公用股好似中電（002）早排已創咗新高，煤氣相對就差咗啲，加上今年本港天氣奇凍，人人勁煲熱水沖涼，對煤氣有利，所以上半年業績未必好似摩通估咁嘅，加上公用股始終穩陣，伯母買嘅價亦唔算貴，所以唔使瞓唔着，所以如果再揀公用股，煤氣未必係首要考慮，但買咗嘅咪揸住先，睇位慢慢沽囉。
伯母識買煤氣一注獨贏，已經叻過好多牙擦股評家，只不過，煤氣送紅股呢招確係搞到好多散戶亂咗章。如果睇番過去兩年，中電、電能呢兩隻公用股都無送股，結果升價，半隻公用股嘅港鐵同樣無送股有升價，反而煤氣就送股無乜升價，股價創唔到新高，證明買大股都係要業績好最實際，生唔生仔只係錦上添花啫。
岳少搞戲院落足本
名人除咗飲飲食食，有時都會去行吓街、睇吓戲。最近麗新老闆林建岳新造嘅又一城戲院開咗業，維持佢老哥一貫風格，裝修靚靚，不惜工本。
又一城嘅戲院一向票房都幾唔錯，去年約滿後轉咗手，被岳少一舉攻下。有做開院線嘅行家講，由於大陸電影市場火熱，舊年到期嘅香港院線，一樣加租加到癲。以前做院線唔係咁賺錢，行家形容全靠賣包爆谷賺錢咋，點知瘦田一樣大把人爭。岳少搶咗呢條線之後落本重新裝修，連農曆年黃金檔期都唔做，而家新線開張，當然係音響、座椅全部都好講究啦。
L君睇戲大陣仗
而家好多戲院都興搞董事包廂，呢間新戲院都有18個位嘅細場，最啱唔鍾意同人撈埋嘅有錢人。記得好多年前有老友去睇戲，撞正股壇狙擊手L君，佢前前後後買晒三行嘅飛，然後坐係中間嗰行嘅中間位，佢咁有型，唔止係出位，直情係你想埋身都難，而家有咗包場，咁就唔使咁大陣仗啦。
岳少專搞高檔嘢，過往多數係港島發圍，但呢排佢殺埋過海，除咗開戲院，仲係海港城整咗間CHINATOWN。陸羽仁之前幫襯過中環嗰間，最有印象係佢嘅片皮鴨，同傳統食法唔一樣，佢會將成塊皮片出嚟，同肉分開點糖食。坦白講陸羽仁就覺得有點膩，但亦有人覺得鵝油夠香，只能講各花入各眼囉。
陸羽仁
回應 (0)
我要發表