陸羽仁周記
陸羽仁周記
陸羽仁周記

大師之言

2016/06/27 08:43:07 網誌分類: 經濟
27 Jun
        留歐脫歐經過一番角力,上星期終於揭盅。呢鋪英國政府同國民合演一場公投騷,七情上面,最後不但搞出人命,兩大陣營打真軍,最後仲真係搞到脫歐成真,金融市場都畀佢搞到天翻地覆,正如我上周四所講,投票前夕就係撤退收割時,皆因開大升唔多,開細就插到暈。

        英國脫歐震散全球金融市場,恒指連升五日過後,上周五一度暴瀉過千點,尾市跌幅大幅收窄,最終全日僅瀉609點,收報20259點,成交近千億元。全周計恒指仍升90點;國指全周則漲45點。在英國有業務的股份上周五顯著下瀉,匯控(005)瀉6.6%收造47.45元,為表現最差藍籌股;渣打(2888)大跌9.5%至57.75元;長和(001)挫5%至87元;長江基建(1038)瀉5.5%造69.9元;電能實業(006)跌4.8%至70元;保誠(2378)大跌12%,收報136元。

        呢次留歐脫歐勢均力敵,搞到市場情緒好似坐過山車,急上急落,有見慣大場面之股壇阿姐都話,有無搞到咁動盪呀!本來6月份係股市低迷欲絕之月,結果過咗大半個月,港股表現唔算太差,過完6月,下半年又會點呢?

        金火相鬥兩敗俱傷

        股壇阿姐話,今年世界鬥爭不絕,英國要搞公投,美國民主共和兩黨爭做總統,仲整咗個政治素人兼臭口王特朗普出嚟,咁嘅局面令人諗起玄學大師係年初嘅流年預言。記得係農曆年前,蔡伯勵早就預告今年年初一正值破日,而且今年3個重要日子都適逢「破」,故此要提高警覺。果然,年初二即爆發旺角警民衝突,激烈程度近年未見,令人嘖嘖稱奇。

        根據大師推算,今年農曆正值丙申年,依記載2016年1月1日正值破日,農曆年初一也是破日,還有一年第一刻「立春」落在破月。習俗上「破」視為不吉,今年三個「破」都是重要日子,所以今年行事要小心。

        依照中國曆法,今年是丙申年,大師話按五行是三金三火一木一土之年。以「五行生剋」來說,火性剋金,「金必銷熔」,但若火少金多,火反熄滅,而能互相爭持不下,必是勢均力敵。以五行作具體解釋,今年金火各有一定份量,各有抱負,兩者堅持己見,結果導致一場明爭暗鬥之局。無論在商業上、政治上,糾紛較多,商業放緩,金融市場淡靜,樓價有下滑之勢。另一個解釋,是破壞才有建設,由於火金兩組結構充實,雖然彼此對壘,但磨練中反而互相傳承,因火煉真金、玉琢成器,破而後立。

        入秋之後會回穩

        如果把流年用於股市,最重要當然是掌握買賣時間。從五行生剋,大師拆局係春夏之交,火勝於金;立秋之後,金氣得令,最終雙方意識到相拗無益,到冬季火死金衰,大家皆休養生息去矣。從大師之言,猴年之始,鬥氣正盛,社會氣氛自然激盪,股市都會波動,上半年好淡雙方勢均力敵,難分難解,入秋之後就會好啲。

        股壇大姐話佢揸住大師張路紙,年頭唔敢點入貨,結果避過咗農曆新年後的大跌市,跟住佢都唔係點敢郁。如果話入秋後市況有機會好轉,咁現時只係啱啱夏天,有錢想買貨都會慢慢等低位至執平貨喎。

        猛人話股民要定啲

        講過玄學大師高見,不妨講講正路點睇。公投結果出籠後,陸羽仁撞到財金界猛人,自然要攞佢建議。佢微微笑話無乜嘢吖,英鎊插完都定番啦。按佢睇法,留歐同脫歐係咪分別咁大呢,都好睇你識唔識玩,英國佬乃係老手,大家唔使為佢太擔心喎。

        猛人跟住話,如果睇番香港,唔見有乜郁動,相反港元跟美元掛鈎,反而見到好似有啲錢避吓險?!不過,由於好多英國銀行係經過英國入歐盟,現時就唔知點拆招,所以銀行股就會煩啲囉。

        留歐脫歐鬥到七彩,除大師預言成真外,佢講話商業放緩都一樣「靈擎」,經營阿信屋嘅CEC國際(759)主席林偉駿就坦認睇錯市,估唔到本地零售市況的逆轉趨勢,令期內零售業務收益增長遜於預期,相關升幅亦低於經營成本的增加,公司仲要發盈警。

        本地零售市道差,其實唔難睇,林伯認錯,相信除了呢樣外,最估唔到係日圓匯價竟然強勁反彈。過去數年,借住平日圓、平韓圜狂開分店的阿信屋,預期全年度業績將由盈轉虧。為了減少虧損,集團旗下化妝品店Kawaiiland因為生意自去年10月起就急速逆轉,已經計劃減少部份Kawaiiland分店,改為阿信屋,佢呢個都好可能都係想捱埋份租約嘅安排唧。

        林伯坦承睇錯市,咁誠實值得一讚,不過陸羽仁認為佢只係講咗現實嘅一半,因為除咗大圍市道,我一直認為佢嘅營運模式有問題。阿信屋過去嘅經營方法,主要係靠平促銷,雖然佢自己引入好多日韓產品,但始終係物流上效率唔夠大集團砌,阿信屋可以頂住咁耐,主要係因為日韓貨幣不斷貶值,令佢成本降低。但匯價下跌終有盡時,如果佢唔能夠係有限時間建立本身業務賣點同獨特優勢,靠薄利多銷好難長期生存,過去好多靠平取勝嘅連鎖店往往被一個大浪打沉,就係呢個原因。睇番阿信屋過去又搞雲吞麵又搞化妝品舖,反映林伯好努力想建立自己嘅地盤,可惜都唔係幾成功,所以驚阿信屋見紅,只係戰爭失利嘅開始。

        買Tesla不如買廣汽

        中環好多型人,最喜歡追求新鮮事物,好似大家呢期喜歡買電動車,最受追捧者係名牌貨Tesla。當然,呢期興得幾耐就唔知,因為有啲茶友揸過坐過,話架車雖然好靜,但享受仲係同傳統名車有距離,當慢慢街上多咗,揸佢唔再咁獨特時,熱潮仲係咪可以持續就難講啲。

        Tesla因為出咗Model3,價錢平又有退車優惠,搞到即時爆紅,大家趁熱鬧心態下都問「你訂咗未」,搞到攞車要排成年。不過,有喜歡踢爆之中環茶友就講笑,Tesla老闆馬斯克唔只識搞汽車同火箭工程,仲識搞金融工程,佢嘅買車有退貨,同香港地產商借足120%買樓有異曲同工之妙,好多人諗住買車當租車,咁就搞出個熱潮出嚟。

        Tesla新車款加上嶄新嘅出車優惠,搞到公司現金流大增,係咁情況下,佢老闆又身痕嘞,宣佈以全換股方式,收購佢有份投資的太陽能發電裝置商SolarCity,作價28億美元(218億港元),以配合電動車的能源服務。Tesla市後盤大跌,市值蒸發了43億美元(335億港元)。

        馬斯克持有22%的SolarCity,不但有62.4億美元的負債,且季度業績一直虧損,今年來股價下挫逾60%,投資者認為其企業模式太複雜且缺乏競爭力;再者,馬斯克也承認,Tesla無法掌握有多少客戶的家裏裝有屋頂太陽能板,令今次交易被人話佢自己益自己。睇Tesla股價由今年265美元插番落接近200美元,唔排除新型號爆紅嘅好消息已反映晒。

        廣汽旗下SUV銷售佳

        對於Tesla呢隻未識賺錢嘅股份,陸羽仁印象算唔錯,但就覺得佢股價貴,你叫我買佢我就會等佢跌多啲先,因為貴買股份唔襟得震。如果要買汽車股,我會考慮買廣汽(2238),因為今年佢名下嘅SUV賣得相當唔錯。

        去年廣汽賺咗42.1億元人民幣,按年增長31.9%;每股基本盈利0.6545元人民幣;派末期股息每股0.12元人民幣。集團今年首5個月銷量達59.51萬輛,按年升29.07%;產量增加32.31%達61.03萬輛。佢銷售增長咁強勁,睇番今年股價表現亦對辦,基本上由6.5元升到上9.5元,以佢市盈率12倍,息率2.5厘,有權再殺多一浸上去。

        陸羽仁

        
回應 (0)
我要發表
user