飲水思源
2016/06/30 08:42:00
網誌分類:
經濟
點知，莊大姐來電，超人嗰晚係咪飲醉咗，民生書院係九十周年，唔係六十周年，比浸會大學更老資歷。
這一期，民生校慶，活動陣容，真係拍得住我哋浸會，因為，旗手之一係金牌監製蕭潮順，他又是我的浸會同學，剛搞完浸大校慶又拍心口，搞民生校慶，他也是民生人，拉埋一班師兄師妹，有咁大搞咁大。
校慶大排筵席，在九展筵開一百席，由民生師妹查小欣做司儀。
另一重頭戲，係大師姐陳秋霞作曲，同師妹林志美、彭羚合唱「光與生命」，一定唱到行。呢隻金曲，返回學校拍MV，全校參與，人就有，器材點辦？
魔童王維基，又係民生仔，王生借出器材，嗰啲器材係全港最新最靚，值成千萬，拍了二十組，連MV加特輯。
當晚新知舊雨，共聚閒聊，莊主Adam係民生仔，最大收穫係喺學校認識老婆莊大姐，民生校長Kuby跟成班畢業同學，暢懷舊事，好似一個大家庭。
這幾年，見到不少學校舊生，畢業多年，在社會打滾，漸有成果，簷前滴水，都好想為母校盡點綿力，不辭勞苦，無償奉獻，籌辦校慶，人能飲水思源，正是中國人美德。
林超榮
回應
(0)
我要發表