英歐攬炒 殃及哈日股
2016/07/04 10:13:01 網誌分類: 經濟
央行開口發功撐市
同樣地，外圍股市在嚇到腳軟後，臨近周末再度造好。除咗話脫歐有排搞，唔驚得咁多外，美國做咗防震準備，好大機會壓後加息，有分析人士已預計英國可能減息，聯儲局下次加息的時間或將推遲到今年12月或明年年初，央行嘅姿態都對投資市場起了支撐作用。
香港放回歸假期早咗日收市。上周恒指收市報20794點，係半年結日飆升358點；國企指數收報8712，漲141點，成交金額725億元。半年埋單，籌股中有17隻錄得升幅，係資金追買防守股避險，令公用股與房地產信託基金（REIT）抬頭，中電（002）上半年跑贏一眾藍籌股，累升20%；中環茶友喻為「兩大惡股」的領展（823）升14%；港鐵（066）則揚8%。
第二季美息開始有乏力跡象，油金價上半年反彈，帶挈中石化（386）及中海油（883）亦回升，為升幅第二及第三大恒指成份股，而中石化更包辦國企指數成份股最強股份；中石油（857）跟升4%。
真正強者係股價屢創新高嘅科網股王騰訊（700），受惠手機遊戲收入表現突出，上半年共升15%；六月爆出脫歐，搞到匯控（005）弱上加弱，瀉24%；長和（001）都跌近20%；港交所（388）跌5.49%；受摩托羅拉手機及個人電腦增長放緩拖累，聯想集團（992）為表現最曳藍籌，半年大瀉41%。
國企指數成份股表現最差為中國人壽（2628），上半年大瀉34%；萬科（2202）爆股權爭奪戰，股價大起大落，半年間由起步到埋數同樣大跌34%。上半年地產股表現中規中矩，比原先估計似乎好啲，主要去到年中，美息開始無乜動力向上，樓價跌勢都放慢。據差餉物業估價署公佈的最新數據，5月份私人住宅售價指數報275.5點，按月升0.73%，已連升2個月，數字是今年1月後最高。
5月實用面積1075方呎及以下的中小型住宅，售價指數報276.2點，按月上升約0.69%，但較去年9月高位跌約10.1%。實用面積1075方呎以上的大型住宅單位，售價指數報262.2點，按月升約1%，較去年9月高位跌約6.7%。租金指數方面，報164.1點，按月亦上升約0.49%，為連跌7個月後首見回升。
英鎊跌刺激旅遊
樓價指數回升，好大理由係平盤早前去得七七八八，所以造價上番小小，呢啲可以當係技術性反彈。要留意反而係市場本來預期今年中小型樓供應增加，美國利息最多會加四次。現時樓盤供應大致維持預測，但美國加息次數大減，有可能年底再加一次，甚至今年無得再加。現時分析員普遍預期樓價會再跌5至10﹪，暫時唔係好多人因為脫歐因素調整估計。如果利率上升比預期慢，中環茶友話，樓價或者跌幅會比想像少都唔奇。
呢鋪脫歐有人歡喜有人愁。唔少中環茶友有買英國樓，暫時當時有啲心理痛苦要承受，不過，英鎊跌會刺激英國旅遊業，對樓價長遠亦係好事，加上佢哋好多有仔女係英國讀書，有平鎊可買，都叫做彌補吓損失囉。
要留意係人仔今年轉弱，跟住歐羅、英鎊出埋事，無端端就谷高咗日圓。好多人話買經濟差嘅日圓避險道理說不通，係金融市場現實就係道理。日圓大升你就唔可以當佢無到。而家歐羅同英鎊「攬炒」，日圓前景難卜，因為平日圓受惠的股份就要小心。
東瀛遊盈警有啟示
上個星期，專做日本旅行團嘅東瀛遊（6882）就發盈警，話預期截至6月底止，中期盈利將按年跌約70%，跌因主要由於日本遊旅行團毛利下降。公司仲坦言，正面對世界各地前往日本旅遊的高需求帶動日圓旅遊元素成本上升，加上今年上半年圓匯兌港元升值，為維持顧客需求，公司唯一將旅遊價格調整至較低的毛利率，而家正尋求商機令業務更多元化，並將竭盡所能採用有效的成本控制策略提升該集團的競爭力及擴大客戶基礎。
不要忘記嘅係，早兩年旅遊業興旺，好多旅行社乘時上市或賣盤，東瀛遊都係醒目仔，識得趁好景上市積穀防飢，佢去年純利為8444萬元，較前年度升逾一倍，喺咁環境下盈利唔易維持。佢嘅盈警，可以話係為埋其他同類型「哈日股」而發。
西瓜沙鴨沙律夠消暑
民生書院慶祝九十周年，一班熱心校友莊偉茵（QUINCY）、王維基、蕭潮順等出錢出力參與籌備慶祝活動。為壯聲勢，QUINCY仲係佢嘅私竇整咗個美食自助餐，請齊民生校長同今次校慶活動嘅主席齊齊亮相。
QUINCY與另一半黃楚權喺民生已經相識，呢次校慶當然有影皆雙。黃楚權嘅私房菜，招呼過唔少城中名人。當日就由佢私竇操刀，但因為出席人多，所以用自助餐形式。咁多款菜式，最受各人歡迎仍係創意涼菜西瓜火鴨沙律，鹹中帶甜，最適合三十幾度嘅炎熱天氣。
民生多年來出了不少名人校友，唱家班分別有上世紀走紅的陳秋霞、林志美、彭玲。新世紀有「雙威」劉愷威和羅力威，還有張崇基、張崇德兄弟，他們都會為母校活動獻藝。
王維基無得除三害
當日出席嘅焦點人物之一，就係好有機會出選立法會嘅香港電視主席王維基。佢都係民生校友，今次活動自然唔少得出錢出力贊助吓。佢一現身，大家自然問佢係咪出選，佢就循例否認。聽聞王維基選舉策略，一早定咗係要「除三害」，除咗一早佢已話明搞針對的特首梁振英，仲有就係建制派係港島區嘅議員葉劉淑儀同TREEGUN鍾樹根。可惜TREEGUN而家要抬轎，魔童嘅除害大計少了一個戲碼。如果今年報名參選人真係好似估計咁多，咁除時無電視辯論，咁佢上電視同葉劉牙骹戰隨時都無得睇，咁情況精采程度真係好難同脫歐公投後英國政壇大混戰相比。
陸羽仁
回應 (0)
我要發表