未飲苦茶先食糖
2016/07/18 11:11:31 網誌分類: 生活
全球央行都有糖尿病
美股同樣強勢，去到星期尾雖然開始要唞氣，杜指收市報18516點，仍升10點，納斯達克指數收市就報5029點，跌4點，標普500指數都微軟。全球股市在壞消息下紛紛攀升，特別係美股仲衝上歴史新高。呢個情況令人諗起上個世紀九十年代，對沖基金長期資本（LONGTERMCAPITAL）炒俄國債券爆煲，當時嘅聯邦儲備局主席格林斯潘，為防出現資金收縮嘅骨牌效應，係市場仲係觀望之際就以出乎外界估計嘅大力度減息，呢一招果然挽狂瀾於既倒，但同樣造成後來信貸過度膨脹，甚至有人認為種下咗後來次按危機同金融海嘯嘅種子。
格老離任前，爆出金融海嘯，接任者伯南克仲創出用直升機撒銀紙救市嘅量化寬鬆，做法唔止派糖，直情係灌糖水，搞到各國金融體系都血糖過高，甚至患上糖尿病，郁啲就頭暈腳軟。跟住再做主席嘅耶倫，只能繼續做審慎嘅鴿派，唔敢隨便戒糖。
實體無力金融膨脹
無論點都好，當格老防禦式嘅減息為全球股市帶來大牛市，同時開創咗防禦式嘅救災手法，其後嘅金融災難，聯儲局都係第一時間「灌水浮球」，嚴格嚟講除咗金融海嘯呢個超級災難，基本上無乜金融震盪可以令到華爾街出現連續式急插。
呢種未食涼茶食定糖嘅防禦式救災，好處係避免咗金融動蕩打擊就業同民生，間接影響係投資市場同實體經濟愈走愈遠，而且個波愈吹愈大，呢種吹大嘅資產波唔單存在於股市，同時仲係債市、樓市、甚至貴金市場，由於金融資產價格長期嚟講升多跌少，回報變成低處未見低，造成今日國債超低息，見到都得人驚嘅現象。
呢次英國搞公投投出大頭佛，實體經濟未受衝擊，市場已預期全球央行不約而同聯手放寬銀根。英國央行上星期未如預期減息，我估係因為英國內閣改組，財相歐思邦無得留低，佢知自己會走，所以留低個攤子等下任處理。英鎊走強，令長江基建（1038）造好，為升幅最大的藍籌股，升3.74%收報67.9元；匯控（005）升0.61%報49.6元。
英鎊反彈未言見底
正常嚟講，英國減息係無可避免，所以英鎊呢浪回升，應該係反彈而未必係見底。早兩日我同跨國銀行嘅大BANKER傾偈，佢對英鎊匯價仲係睇淡，佢以中央銀行家的角度去分析，覺得係脫歐大流下根本無乜可做，只能放手俾市場決定匯價。大BANKER話，上半年全球銀行都無乜錢搵，而家英鎊暴露咗一個機會，大小盤房都已經食指大動，準備開餐，係咁環境下，央行根本無法抵禦，雖然而間銀行都收緊咗炒房坐盤，但係預期英鎊匯價向下，班前線話有客要沽鎊，叫炒房準備定先，管理層都只能隻眼開雙眼閉，所以佢對鎊價中長線唔睇好，但從用家角度，如果有實用需要，順便低買高沽炒吓波幅，其實都幾爽㗎。
保險股有錢流入
市場炒央行放水，要留意係美國數據比估計，美國息口幾時再上始終要留意，但呢樣嘢暫時唔係焦點，大家仲係猛炒有固定回報嘅股份好似房託、公用股。銀行股本來息口普遍不俗，但因為營運環境唔穩定，未能吸引熱錢流入。大BANKER坦言而家做保險好過做銀行，所以保險股開始有啲錢流入。上周五友邦（1299）、平保（2318）升幅唔錯。友邦升1.05%報48.05元；被大和上調目標價的平保仲升3.7%報36.6元。
比亞迪表示，三星電子已就參與比亞迪A股非公開發行與公司展開積極推進，比亞迪H股（1211）單日急升超過5%，報51.25元。電動車炒作概念主要係受美國龍頭TELSA帶動，呢排佢備受自動導航系統出事嘅困擾，比亞迪係呢個時候爆出三星考慮入股，可以話係及時雨。
自助餐撼低馬會沙田搵食要去中大
上個星期沙田白石角地皮揭標，就由區內大地主信置（083）投得，而且造價仲高於預期。係截標前，市場傳話有發展商提出想補地價係區內起商場，若然成事相信會受街坊歡迎。沙田係新界算係富貴區，九肚山一帶有唔少廠家高消費力人士，好似身家近百億嘅線路板大王張國榮、玩具大王蔡志明都係住嗰頭。而家佢哋要係附近食好嘢，蒲點之一係去中大開嘅教學酒店，佢哋嘅自助餐唔錯，最得區內街坊闊太歡心，食北京填鴨嘅中菜館都有名，搞到好多時訂唔到位。有沙田友話，呢間教學酒店開咗，沙田馬會會所捧場客都少咗。實際上，沙田馬會嘅餐飲水準真係麻麻，搞到班會員寧願外出搵食。
影藝界愛聚居
呢次靚價賣出嘅白石角地皮，算係政府開發嘅新區，最初幾幅都由信和投地，估計涉及資金過百億元。現屆政府上台後，為了增加增供應，把本來預留作科學園的地皮改劃住宅，當時市場好驚供應增加，令投地價下跌，地皮由稀客鷹君用「死雞價」投得。
好彩係有褔依然在，信置推出的樓盤價量俱佳，令集團成為大贏家，而且佢好似好旺影藝界，陳小春、王祖藍都喺度買咗豪宅。早排又見到鄭伊健成班友揸住本《超級睇樓王》去睇盤。信置食髓知味再出擊。由於佢呢兩年賣樓多，買地少，信置財政極為充盈，幾乎接近無負債，所以在年初地產股受美國加息陰影籠罩大跌後，信置是反彈力最強的一員，大股東後來也出來增持股份。
這次白石角地皮推出，市場氣氛明顯改善，由於社區逐漸成熟，信置在銀彈充足下，自然不怕再下一城，鞏固其王國的霸主地位。
陸羽仁
回應 (0)
我要發表