榮興小廚(二)

我地「四人幫」定期飯局，上次去灣仔「榮興小廚」，今次約會我提議再去，冇人有異議。因為上次感覺唔錯，雖然再去，可以食唔同嘅嘢架馬。

此店逢星期五至星期日，限食兩個鐘。以我地至在傾計嘅客來講，兩個小時邊得吖！所以我地約響星期三。上次係星期一，食到走都冇咩嘢客！今次連訂檯都慳番---我地六點鐘食，閒日點會冇位吖！不過果晚又好多客喎，八九點果陣差不多滿座。

燉湯是必叫的。果晚是「淮山螺頭燉雞腳湯」，我最早去，便落單留定個湯先，因為一晚燉十盅八盅湯，賣完就冇！

響呢度飲過兩次燉湯。上次係「龍脷葉燉雪梨」，我覺得此店的燉湯真係唔錯，亦少油，啲湯渣都好好食，我地差不多食哂：

呢餐可算是高膽固醇餐。朋友指：要叫便叫些屋企唔會煮嘅菜！

咁睇吓係咩嘢菜？

「黃金四季豆」，即係咸蛋黃炒四季豆囉！一般會先炸過四季豆，食時才會又多汁又爽脆。我估為左健康著想，廚師並冇將四季豆炸過，所以食落冇果種爽脆嘅感覺，所落嘅咸蛋黃亦不多，唔太醎，但係冇咩嘢驚喜！

我地原本諗住叫「沙鍋魚頭煲」，侍應指如果想食魚，不如試吓「咸鮮馬友」。咦！咸鮮魚好食喎(我自己都有整)，於是咪聽佢講叫「咸鮮馬友」囉！呢碟餸上桌，我一見便知「中招」！我唔食薑架，仲要鋪滿晒薑！

友人將薑撥埋一邊叫我試，我打死都唔食！但見佢地食完咩嘢表情都冇。我問：「夠竟好唔好食？」

一位答：「好咸，要得埋飯一齊食！」

另兩位：「啲鹽唔混循，一啲咸、一啲唔咸！」

哈哈！咁就好失敗喎！呢碟魚$138，條魚響街市買都要四五十蚊，依家啲薑都好貴(落咁多好似唔駛錢咁)，賣咁嘅價錢唔算貴囉。

但係友人的太太質疑呢條係咪「馬友」，她指「馬友」的咀部較圓身：

佢地講果陣條魚都食到七七八八咯，之前又俾啲薑冚住，淨係睇個頭睇唔出喎！但係「馬友」嘅魚味好特別，一食就食得出！朋人叫我試，我都係唔制，反正佢地都認為唔好食，仲試？你當我係lulu呀？

上次食過「招牌荷葉飯」，今次試個「籠仔蒸蝦飯」。睇個樣都知：啲飯好硬好乾，我地食晒啲蝦，剩番啲飯：

上次食「薑蔥枝竹焗蠔」，今次試「砵酒焗美國蠔」。賣相冇薑蔥蠔咁靚仔(黑麻麻)，但係紅酒味道好香，啲蠔好鬼大隻，一客五隻，我地四個人，剩番果隻一開四都得：(不過，個人覺得呢隻美國蠔食落太creamy, 我比較喜歡爽口嘅)

今次叫嘅餸認真麻麻！都係我衰，我話要叫啲未食過嘅嘢，其實應該叫一啲食過覺得好食嘅嘢！

經驗所得：再光顧此店，要食完一味餸再叫第二味！因為菜上得快，相對便食得慢；某些餸如蠔同四季豆，一凍左便腥----連我呢個唔怕腥嘅人都覺得腥！

飯後甜品，今次送「麥米粥」，唔錯啦！

埋單幾錢？唔知喎！我坐響卡位裡面，俾人搶先埋左單。