真‧高息股
2016/07/25 08:43:20 網誌分類: 經濟
股價唔升可變高息
大市累積升咗接近兩千點,而家市場主要等緊兩樣嘢,一樣係美國及日本央行的議息結果,另一樣就係期指月底結算。市場而家都憧憬日本央行會扭大水喉,同埋美國會保持寬鬆嘅息口取態。若然出嚟結果唔係咁,唔排除個市會借勢調整吓。而家呢個時候,無論你係咪買高息股,都要留意大市走勢,因為個市稍為回一回,你買貴咗,就收一年半載息都補唔番,所以無論係乜類型嘅股,入市前首要係睇吓個市水位高唔高先。
最近市場熱切追求高息股,不過,有茶友就話乜嘢叫做高息股呢?從字面睇,即係股價同派息比,股息率高嘅就係高息股。不過,茶友話,股價低、息口高,有一個可能就係因為過去公司股價升得慢,甚至倒跌,咁股價跌得多,派息咪相對高囉。一個大家熟悉例子,就係匯控,過去幾年匯豐派息唔係特別加得多,但股價由6、70元插落嚟,咁股息率咪愈嚟愈高囉,呢啲叫做跌價加息,股東長期持有,收息補唔番跌價。有好多二三線公司,業務長年無乜發展,但派息穩定,追求增長嘅基金興趣唔大,買佢嘅旨在收息,呢啲都可以算係高息股,所以從基金角度,股票分兩類,一類叫增長股;一類叫收息股,通常收息股就代表佢業務策略唔係咁進取,買佢股價增值較少,旨在穩定食息。
賺錢派盡條數靚
另一個評定高息嘅標準,係用盈利同派息比計,譬如賺十元派十元,派息比率高,呢啲可以叫高息股;如果賺十元派一元,九元盈利留番嚟投資,就叫增長股。美股好似微軟、蘋果,係高速發展期都係唔派息,到賺大錢有好多現金先考慮派息,但通常呢個時候亦代表公司已經進入成熟期。
用呢個定義,大部份房託都規定將賺到嘅息派發,佢哋都係高息股,但換轉嚟講,佢哋剩低用嚟再投資嘅錢好少,未來增長自然有限制。比較之下,大型房託好似領展已經將大部份收益派發,但息口同部份地產股相去不遠,考慮到地產股派發比例較低,長遠邊個真正回報率高啲可以諗到啦。
買高息股除咗睇息率,仲要睇佢派息嘅質素同埋盈利能力,好似房託基金雖然規定佢哋要派發大部份收益,但唔代表佢派息唔會跌,特別係而家租金有見頂跡象,未來租金下調,房託可分派嘅盈利自然下跌,咁就有減息可能。派息質素最穩定的應該係公用股,因為佢哋有利潤協議,不過而家佢哋有好多都投資海外,呢部份生意表現就不受保護,所以派息預測性最高的公用股係港燈嘅信託,或者香港電訊嘅信託,其次就係電能、中電同煤氣。
交通股做地產賺到就派
講開公用股,仲有一類係交通運輸類,包括大受追捧嘅港鐵,同埋冷門嘅載通,仲有變咗身地產股嘅中巴同小輪。呢幾隻股份其實交通生意都係雞肋,真正肥肉係地產生意,若然計地產收益佔每股比例,幾隻冷門股絕不輸蝕俾港鐵,尤其係載通,佢喺九龍東嘅巴士廠又準備重建,所以大股東都有增持,呢啲公司無乜投資需要,賺到就會派出街,是其中一種真‧高息股。
話梅車厘茄夠消暑BANKER妻夏日至愛
七月大暑,天氣炎熱,在天氣變異下,溫度變得極端。今年冬天凍到大帽山結冰,公用股最受惠者相信係煤氣,皆因明火煲水洗水浴,總比電熱痛快。嚴寒天氣自然既有利煤氣今年業績,同時長遠對競爭力有幫助,若然年年天然咁凍,好多用咗電熱嘅市民都會考慮轉番用煤氣。相反,今個月錄得紀錄性高溫,對兩電最有幫助。
全城過電要度橋
講起兩電,近年中電為了鼓勵慳電,提出全球過電,客戶用電少過去年,可以惠及窮人,呢招既可為客戶省錢,又可幫人。對電力公司減少高峰期發電成本,又可改善形象,兼且鼓勵環保,故被喻為好橋,不過今年天氣咁熱,唔知會否影響過電,呢樣嘢可能又要電力公司高層諗諗點解救嘞。
梅汁浸潤酸酸甜甜
講開天氣熱,有中環茶友介紹,話試過一味精製話梅車厘茄(見圖),冰鎮後相當消暑,大力推薦,仲話係銀行大BANKER賢內助至愛,每次到會必點的恩物。
車厘茄有益健康,用梅汁浸過,酸酸甜甜,正合天時暑熱,飯前當涼菜可以開胃,菜後當單尾可以助消化。女士最愛吃甜甜酸酸之物,這款小碟早獲不少名太鍾愛,夏天吃飯必備。
不要以為簡簡單單的浸番茄人人會做,有擅做這款車厘茄原來是由話梅、梅子幾種梅泡浸,還加了他家鄉新會三寶之一的陳皮,品味豐富,而且特別生津。
陸羽仁
回應 (0)
我要發表