今個暑假港產片部部精采，繼上星期推介的《導火新聞線》後，即將上映的電影版《使徒行者》也不能錯過，由原劇導演文偉鴻Jazz執導，找來古天樂、張家輝、吳鎮宇助陣，還要深入巴西貧民窟實地拍攝槍戰重頭戲，令電影充滿話題性，古天樂說：「那個貧民窟真係罪惡之城，屬三不管的地方，出入要由當地保安護送，我哋拍槍戰，旁邊真係有人開緊槍，仲要係開足成個下晝，見到圍牆上好多子彈窿真係怯。」事實上，這次劇情佈局更精妙，整部電影張力十足，觀眾真係要入場支持。 主持：黃柏高
統籌：林永匡
協力：彭子僖
攝影：謝民光、李權威
場地：唐人館
Hair：DanTam@O2（古天樂）、EdmondFung@HH（文偉鴻）
Makeup：CarmanMan@Lemongrass（古天樂）、MidcoChu（文偉鴻）
Wardrobes：AnnDem@I.T.、NeilBarrett（古天樂）
把大收旺場的電視劇《使徒行者》搬上大銀幕，導演文偉鴻坦言故事構思、演員陣容、激戰場面都不容有失，他說：「我哋要將《使徒行者》昇華，唔再係社團小混混那種，因觀眾都會問有咩值得入場睇呢？於是我哋構思到巴西實地拍攝，在那裏會有種罪惡之城嘅質感，係好切合個故事發展。」電影版加入古天樂、張家輝、吳鎮宇等新角色，同時保留了觀眾愛戴的「釘姐」佘詩曼和「歡喜哥」許紹雄，Jazz說：「好多人都問，究竟邊個ｄｅｌｅｔｅ『歡喜哥』嘅卧底身份？究竟佢係一個真卧底定係變節卧底？今次會有所解釋，故事方面亦會加入多元素角力，古仔、家輝哥都係黑道中高層，關係超越兄弟情但又會互相猜疑，而今次我哋想展現CIB警察調查科實況，鎮宇哥係主要搜集情報和控制卧底如何做operation嘅人物，佢嘅演繹令人眼前一亮。」
勇闖疫埠開工
故事推高至黑幫毒梟的權力鬥爭上，戰場更由砵蘭街移師到巴西里約熱內盧進行毒品交易，貪其罪惡之城的風味，連場火爆動作戲均由古天樂、張家輝親身上陣，過程驚險，境況實在，古天樂說：「初時以為巴西今年奧運要搞gimmick，去到拍攝場地真係聽到旁邊槍聲響咗半日都呆咗，據我所知港產片未去過巴西拍攝，若不是拍這部電影，我一生人都未必會去巴西，出發前有傳當地治安好差又有寨卡病毒，世衞仲要宣佈當地已變成疫埠，幾樣加埋好似危險重重，我哋主要喺貧民窟拍攝，如果唔係貧民窟會請警察保護我哋，但你諗下點解拍一部戲要有警察保護呢？但喺貧民窟就要交畀當地單位保護，嗰度屬三不管之地，聽到已經怯，拍攝時聽到槍聲，導演仲話只係炮仗聲，我心諗你唔好玩啦，巴西有炮仗放咩，圍牆上亦見有好多子彈窿。」
巴西實地拍攝
第一次踏足巴西，感覺如此難忘，導演Jazz說：「其實未正式開拍已去睇景，當地製片話過往有一兩套西片都喺貧民窟拍攝，但就只係拍啲過鏡shot，再返去自己片場搭建，收到呢個消息個心都涼咗一半，後來經過一番思考，決定既然人哋未做過，不如我哋港產片做一次，唔係話要用條命去博，只要安排得好，也可以好安全咁拍攝。」導演所說的安排是花近七位數字請來保安隊伍，貼身護送演員出入，心口掛個勇字直闖罪惡城拍攝連場槍戰爆炸戲，這絕對是史無前例。問古天樂為何如此賣命演出？他笑說：「Jazz擔任副導演時已識，嗰時喺電視台差不多部部劇都對住佢，到佢升監製時我就離開電視台，過了若干日子後，見佢有幾部撚手小菜都唔錯，最近就係《使徒行者》，咁我無可能唔拍啦。」
難捨兄弟情義
跟張家輝合作無間的古天樂笑言戲中兩人是推心置腹的兄弟，感情比兩夫婦更親，「我對手大部份都係家輝，大家早有默契，家輝有個好處係你點演都接到，好多時導演去到現場會有新提議便會重新排戲，但後來進展到大家都唔想排，直情roll機就做，呢啲家輝又係好鍾意嘅，可能大家都會覺得巴西場面好難忘，但你問我，我自己反而覺得ending嗰場最好睇，真係好似兩夫婦喺度力挽狂瀾對抗外敵，又要一路擔心對方有冇事，嗰種關懷同痛感受好深。」 | 
