中海油靠阿爺加持
2016/08/01 08:41:50 網誌分類: 經濟
股仔遇狙擊傷晒
上星期指數雖然升跌唔大，但二三線股幾度洗倉，兩度遭沽空機構狙擊的德普科技（3823），周五股價再插56%，造0.135元；工蓋（1421）股價再插35%，造0.35元；卡撒天嬌（2223）大跌24%，造1.3元；中國天化工（362）急跌21%，造0.089元；鼎石資本（8097）重創76%，報0.1元，為包尾個股，其他細價股係氣氛咁差下都普遍偏軟。
近排不少公司準備公佈業績。中海油（883）上周四收市後發盈警，翌日股價應聲下瀉，收報9.28元，挫3%；同系中海油田服務（2883）也降逾1%，報6.05元；對手中石油（857）降1.8%，造5.26元；中石化（386）走低2.82%，造5.51元。
上個月大市反彈，中海油股價曾扣十元大關，陸羽仁見到都暗諗，乜佢股價咁強勁呀？心中有些疑問，皆因有老友家住加拿大阿伯特省，當地經濟受低油價影響，尤其係北部產油城市卡加里。佢話年前中海油係當地動用千億收購咗嘅油企，都大力壓縮投資，以應付油價低迷嘅難關，令到當地失業率飆升，放緩跡象好顯，係咁環境下，中海油股價仲可以向十元關口攻堅，係咪有啲奇先！
記得幾年前，陸羽仁同一位資深銀行家閒談投資，對方話自己揸重中海油。佢持嘅理由好特別，佢話中石油、中海油同中石化三間公司中，中海油角色好特別，因為阿爺係用呢間公司作為海外收購石油資產的工具，所以唔會畀佢衰，就係呢個原因，所以認為揸重中海油都無有怕。
睇番呢幾年發展，銀行家講法無錯，中海油係中央支持下，早幾年南征北討，收購同開發唔少石油同天然氣項目，係加拿大嘅大型收購，更加係過關斬將，經過唔少難關先至能夠成功。但正由於唔少資產係油價高峰期買入，而家形成財政壓力，如果佢唔係國企，而家都唔知頂唔頂得順，從呢個角度講，阿爺真係無畀佢衰，只不過暫時就要捱得幾辛苦。
大摩竟出報告送暖
睇番佢業績，去年盈利已經跌咗六成，但未期派息仲維持25仙，全年派息比盈利略高，可見管理層在中央支持下已經力頂，所以佢用去年業績計，市盈率計，雖然高達17倍，但息率就有成5.9厘。不過，今次中期預計會蝕錢，相信派息都好難撐住唔變。
係上半年要蝕錢下，竟有大行出報告送暖。摩根士丹利係盈警後出咗份報告，分析今次見紅係因為原油實現價格的進一步下降，已經確認減值和撥備，以將包括因經營計劃調整的在加拿大的油砂資產在內的某些油氣資產的帳面金額減少到可回收金額。
該行認為，中海油撥備發盈警屬歷史因素，派息與成本才是帶動股價的關鍵。儘管集團錄得虧損，但因其生產成本（cashcost）具競爭力，相信中期派特別股息的機會較大。如果大摩無估錯，呢個都可以視為係阿爺加持嘅結果。
根據該行對行業的觀察，在油價低企時，所有內地上游企業均嚴控成本，該行相信，集團上半年很大可能可維持收支平衡，假設長遠油價不變，成本續下降，估計長遠基本面發展正面，集團內在價值得以加強，所以目標價看14.57元，評級「增持」。大摩個報告咁有情有義，係股市呢個現實世界認真少見，至於點解咁就要大家自己想像。
油企相關股份宜先迴避
上個星期我係網誌分析咗，覺得佢下插二十七美元一桶的機會唔係咁大。至於油價上到五十美元樓上，開始就會有阻力，因為上到呢個位，又高過美國頁岩油嘅生產成本，好多鑽油公司又開動機器抽油，令供應增加，所以油價應該仲係上下擺動為主。對以營運石油上游業務的公司，股價短期唔易突破。雖然學銀行家所講，三桶油係國企龍頭，有阿爺加持，但阿爺係保底不保頂，公司業績太差中央會做啲嘢幫手，但就唔會幫你賺大錢，所以小股東如果有貴價貨在手，最好係高位沽啲，低位先補，慢慢溝番個價。至於有同呢啲龍頭公司做生意嘅油企，見微知著，佢哋業績都唔會好睇，而且仲無阿爺從旁護法，穩陣計都係迴避吓先為妙。
畀面街坊港鐵識做
上個星期到理大，有人請陸羽仁去欣賞了一套口述歴史劇《紅、土、黃、田》。何謂口述歷史劇，大家無須深究，總之套戲就搵咗班紅磡、土瓜灣、黃埔、何文田嘅街坊出嚟講古，所謂紅土黄田就係呢四個區簡稱。點解要揀呢個區呢？原來呢四個區係年底就地鐵通龍，所以港鐵公司就資助咗呢個演出。
套劇你話好無睇呢？講真故事就好簡單，無乜劇情，基本上係地區版嘅《獅子山下》咁。陸羽仁一路聽住佢講，一路就諗起投資，紅土黃田四區，其實都算係較為草根的地區，比較好嘅就係紅磡，皆因紅磡好早就有鐵路貫通。有咗鐵路，之後有了黃埔船塢、青洲英坭、中華發電廠等項目發展。呢啲項目後來係市區不斷發展後，都陸續改建成為住宅，包括黃埔新邨、黃埔花園同埋海逸豪園。
至於土瓜灣，據聞係當年最初興建觀塘線時，已經諗過起站，但都因為種種原因無落實，結果搞到區內舊樓林立，發展滯後，所以點解買樓要買鐵路沿線，真係有佢嘅道理。
今次港鐵請咗幫街坊做戲，畀佢哋講吓係區內嘅悲歡離合，好唔好睇係其次，但就擺出尊重嘅姿態。最識做嘅係場戲開幕前請咗九龍城區議會主席，憶述他居住在區內的舊歲月。區議會係地區好有影響力，港鐵搭個台畀主席講吓嘢、見吓街坊，就認真識做囉。
最怕股東俾人搞
港鐵同領展，大家都係俾政務司司長林鄭月娥列為大山的財團，但比較之下，港鐵始終識做好多。可能有人會話，港鐵大股東係政府，管理層唔敢唔畀面，領展政府一股都無，貨源全部份基手上，猶如無王管，咁點解要畀面，但唔怕官、最怕管。何況，公司唔怕官啫，管理層都怕俾人鬧要自己承擔代價㗎，仲有?家社運份子興搞埋股東，若然有人走去基金股東度投訴就唔係幾好啦。
陸羽仁
回應 (0)
我要發表