「百佳」離譜！

曲友肥仔幾年前送我一部「屈臣氏」4.5L蒸餾水機，自此之後我家一直飲用蒸餾水，貪隨時有冷熱水飲。好多人認為蒸餾水冇益，但我煮飯煲湯唔會用蒸餾水架馬。

正因如此，我非常清楚蒸餾水價錢。最初是十八圓、跟著是十九圓，近期是廿二圓，一直係咁加(水費都加啦)，貴都要飲架！

上個星期好忙，都冇時間去超市添水；剛剛去「百佳」入貨。我家附近有「百佳」、亦有「惠康」，但前者較寬敞，我入得貨多通常會去「百佳」。

行去睇吓蒸餾水價錢，標價$33.90！吓，我冇睇錯掛，會唔會係孖裝呀？會唔會送幾樽八百毫升水呀？咩嘢都唔係。咁咪即係加左價百份之五十！

再去睇吓我買慣嘅麥片，亦加左百份之十。依家買咩嘢都貴，去街市睇吓都知啦！不過，一加加百份之五十，離譜啲喎！如果加一兩蚊，我都唔會花時間去第二間格價，但係......最終，我冇買水---買唔落手。

跟住去隔離「惠康」望吓，原來「惠康」將原先放在貨架的蒸餾水擺放於出口近收銀處，我需要的蒸餾水仍賣$22.90一樽！我相信兩間超市每日都有二五仔check住對方貨價，見倒「百佳」咁，立刻速銷蒸餾水。

今早網誌講開「八仙粥」，網友指超市類似的「八寶粥」與「八仙粥」成份不一樣！我平時間中都會買此類罐頭「八寶粥」食，但冇特別留意成份及價錢。趁住去開超市咪睇吓囉！「百佳」標價$12.90，感覺頗貴，冇買！

期後去「惠康」，嘩！好多款呀，而且都係賣$9.90至上10.90(同牌子較「百佳」便宜兩至三蚊，於是大舉入貨：

黑八寶：黑糯米、黑豆、大麥仁、燕麥、紅豆、綠豆、桂圓、芝麻、黑糖

紫米薏仁粥：糖、黑糯米、糯米、薏仁、花豆、麥片、燕麥、綠豆、花生

黑豆芝麻粥：糖、黑豆、黑糯米、紅豆、薏米、麥片、芝麻、桂圓

基本上，呢類產品都唔太甜，啱現代人口味！

不過，超市價格一定係拉上補下，一般而言，我都唔會太留意。祇不過經常買開嘅嘢，一定記得價錢！冇諗過「百佳」會加得咁離譜、當人傻嘅啫！