南唐劫後情(對唱)一

前日北上操曲，一早約左同芳芳操三首、另一位曲友操一曲。今次揀嘅歌橫誇三代：一首係五十年代嘅「紫鳳樓」、一首係新曲「南唐劫後情」、另兩首半新不舊嘅「半生緣」同「一曲鳳求凰」。

三個月前，芳芳嘅老師教左「南唐劫後情」；凡係新曲一定多人操練，據知呢首曲響深圳曲社流行榜排在前十名。好唔好聽？個人唔認為好聽，曲詞亦寫得唔好----因為坊間已有不少粵曲以李後主與小周后的故事作背景，既然曲情相同，自不然會作出比較。

芳芳每次學左新曲，都會俾一份曲詞我；佢想我學左陪佢操，佢兩個月前一次過俾左三首新曲我，其中一首「夢斷沈園春」我拒收，因為熟悉我嘅人都知，所有同陸游有關嘅曲我都唔唱---我唔喜歡呢個人物！芳芳都知，佢祇係希望我會為佢破例啫！

雖然我都唔係咁喜歡呢首「南唐劫後情」，不過佢俾咁多首曲，我都學番一首陪吓佢操啦！呢首曲有兩段新小曲，依家啲新曲最喜歡編埋啲二部輪唱之類，兼且平子喉唱嘅譜唔同，咁咪有啲難度囉，因為一齊唱、如果企得唔穩，好容易俾人影響架；我揀呢首曲學係想向難度挑戰啫！今次第一次操，自覺都唱倒九成。

日期：2016年8月6日

地點：非凡軒

演唱者：芳芳/Van

https://app.box.com/s/q6cj4p4ht8exh5k3m7pmxvaopibwg9dk