陸羽仁周記
陸羽仁周記
陸羽仁周記

手機股等吃蘋果

2016/08/08 08:42:05 網誌分類: 經濟
08 Aug
        英國央行終於出招減息,帶動港股造好。以全周計走勢先跌後升,恒指累積上揚255點;國指累積上升173點。匯控(005)啟動回購不多於25億美元股份的計劃,股價收報53.5元,連續三日上升;渣打集團(2888)報65.15元。恒大集團豪擲91億元人民幣入股萬科企業,持股逾4%,成為第四大股東。消息刺激下,萬科(2202)係公佈翌日報18.9元,升1.6%。至於恒大(3333)仲勁,飆5%,報5.41元,成為市場另一焦點。

        舜宇炒新機出場

        港股收市後美國勞工部公佈嘅就業數字好過預期,令加息機會再增。據公佈,7月份非農業就業職位增加25.5萬,高於分析師18萬預期,6月份增幅向上修訂至29.2萬。期內,失業率報4.9%,與6月份持平,分析師原預測回落至4.8%;平均時薪按月增加0.31%,符合預期。數據顯示經濟強勁,帶動杜指收市報18543點,升191點。納斯達克指數收市報5221點,升54點。標普500指數收市報2182點,升18點。

        上周五收市,市場再炒作新興工業股舜宇光學(2382),單日大升7.2%,報32.8元。大行出咗個報告,憧憬蘋果再有新機喺九月面世,由於傳言係雙鏡頭,所以起哄炒作。舜宇借蘋果機炒起,實際佢造嘅鏡頭唔止係手機,仲有其他用途,所以未必要靠蘋果打救。

        不過,蘋果自從教主喬布斯仙遊,都無乜叫好叫座嘅產品,開頭靠出吓「大芒」機,仲可以撐住,但呢兩年佢嘅產品缺乏驚喜,掀唔起換機潮,睇佢嚟食粥食飯嘅公司都幾煩,好似和記電訊香港(215)前幾日公佈業績,中期純利為3.76億元,按年下跌26%。

        公司解釋,上半年香港及澳門流動通訊業務收益為34.72億元,按年減少62%。由於期間市場缺乏備受追捧的智能手機,令期內流動電話業務大跌62%,由去年同期的92億元,跌至期內的34.7億元。和電香港行政總裁黃景輝昨日指出,希望手機生產商於下半年會推出「明星級手機」,從而帶動該公司在硬件銷售方面的收益。

        《PokémonGo》叫好不叫座

        過往和記係新手機市場表現出色,每逢蘋果有新機,和記出機都係數一數二。因為過去做得咁好,蘋果新機乏力,就變成有啲無以為繼嘅感覺。呢樣嘢都有啲係預期之內,麥格理評論業績時就指出,公司上半年盈利符合市場預期,手機服務收入未有明顯下跌。該行就業績將公司2016至2018年盈利預期下調11%至14%,目標價由3.4元下調至3元。

        早排,本地電訊股炒作《PokémonGo》登陸,陸羽仁已經覺得呢陣炒作可能好短癮,實在本地電訊股競爭劇烈,始終要瓣瓣好先至交得出成績。過去一年蘋果無料到,加上本地經濟下滑,網絡商生意唔易做,唔可能靠一個概念就翻到身,所以和電業績公佈完,其他本地電訊股好似數碼通(315)都軟一軟。嚟緊兩個月,大家就要睇蘋果有新機出,市場反應掂唔掂,博有機會造牌食胡。

        匯控宣佈完業績後,另一隻同英國有關嘅大藍籌長和(001)都會喺周四(11日)公佈截至6月底止嘅中期業績,券商料期內核心盈利介乎145億至150億元,較2015年同期149.38億元,按年倒退3%至微升0.4%。長和股價係脫歐後一度大插,但經過呢排反彈,基上已收復失地。

        賽前預測中,德銀估長和中期收入按年跌4%,EBITDA按年跌6%及EBIT按年跌5%,主要因港口及零售表現疲弱。而平均油價下降及外匯波動的影響,部份由基建和電信的增長所抵銷。市場英國脫歐、歐洲收購機會及資本控制會成為今次主要關注點。

        長和績前斟掂中海油條數

        除咗歐洲業務,長和另一敏感點係透過赫斯基營運嘅能源業務,因為上半年能源業務仍然疲弱,相關影響屆時會睇得真啲。喺派成績表前,加拿大赫斯基能源披露,與中海油(883)年初就南海荔灣合營氣田的「照付不議」爭拗,剛獲得圓滿安排。赫斯基及中海油同意下調荔灣合營氣田的天然氣價格約13%,較市場預期的30%至50%為低。雙方仲決定落實新一個氣田流花29-1投產每年產量達8000萬立方呎,消息令困擾赫斯基能源股價的不利因素消除,可以話係績前好消息。

        赫斯基能源今年公佈首季業績時披露,中海油簽訂「照付不議」合約,但因內地天然氣價下調,中海油未履行合約,而只支付能夠銷售的氣量金額;赫斯基一直堅持要追討有關損失。最新嘅公佈話,每千立方呎天然氣價格將較原本合約的11至13美元低約13%,合約生效期將追溯至去年11月。赫斯基行政總裁顧業琛同時話,雙方計劃深化合作,而且隨着發展流花29-1氣田商業化及開採,共同創造更多價值。證券界指出,赫斯基能源與中海油以往的爭議,令南海天然氣開發有相當不明朗發展,因進口天然氣可能較自行生產為便宜,而家獲得解決,叫做共渡時艱,希望明天可更好。呢個安排雖然不能完全消除長和能源業務受到的壓力,至少都減低咗呢瓣生意面對嘅不明朗。

        鎊匯跌英國金勞醞釀加價

        英國宣佈減息,鎊匯一度試十算低位,適逢暑假外遊高峰期,今年歐羅及英鎊受脫歐影響,匯價滑落,到當地旅遊特別吸引。歐洲仍然恐襲處處,反而英國相對安全,聽聞唔少有錢人都去咗英國,搞到英國酒店好難訂房,而且當地奢侈品因為匯價影響,名錶勞力士聽講已準備加價,想執平貨者就要鬥快手。

        英國公投脫歐,新首相文翠姍似乎想用緩兵之計,盡量減少震盪。金融界要人共識是,金融是今次受衝擊最大領域,譬如歐羅結算業務,歐盟必然要求搬回區內進行,故此銀行業必定把部份人手搬走,至於旅遊零售就有可能係贏家。

        豪宅插水見心郁價

        流風所及,倫敦地產首當其衝,有豪客收到盤,幾年前賣近四千萬鎊的豪宅,連近千萬裝修,現時叫價回落至二千多萬鎊,跌幅相當驚人。倫敦樓價近二十年幾乎長升長有,就算金融海嘯衝擊都有限,尤其超級豪宅累升幅驚人。貴重物業一向供求波動,價格特別敏感,不過咁插法,對有銀人士都幾吸引,睇到都心郁郁。

        由於經濟變數多,英鎊匯價備受唱淡,但有大銀行家獨排眾議,認為英國人思想成熟,如此多人支持脫當然有其道理。早前鎊匯急插,皆因對沖基金渾水摸魚。他認為鎊匯需求怎都存在,所以兌港元插穿十算,就不妨分段入市,反正去英國旅遊,多少都要換吓現鈔傍身。有中環茶友呢排去中環本地銀行總部換錢,一入理財部門就有三個小姐問有乜可以幫手,佢話想換啲英鎊使吓,小姐溫柔咁答佢,唔該攞張飛先,茶友問咁要等幾多個呢?小姐話三十零個啦,茶友一眼關七,當時有六、七個櫃位開緊,咁咪要等四、五個圈先得,而家去得銀行,多數都要搞啲特別嘢,多數都要番咁上下時間,咁咪有排等?

        結果茶友等咗半個鐘,條龍先至做咗唔夠十個客。佢諗咁搞法隨時要坐兩個鐘,不如都係返公司叫夥計嚟換好過。

        佢後來返到公司叫夥計換錢,伙記答話無問題,而家中環有幾間找換店,個價好之餘,仲可以電話落單,雖然去到都要排,不過咁都抵啦。茶友就諗,而間銀行生意真係唔易做,不過,佢又唔係幾明,點解銀行擺幾個靚靚小姐喺大堂,但唔增加兩個櫃員呢?小姐雖然友善可人啫,但幫唔到手嘛,或者,銀行而家覺得找換呢啲蠅頭小利嘅生意,做唔做都無所謂啦!

        陸羽仁

        
回應 (0)
我要發表
user

網誌分類