講真話,錯了嗎?

2016/08/21 11:40:11 網誌分類: 生活
21 Aug

朋友跟一位名師學唱粵曲三年。她曾約我與她操曲三次,因為當時她接下了三個「騷」(演出),打算用我跟她操的曲出其中一個「騷」。

 

操完後,她問我意見。我:「此曲甚難唱。我跟幾位曲友操過,她們都有十年、甚至超過廿年曲齡,但一樣唱得唔好。基本上此曲女平(女子唱男聲)都好難唱,即便啱音、啱拍都好難唱倒首曲嘅氣氛。我覺得暫時來講,你唱另一首曲(佢出另外兩個「騷」嘅曲)會較容易。」

 

我咁講係話俾佢聽佢唔係差,唱得唔係咁好係因為呢首曲實在難唱、更難唱得好,因為其他曲友即使有十年、廿年曲齡嘅都唱得唔好;再者,要出「騷」梗係搵首自己唱得好,聽眾又唔會覺得你力有不逮嘅歌啦!不過,其實我咁諗係錯架!因為人人都認為自己係「得」架。

 

朋友份人好勝!我自己都好勝,但係做人要識得隱惡揚善,冇理由將自己嘅弱點展示俾人睇。我成日都話操咩嘢曲都得,出「騷」一定要揀啱自己啱唱嘅!係人都知我三貞九烈架啦,「對花鞋」呢類歌,我唔會唱得好架!

 

朋友可能見我咁講,偏偏改唱呢首嚟出接下來果三個「騷」,要向難度挑戰!我冇去睇,唔知佢唱成點!不過我可以肯定唔會好,即使你幾有天份,有啲嘢係需要時間浸淫嘅。

 

上個月佢告知我佢響油麻地出「騷」唱此曲(第四次)。油麻地咁近,我都好難推啫!我:「油麻地個場細,唱口(有份演出者)入場劵也不多,你唔夠嘅就唔駛預我啦!」

 

朋友:「我就係希望你嚟聽吓。」講到咁,唔去都唔得啦!

 

其實以朋友學曲三年來說,佢唔係差架啦!豈馬拍子啱,至於音準,由於佢未識得用正確發聲位罝,好多高音都唱唔倒!

 

前面咪講左佢跟名師學曲嗎?佢有的是錢,既上大棚(一大班人上課)、亦跟老師上私鐘(一對一),但坊間教曲者,懂得教人發聲位置者可說是鳳毛麟角。他們/她們自己唱得倒是因為他們一開始習便用啱發聲位,但卻無法告知其他人,如何可以用啱發聲位。一知半解的老師,便叫學生用力,大聲叫得多就得!

 

朋友老師可能都係咁教佢啦!果首曲一開始便是高音,朋友當時搏晒命大聲唱;不過,大聲唔等如到音(因為成段「正線」曲佢好似唱「反線」咁,低四度),但係大聲之後,便是沙聲,接下來幾段曲佢把聲都沙晒。

 

心諗:係咪我錯呢?講真話係咪錯呢?何解佢老師明知如此,唔提議學生改曲呢?(難得有學生肯俾錢出「騷」,話之佢啦)抑或朋友唔聽人講,係都要明知山有虎,偏向虎山行呢?

 

我和朋友們一個月左右都會相約飲茶,好彩今次茶聚我另有約會,否則佢再問我佢唱得如何?我點答呢?講真話令人討厭、講假話唔係我本性!諗諗吓,不如學吓深圳曲社啲音樂師父嘅標準答案:「好過上次!」呢句算係真話,而且好多人都好受架。

 

早幾日與香港一班音樂師父晚飯。其中一位是從深圳移居香港的。席間當然會講到一啲老倌幾討人厭、幾冇品。那位從深圳來的師父講:其實我地嘅行規係唔會對操曲者俾任何意見,除非佢地係自己嘅學生;深圳啲師父讚你嘅嘢,信佢一成,雙目失明呀!

 

咁又未必係真嘅,音樂師父都抱住隠惡揚善嘅心態,佢地講嘅嘢,打個六折差不多!太真?啲客走晒點算?想炒魷咩?

 

回應 (0)
我要發表
user