帝苑酒店自助餐

我地八個網友(全女性，相識於大家響yahoo寫網誌。yahoo網執笠，我地轉左嚟頭條網都好幾年)隔一段時間便相約食一餐、八一輪！大家共通點係都喜歡粵劇曲藝。

從最初一年一次聚會，期後半年一次聚會，跟住越來越密，個多月便聚會！今次約會相對來說隔得耐左，因為對上果次係三八婦女節。

今次聚會地點是「溫溫」介紹：尖東帝苑酒店雅苑座自助餐。介紹原因：今年是該酒店35周年，所以自助餐原價$548，七折(唔駛問邊張信用咭有折，七折係最抵！真的嗎？如果你有長者咭，更抵！原價減一百再七折。咁當然要以原價計加一服務費啦)

每次都差不多係食自助餐，其實間間酒店嘅食物都差不多：梗有啲好食、有啲唔好食！反正食得唔多，咪揀好食嘅嘢嚟食囉！一般自助餐收九點半，呢度閒日可以坐到十點。

講真吖！我真係唔鍾意尖東果區架：紅磡去，搭車又唔係、行路又唔係。尋日仲衰：「哎呀大仔」話唔識路，佢最後搭234x去麼地道巴士總站。我叫佢響果度等，我去執番佢！

唉！我心目中嘅尖東巴士總站係響歷史博物館傍近理工大學果邊嘅，去到唔見佢！原來佢所講嘅麼地道巴士總站係響永安廣場果邊！一頭一尾，即係佐敦同尖沙咀港鐵站嘅距離！既然佢唔識路，我叫佢唔好郁，等我去搵佢(其實我入左尖東，都係不辨方向，祗係較佢好少少)，結果都擾攘左好耐先團聚。

呢間酒店除左價錢算抵之外，招呼與食物真係唔錯！今期每位客人配給：焗松葉蟹蓋一隻及鮑魚加海膽汁一隻：阿仔唔食蟹蓋，所以「孝敬」俾我，食完兩隻蟹蓋都飽左一半，咩嘢都唔駛食囉！

刺身我食了三文魚和八爪魚，「溫溫」話油甘魚仲好食！

凍肉我祇揀了西班牙火腿同煙三文魚，係「溫溫」隻識途老馬推薦嘅：

沙律？梗係唔食、留肚啦！

蝦、翡翠螺、青口。全部我都鍾意食！美中不足是翡翠螺有沙，大煞風景！

長腳蟹、蜆、麵包蟹。除左長腳蟹我都食！

美女們一致認為燒味好食，特別係叉燒！不過，我一向唔鍾意食燒臘，冇試！

熱薰我又係唔食嘅！咩嘢都唔食、你食咩嘢架？原諒吓啦，食得唔多，梗係揀自己真係想食、又貴嘅食物啦，唔係點回本呀？

以下嘅甜品我都冇食：

楊枝甘露：一眾美女極力推薦，咪試吓囉！果然有誠意，料足。

斑蘭香蕉班戟：好味！唔鍾意斑蘭味咪食原味囉。我食得少，梗係揀貴嘅嚟食---斑蘭蛋糕都較一般蛋糕貴！

我至愛嘅雪糕，梗係有食啦！六款味道，我祇食了三種：

埋單：長者三百幾、我地呢啲「非」長者四百幾！