香港告急！

尚餘五日便是「垃圾會」換屆選舉，原本我同「阿仔」都諗住唔投票，原因係投唔落手；但係，今期有班「港毒」、「本土」、「青政」、「冷血」之流參選，如果我地唔好好運用手上一票，香港前途堪虞！

上星期日無所事事，反正都睇左三個「垃圾會」論壇，吾爭在睇埋餘下果兩區，因為有MytvSuper, 可以摷番嚟晒。因此，才留意到原來「傷港電台」同「無缐」各自舉辦論壇，相比之下，主持人質素高低立見，以一敵二！

今次論壇，建制派以外均拿CY抽水，明知CY不受歡迎便問對手：「是否支持CY連任？」相信即使愛國愛港的港人，對CY連任都好有保留。即使如此，我地可以點？係「飯民」剝削左我地—人—票選特首嘅權利！如果認同我講法嘅，今次咪要佢地票債票償囉！

香港依家亂過亂世佳人，難道CY一人有此本領？如果係嘅，我都會投佢連任嘅一票！可惜我冇票吖。

另一個熱話題係全民退休保障計劃。一個受普羅大眾歡迎的計劃，當然係免審查，人人有錢派啦！但係百份百受歡迎、唔代表係可行架馬。我份人遠視嘅，香港未來正面對人口老化，勞動人口減少的問題，加上呢幾年香港經濟衰退，換言之，無論薪俸稅或者利得稅收入，在可見的將來都會減少。還有，香港依家好多人是自僱人士，分分鐘連稅都冇交！

收入減少又如何可以承擔不斷上升的支出？唔該果班「飯民」唔好再呃選民啦！佢地最鍾意問對手：「你支唔支持全民退休保障？你淨係答支持或唔支持？」陰人架！

你叫人點答呀？我都支持架，但係正如上述，要睇吓政府可唔可以負擔吖馬！如果如佢地所建議，唔駛審查，係人都可以有定額收入；如果政府因此而建議加薪俸稅、加利得稅，佢地又會唔會支持吖？收入唔加、淨係加支出，咁樣係審慎理財嘅政府咩？

咁係咪建制派講嘢一定啱？都唔係囉！嘩，你騎牆呀？

我講明，我係中間偏左架！邊個啱咪幫邊個囉！所以我咪話投唔落手囉。但係，如果選左果班「傢伙」入「垃圾會」咁就慘啦，落畫果班祇係白逗人工唔做嘢啫(做戲唔算)，但參選果班「港毒」、「本土」、「青政」、「冷血」之流不單冇建樹，仲會攪破壞喎！兩害選其輕，我係咪要略盡綿力，積極投下我微弱嘅一票呢？又想力挽狂欄、螳臂擋車？原諒吓啦！有生一日都望一日吖馬。

近呢十年，「飯民」最鍾意打告急牌！初時真係好有效架。但係當人人都打告急牌時，呢張經已唔係皇牌。我認為依家香港真係要告急，希望大家聰明地運用手上一票！

------------------------------------

今屆候選人太多，唔想嘥我編幅(冇稿費架)！有興趣研究佢地資料嘅，請登入選舉事務處網頁：

http://www.eac.gov.hk/ch/legco/2016lce_candidates.htm