2016立法會冇得揀就死都唔揀保皇黨

有人話：「一不選西環契弟, 二不選冒牌博士, 三不選土豪劣紳, 四不選特權階級, 五不選人大政協, 六不選軟體動物, 七不選專業流氓, 八不選鋤弱扶強 ,九不選狂躁勇武」

當然九不該選，只是，區區所餘有幾? 幸好，我都應該仲揀到。若真冇得揀，咁都一定是保皇黨以外的。

短短幾年，我成長的香港的核心價值，被切底破壞，ICAC 不再 ICAC ，公務員不再政治中立，法治變成人治，機管局民航處因護一人之短而廢制，仲有連港大不再港大，討論港獨校長都話唔好。。。

最緊要年青人話唔再跟阿爺姓，我地明明係中國人，點解攪到咁！

我係教書嘅，細路有事，我就話坐底好好聽細路講啦，好人好姐正常人一個，點會無啦啦話以後唔認阿爺，唔跟老豆老母姓架，一定有原因，係未？！

你唔俾佢地講，佢地就會唔諗咩，你唔俾佢地諗，佢地就會變番孝順仔攬住你錫咩！掩耳盜鈴而已。點解唔可以坐底聽下佢地講。做大人嘅有過就改，大人要為細路立好榜樣好好傾講溝通。但阿爺塞個姓梁嘅管家來管我頭家，對住我啲仔喊打喊殺，我唔係話我啲仔啱晒，但就是四年啫，我啲仔變到唔知點教。

九不選，冇得揀都死都唔揀保皇黨！我唔要啲咁嘅人黎管我頭家！唔好逼我呢個中國人支持本土呀吓！