黑天鵝肉好好味
2016/09/05 08:43:06 網誌分類: 經濟
上周五U盤成交爆升
雖然經濟數據比預期弱，美元都軟咗啲，但一個數字唔代表一切，美息年內有可能上調的機會仍然存在。上星期美股大部份時間等代數據，杜指乏力向上，港股就叻番一次，我自行我路，創十個月高位，升過百點企在23200上收市。由於藍籌成份股收市後變動，U盤時段成交達98億元，帶挈港股全日成交仲增至逾八百億元。以全周計，恒指累升357點；國指累積漲136點。
上個星期有兩雙藍籌股最搶眼，一雙係大笨象匯控（005），佢連升幾日，周五一度衝關逼向60元的心理關口，最後因為回吐倒跌0.1元，收報59元，但演出已相當矚目；同樣長和（001）都成為大市火車頭。周五借住旗下的意大利電訊業務合併獲歐盟批准，重返「紅底股」，收升3.27%造102.8元，為升幅最大的藍籌。
匯控長和重返脫歐前
匯控同長和呢輪發威，有中環茶友笑言，呢兩隻股係六月份英國脫歐後曾經係首當衝跌得最多的兩大股份，但經過兩個幾月，佢哋幾乎係一插到底，腳軟幾日之後就回復穩定，之後就逐步回升，茶友係匯控低低插到45元時，小小哋兜咗啲貨，?家回報近30﹪，都相當和味。
英國脫歐在當時被喻為事前難以預見的黑天鵝事件，茶友當時敢膽撈底，買入咗啲匯控同盈富基金，?家算係食咗黑天鵝肉。佢話，當時大家講到個天好似跌咗落嚟，佢敢博食天鵝肉，膽粗粗原因有幾個，一係手頭有啲銀彈，呢個好緊要，若然無閒錢，又點敢博，所以買股策略幾時都要睇自己貨多定錢多；再者，佢見英國股市跌幅都無香港咁大，本地經濟點睇都無理由大鑊過英國啫，所以恒指當時下跌過千點係過份咗。仲有一個理由，就係雖然脫歐話係黑天鵝，但都黑唔得晒，美國聯儲局都留咗一手睇埋結果先加息，咁即係佢哋有子彈去應付呢雙黑天鵝喇。
大行唱衰信佢失機
?家睇番，茶友覺得自己食天鵝肉最衰無大啖咬落去，?家覺得好好味，但就唔係幾夠喉。講到呢度佢就變咗姓賴，話最衰當時有大行出嚟唱衰大笨象，話最衰會跌穿40元，搞到失咗信心。如果唔係諗住就算去到三十幾元都頂得順，就差啲連買咗嗰啲都嘔埋出嚟，所以有時大行啲嘢都係信幾成就算，特別係股價已經跌咗好多時，大行呢啲報告，隨時係為咗嚇人沽貨等大戶補倉而發出嘅心理戰。由於唔敢大啖咬，低撈嘅貨唔係咁多，所以佢?家都唔急住大手沽貨食胡，一於細細啖嗒真啲。
茶友話，當初佢揀匯控同盈富，主要前者派息高，後者就大包圍，只要個市升就會中。有人建議佢買長和，因為李超人一向有眼光，英國股匯大跌，可能仲益咗佢掃貨併購，呢個說法不無道理，但由於佢關注長和嘅能源業務係低油價下會否受影響，所以最後都無落注。
美股近頂港股反見硬淨
港股呢排硬淨，另一個可能真係有啲錢開始擔心美股見頂，買番啲估值低嘅市場，所以見到大股有啲輪流炒，好似中國海外（688）周五都升咗2.9%，造26.5元；華潤置地（1109）漲2.%造22.35元；新地（016）都升2.38%造111.9元。
告別八月份之餘，恒生指數成份股收市後執位，染藍的瑞聲（2018）又係好消息出貨，股價逆市下跌，收跌0.52%造86.55元。被瑞聲取代的康師傅（322），股價升2.2%造7.64元。中車時代（3898）取代中國建材（3323）成為國企指數成份股，中車時代升2.5%造42.6元；中國建材漲0.6%造3.48元。至於銀河（6881）取代因私有化的萬達商業（3699），變身成為國企指數成份股，銀河收升3.3%造7.54元。
百靈達國際（2326）與中國民生金融（245）收市後將會納入恒生綜合大中型股指數百靈達收升8%造0.46元；民生金融升5.4%造0.78元；被踢出恒生綜合大中型股指數的高銀金融（530）先升後瀉，收挫9.6%造5.92元；同被剔出恒生綜合大中型股指數的大悅城（207），股價降3.3%收1.19元。
國泰高層四出試食同卅二公館合作
呢排好多商場都話搞食肆，有料到之食肆變成搶手貨。有中環茶友上個星期先同國泰高層走去銅鑼灣試食一間日法混合菜，據講菜式係米記三星級大廚主理。菜式味道唔錯，最過廳係佢有個露台，食完可以出去飲杯威水，吞雲吐霧唔使落街打邊爐。
?家航空公司競爭大，國泰航空就算專做高檔客，要撐住個場都唔易。早前公佈上半年業績錄得倒退，皆因頭等及商務艙這類高價服務需求受經濟影響急降。高層四出搵啲好食肆合作係反擊招數之一，呢招係回應有好多貴各投訴話佢哋嘅食用水準跌。問心講，話佢食用差咗未必公道，不過人哋進步咗，你又收得貴，啲客自然借意詐型，所以聽講國泰會與卅二公舘合作，研究提供餐單，同時會增用有機餐酒。有機餐酒不用農藥，採用雀鳥滅蟲，生長出來的葡萄特別優質，據報釀出來的酒會都會特別醇厚。
黑毛豬叉燒太肥美
卅二公館有味黑毛豬叉燒，有人食過讚好，但茶友嘴刁，話黑毛豬偏肥，豬髀做火腿入口即化確係好，但做叉燒就咬口唔夠啦，當然呢啲係觀點與角度，總之有變化就好過無變化啦。
除咗飲食，國泰已訂購近40架空巴350新機，這款新機載客量較少，公司講法係佢嘅旅客體驗都會好啲，機上娛樂設施會大幅提升，片種和數量大增。
國泰訂購的A350，還花了不少錢在研發召改善座位設施，商務座位將來可以有無綫上網服務，而現時擺放雜物的小枱面改良後，可以揭起拼合加闊牀位。經濟位的座位大小雖然很難改變，但位頂的承託枕就增加到可以有十幾個角度的調校，令乘客入睡後頭部擺放更舒適，唔使好似?家要用帶上機的氣枕。
陸羽仁
回應 (0)
我要發表