化悲憤為「濕平」

我與幾位豬友隔個月就竹戰----預防腦退化症！

每次竹戰我都預左輸錢。算命佬批我一生冇橫財命！所以我甚少打麻雀、即使打亦預左輸錢。冇所謂啦！財散人安樂吖馬。

不過，上星期六果一場(我地每次打十六圈，唔駛執位，四個位輪流坐勻晒)，慘！輸左成千銀呀。雖然平時都係輸多贏少，但係一般都係輸六七百蚊，當係應酬費囉！兼且我地抽水食晚飯，食完仲有錢分，真正係衛生麻雀。

今次由頭輸到落腳，臨尾仲要「出沖」一鋪十三么，簡直係慘無人道！不過，好彩唔止我一個輸，一家贏三家呀！結果，大贏家都好識做，佢話晚飯佢請，將抽倒嘅水分番俾我地啲輸家喎！咁樣做朋友咪襟玩囉---連我姪女目睹我地打麻雀過程都覺得奇怪！我地食左糊顧之然大笑、連出左沖果個都大笑一場，做人係咁先襟玩架，吓吓算住好辛苦啫！

基本上，我輸錢係應該嘅！打麻雀我唔可以分心架。偏偏果日有「正苦」舊同事響群組不斷whatsapp我，聊聊吓，有人問：「阿姊(註)，下次選舉，你會唔會參選呀？如果你參選，我地加晒入你個競選辦幫手吖！」

我答：「你地唔駛加入競選辦。如果我參選，你地每位包我三百票就得啦！」

跟住當堂靜晒(一言足以閉之)。不過，果陣我都輸唔少咯。

所以，我基本上好少同其他人打麻雀，怕連朋友都冇得做；而且我有親身經歷，有朋友因打麻雀反目！

黃埔Aeon Style(前吉之島)最近重新裝修開業，令人耳見一新！好唔好過舊時？見人見智啦(答得咁糠)！係吖馬。我覺得佢有啲似log-on，又有啲似City Super囉！不過，現時好多嘢都減價。

尋日，一於化悲憤為「濕平」。開心買野、唔開心又買野係女人嘅專利，尋日一次過駛左幾千銀！跟住....好開心呀。駛咁多錢？因為陸續有朋友慶生，咪一次過買定啲小禮物，唔駛臨急臨忙買唔倒合心意嘅嘢囉----送嘢俾人，都要自己喜歡、人地讚賞至得架！吓，送「？？曲奇」？當然唔係啦。

哼！阿姊「濕平」都閒閒地駛幾千咯，輸一千蚊麻雀？濕濕碎啦！

唉！其實果晚我揼到個心口都痛呀。

------------------

講開又講吖！好似「哎呀大仔」話齋：「可惜我年老了，否則我一定參選，只要叫幾句口號，擲兩舊磚頭，穿條熱褲，哈哈哈哈哈哈發達啦！」

傻仔：參選祇設最低年齡，冇最高年齡架！

咁就一於我地兩仔乸參選，我排響佢名單後面。因為我名氣大過佢----我仇家唔少架！

------------------

註：

「阿姊」

我以前響某寫字樓，同事上上下下都稱呼我做「阿姊」(去聲)、唔係「阿遮」，因為果陣電視播緊李司棋套劇，佢有句金句：唔駛驚，「阿姊」響大廳。所以同事咁樣叫我，意思係：有咩嘢事，「阿姊」會撐住咁解。

何止呀！雖然同佢地共事已是廿年前的事，不過，我地依家隔幾個月都會相約打麻雀吹吓水(兩枱人)，我每次都貢獻吾少架：呢班賊嚟架！想學人求警保護都吾得(你又未參選，更加唔係票后！你係Ms No Body咋！自量吓啦)-----因為警察有份搶我錢架！嗚....嗚...嗚....