股市風光在險峰
2016/09/12 08:41:57 網誌分類: 經濟
財爺籲留意完美風暴
由於具有投票權的波士頓儲銀行長羅森格倫支持短期內加息，提高聯儲局最早在本月底加息的機會，令美股受壓，跌到低位收市。三大指數收市都跌，其中杜指收市報18085點，跌394點，納斯達克指數收市報5125點，跌133點，標普500指數收市就報2127點，跌53點。波士頓銀行行長咁講，加深咗市場對利率上調嘅關注，不過咁係咪代表咗美息會喺九月份上調呢？有「新債王」之稱的DoubleLineCapital行政總裁岡德拉赫（J.Gundlach）係跌市前已經話，即使國際市場對聯儲局加息的預期低於50%，聯儲局仍可能會出乎市場意料地加息，以顯示其獨立性。他的估計係當加息預期一旦步入40%至45%，則儲局最有機會加息。「新債王」嘅貼士係，假如本月20至21日之前有關加息的市場預期仍低於40%，且標普指數低於2150點，則他相信聯儲局本月將按兵不動。聽佢咁講加上美股上周大跌，如果美國呢個月加息嘅話，陸羽仁覺得都算係隻小小黑天鵝嘞，因為耶倫如果咁勇，就真係有啲出乎意料。如果九月份美息仲係維持，咁呢吓插落嚟，就可以視為逐步消化年底加息的技術調整。
美股受到息口上調步聲接近嘅影響急挫，全球股市都險險哋。咁啱日前到杭州出席二十國集團（G20）峰會的財政司司長曾俊華，返嚟香港後就提醒，在種種不利的因素下，環球經濟已集齊所有「完美風暴」的元素，但他相信內地今年經濟增長能達標。
港股可以用無限風光在險峰形容，皆因中美兩國不但實體經濟無乜好消息，股市都無料到。港股之升唔多唔少有避險之意。啱啱開完二十國集團峰會嘅財政司司長曾俊華就話，美國新公佈的經濟數據，反映出好壞參半的訊號，歐羅區和日本的脆弱經濟仍令人擔憂，加上憂慮美國加息步伐及時間，及各國央行的貨幣政策各走極端，還有英國「脫歐」帶來的不確定性，佢形容以上種種已集齊所有「完美風暴」的元素。佢話，各國領導人都希望透過G20峰會，找到振興增長及應對未來風險和挑戰的辦法，不過跟住就無講搵到嘅答案嘞。
財爺講到危機四伏，點解港股反而升呢？中環茶友畀咗個解釋，就係避險。佢話，而家西方好多國家嘅債券同存款都係負利率，港元與美元掛鈎，買香港藍籌有3、4厘息，等同買美元工具，加上港股估值低，大家見美國加息，不如泊啲錢入嚟收吓息先啦，所以早前已開始見到有資金流入。同一時間，內地資金都擔心美國加息，人民幣會貶值，同一道理，咁不如買吓港股收吓息，所以佢哋寧願買港股唔買A股囉。至於話險資入市，只係一個藉口啫，就算阿爺開綠燈，邊有咁快放水吖。
險資未嚟炒避險要識揀
除咗避險因素，有國企巨頭來港集資，大行自然希望個市有番啲氣氛。外電報道，中國郵政儲蓄銀行計劃在香港發售122億股H股，招股價為每股4.68至5.18元，集資介乎73億至81億美元約570億至630億港元，為今年最重磅新股，將於本月13日起招股，本月28日掛牌。中國郵政儲蓄銀行已有中國船舶、上海國際港務、海航集團等5個基礎投資者。由於有咁重磅股份嚟緊，都會產生維穩嘅引力喇。
係咁環境下，自然多咗人問要買啲乜？係憧憬內地險資湧港，港交所（388）上周五發晒力，股價重上兩百元大關，全日飆升5.54%收209.6元，為升幅最大藍籌；一眾券商股都受追捧。耀才證券（1428）爆升12%造3.19元；海通國際（665）揚4.7%造5.47元；國泰君安（1788）升4%造3.13元。內險股上周表現都唔錯，國壽（2628）升4%造21.4元，為表現最叻國指成份股。另外呢排有人抽吓新股，超額認購1694倍的易緯集團（3893）今日上市，暗盤價上收收報0.198元，較定價0.15元高32%，成交4970萬股；按每手20000股計帳面賺960元。同日上市的澳至尊（2031）暗盤價收報0.55元，與定價相同，成交430萬股，涉資236萬元。
我覺得上星期個市借險資來港炒炒有啲過咗位，唔排除會要再消化一下，因為避險資金係穩陣派，佢哋都係收吓息想保值，唔會咁急去搶貨，比較穩陣係候低至買。至於選股如果佢哋係想收息保值，咁梗係要有番咁上下息派，最好仲要業績比較穩定嘅大戶就啱佢口胃，總之財不入急門，想賺錢就要個心要定，擇肥而噬。
iPHONE7概念應該差唔多
最後講多句，蘋果iPHONE7無乜驚喜。若說有驚喜，反而係佢對手三星嘅新產品電池出咗事，令佢少咗競爭，所以聽聞新機銷情算樂觀。就算有驚喜，相關概念股都可能好消出貨。呢類股而家息口已經唔高，所以短期高峰可能已過，好似瑞聲（2018）收市一日挫4%，收86.6元，為包尾藍籌；高偉電子（1415）、手機零件股舜宇（2382）齊挫5%，但博反彈嘅價值仍然唔係咁大。
DANRYAN'S舊場名花有主PP新店賣意西菜
太古廣場（PP）早前重組食肆組合，希望換上新形象。在該處多年的西餐廳DANRYAN'S被安排遷往集團旗下其他地點經營。該店原本所在的鋪址位於戲院不遠，而且相當濶落，位置不俗，算係龍頭靚位之一。這個靚位已經名花有主，將會有營運多家米芝蓮星級餐廳的麗新集團開設賣意大利菜的新店。
原想主打TAPAS
中環茶友以前耐唔耐都有去DANRYAN'S食吓嘢，美國口味大件件其實唔係啱港人，但佢嘅味道算係唔差，所以長期以來都有捧場客，呢次被離場唔係畀唔起租，而係業主想換吓個場嘅感覺，最終傾掂數請佢哋轉場。接用新店聽聞原本想「中西混合」作主打。所謂中西混合，不是一般的FUSION，而是西班牙菜近年興起，尤其餐前小吃TAPAS以款多味美馳名，深受各國食家歡迎。新店想按這個藍本，加入適合香港人口味，帶有中菜色彩的款式。
不過，後來太古希望能保持有西餐供應，故此新店會調整路線，變成西班牙加意大利菜。
太古重組商場組合，除了太古廣場重新注重本地客和年輕化，加入不同食肆，太古城中心同樣陸續變革。現時零售市道調整，為了保持人流，不少商場大業主都考慮增加飲食選擇，早前希慎管理層在公佈業績時，同樣透露希望加強飲食和體育用品店，體育用品店仲畀得起租，食肆就點都唔及名牌出手咁闊，加上多咗人開餐廳，競爭大、成本增，其實都唔係易做㗎。
陸羽仁
回應 (0)
我要發表