陸羽仁周記
陸羽仁周記
陸羽仁周記

堅叔沽貨

2016/09/19 08:42:01 網誌分類: 經濟
19 Sep
        聯儲局議息前,官員實行放鷹,令港股上周轉向,急插後連跌三日,直至上周四過中秋前才回升,重上23300或20天線(23247)。全個星期恒指累積下跌764點;國指累積下滑462點。雖然夜期收市高水,但跟住周五美股三大指數周五齊下跌,杜指收市報18123點,跌88點,納斯達克指數收市報5244點,跌5點,標普500指數收市報2139點,跌8點。

        恒指連跌三日後反彈,若然累積嘅升幅比,調整唔係小兒科,?家好多股份同低位比仲係有唔少進帳,所以都見到有大戶或特別人士沽貨。中環茶友話,呢排樓市升溫,新盤排緊隊上,二手樓又話重上高位,但同時有啲樓市叔父就沽地產股。茶友所講嘅,就係會德豐副主席,人稱梁志堅嘅堅叔。上個星期,佢再披露沽咗25萬股會德豐股份,套現咗成千萬,佢哋個動作自然令人聯想佢係咪覺得地產股短期已經到價呢?

        趁會德豐彈足七成減持

        堅叔喺地產界係重量級人物,縱橫樓市幾十年,本來佢幫新世界地產主席鄭裕彤,已經去到接近古稀之年,大家估佢會退休安享晚年,點知佢跳槽過咗會德豐,佢大搞特搞,不斷投地。本來,將軍澳最大地主係新鴻基,但堅叔入去後勇字當頭,連奪多幅地皮,從後趕上,成為另一個大地主。會德豐以前土地儲備唔多,但搵咗堅叔後就不斷入貨,呢幾年賣樓都多咗。有人話佢同吳光正個仔一老一少拍住上,成為本地最勇嘅財團。會德豐呢個進取策略,至今為止都係無錯,因為樓價係高位始終唔肯跌落嚟,夠膽買地者先至有貨賣,應咗一句狹路相逢勇者勝。

        由於會德豐咁進取,過去兩個月股市同樓市反彈,會德豐就彈力十足,股價由低位27元起步,一直剷上47.8元,足夠升咗近七成,佢升咗咁多,唔怪得做地產咁勇嘅堅叔都要收割食胡。今次已經唔係堅叔第一次食胡,之前佢已經沽過貨,只係見個價無落,佢又再嚟沽吓,?家堅叔仲有0.27﹪嘅股權喺手,足夠慢慢食胡。

        財務總監都食胡

        除咗堅叔外,會德豐嘅財務總監徐耀祥更喺43.8元已經沽咗啲貨。同樣地,徐耀祥手頭仲有不少股份,?家只係食咗部份胡。會德豐高層?家沽貨,未必代表隻股或個市即係冧,皆因股市唔係偏高就係偏低,有時就算行內人覺得沽得過,都唔代表個價即刻會跌。不過,咁至少就代表咗從識做地產同識計數嘅人眼中,地產股嘅價值已差不多有合理嘅反映,值得考慮袋番啲真銀先。

        除咗堅叔外,另一間有大戶沽貨嘅係彩星玩具(869),據港交所資料披露,在9月8日美國資本集團(TheCapitalGroupCompanies,Inc.)沽清8129.2萬股彩星,每股平均價1.14元,持股量由6.7%降至0%。係美國資本狂沽下,彩星股價插至今年新低,喺佢沽完後就反彈收番1.2元,但個價都係好殘。

        彩星主要經營忍者龜玩具,呢幾年高價去過4元樓上。今年佢有新戲上演,股價開畫前一度炒上2元,可惜套戲票房唔係幾得,股價隨之急插,美國資本係咁沽得咁急,好明顯係唔睇好佢嘅前景。

        大戶清倉狂質彩星

        從經營角度睇,?家超級英雄電影成為荷里活電影主流之餘,投入嘅資本愈嚟愈高,咁令到忍者龜系列受到嘅競爭不斷加劇,打擊佢長遠前景,而且有茶友家有小朋友,佢嘅評語係忍者龜嘅玩具設計比較傳統,同星戰或者英雄聯盟嘅玩具比吸引力弱咗啲,所以未來可能要考慮點樣強化番呢樣核心生意。不過,從投資角度,彩星呢間公司無負債,而且忍者龜始終有一定商業價值。大基金沽貨講策略,要清倉就唔會計較平貴,俾佢咁質完一輪,可能股價見咗底都未定。

        街坊買位有折頭嘉里物流新招食肥肉

        想香港地少人多,唔止買樓安居唔易,就算身後要搵個安身之所,價錢一啲都唔平。最近做開運輸生意嘅嘉里物流(636)想將柴灣個倉改做私人骨灰龕,仲掟咗條新橋,畀附近居民可以用折扣價買龕位,呢招若然使得,計劃可以過關,咁佢就倉地變寶地,有得執番一大筆。

        立法會選舉剛剛過咗,政治環境平靜番啲,嘉里物流上個星期就再推動把柴灣的貨倉改建為港島紀念中心項目,同時提出三項新招。嘉里物流總裁馬榮楷早前透露,公司再向城市規劃委員會遞交補充文件,落實了三項社區措施,顯然是針對區內人士加強游說。這三招中,最特別是明言港島紀念中心將會預留一萬個骨灰位,以七折發售骨灰位予中心一公里範圍內的居民;同時會將稅前利潤所得的一成,捐贈予社區和慈善團體,當中約一半會特別預留予中心附近的社區;還有一招就是交通措施,將於春秋二祭提供來往中心的免費定期穿梭渡輪服務,以減輕對附近陸路交通之負荷。

        王國興選舉失意更有火

        骨灰龕有需求,但最慘居民實反對,區議會又惡,就算政府項目都唔係咁易搞掂。私人項目就更加難,除咗在設計上盡量要減低厭惡性,大家都會諗你起龕場咁發,點解我要益你先?所以想街坊贊成,最實際的方法,就是派錢補償。嘉里的方案多少含有這個味道,對於區內的中下階層,新方案至少提供了具體補償,就算不能令居民贊成,至少減少了反對的力度。有中環茶友話,若然呢個權利可以發張證明書,仲可以轉讓,咁將來龕位升值,居民可以賣出去套現,相信咁仲有吸引力喎。

        不過,嘉里物流呢個計劃係區議會,都有小小反對聲音,聽聞係來自愛國陣營嘅組織好似工聯會咁。工聯會上任立法會議員王國興今屆轉戰超級區議會,最後卻下咗馬,喺咁嘅情況下佢會唔會更加大力去幫街坊出聲反對,就成為變數,所以嘉里物流雖然有好橋,但食唔食到肥肉仲係要睇過至知。

        陸羽仁

        
回應 (0)
我要發表
user

網誌分類