日本沖繩手信

姪女上星期日從美回港，祇逗留兩天便飛日本沖繩，出席上海舊同事的婚禮。

她回港那天，我問她準備好「飲衫」未？佢話新娘子早兩天才告知要穿藍色衣裳。我問：你做伴娘/姊妹咩？

姪女：唔係呀！係所有出席嘉賓都要穿藍色服飾呀。

我：吓！咁遲至通知，係我就唔去咯。佢丈夫係日本人？藍色代表祝福？

姪女：唔係。依家國內人好鍾意去沖繩攪婚禮，佢地認為果邊啲教堂好浪漫喎！(大家如果有睇「巨輪」頭果幾集就明架啦！自從果位仁姊出現後，套劇就唔駛睇啦)

我：吓！人家老遠搭飛機出席婚禮，仲要限住人穿咩嘢，係咪有點那個？

姪女：最弊我三月離職前應承左佢，佢依家先講呢樣嘢！

唉！依家啲人，永遠唔會替別人諗吓架！

姪女去得沖繩，梗係順便玩幾日。佢上星期四晚返港，第二朝飛去東京大阪玩一個星期至經港返美。雖然祇係去左幾日沖繩，都買左以下手信俾我：

由上至下，由左至右：雪鹽糖、雪鹽(分煮肉/煮菜用)、苦瓜面膜、好似「曲奇」咁嘅嘢？花生豆腐？苦瓜茶、黑糖年輪蛋糕

據姪女講：沖繩馳名黑糖、雪鹽、涼瓜同紫芋(有睇「巨輪」沖繩旅遊特輯嘅就一清二楚)。所以上述食得嘅嘢都離唔開黑糖同雪鹽！

雖然我地煮餸除左落鹽，都會落少許糖吊吓味，但係你唔會覺得果碟餸係甜嘅(上海菜偏甜例外)；所以，糖同鹽嘅混合品又真係...

黑糖雪鹽糖：明明係糖嚟，但係又咸咸地，我覺得怪怪地囉！

一包兩樽嘅雪鹽：姪女話左邊係煮菜用、右邊係煮肉用。我唔識日文、佢都唔識，佢會唔會記錯呢？一於做「神農氏」嘗百草，睇吓有咩嘢分別---除左粗粒同幼粒外，我試唔倒有咩嘢唔同！

苦瓜面膜，用左會唔會變苦瓜乾呢？我見膠盒內有五包，問姪女，何解咁重？原來每包內有7片，即35片！嘩，咁真係要日日敷至掂！理論上，苦瓜面膜應該係暗瘡皮膚用，我呢個年紀，祇會出明瘡！

粉藍色果盒，入面有三包似係「曲奇」嘅嘢，原來係蛋白做，應該算係糖果嚟；食落口感有啲似「馬卡龍」，一陣風咁，食一包都唔覺飽！三種味：黑糖、紫芋同雪鹽---

黑糖好甜、雪鹽又咸又酸，最正常口味係紫芋。

綠色盒苦瓜茶試左一包，據講「苦瓜茶」適合糖尿病人喎！咁正常人偶然飲吓都無妨嘅。冇咩苦味，可能沖繩涼瓜係冇咁苦嘅。

花生豆腐：隔離果盒，一盒有三個狀似「布甸」、又似「杏仁豆腐」嘅嘢，姪女話係咸架！據講佢睇落似「杏仁豆腐」，其實食落有花生味！咁咪即係食份子料理---你以為係豆腐、原來係花生！佢千叮萬囑留番一個等佢返嚟食！我留番兩個俾佢--都唔好食：煙煙靱靱，無喱味道(我都唔覺得有花生味，即使加左包味似豉油嘅醬汁)！

最好食都係呢盒「年輪蛋糕」，得十日保鮮期咋，梗係拿拿林食啦！雖然我都係覺得甜左少少，因為外層圍了一層薄薄的黑糖，脆脆地，但係相對起其他食物，佢算係好食！

人都一樣啫：有個衰人響你隔離，你咪變成好人囉！有個大老倌企響你隔離，你咪變左「梅香」囉(唔係咸魚)...哈哈...哈哈....呵哈哈哈.....

日本嘢仲包裝，好唔好食真係見人見智；熟悉我嘅人都知我食嘢唔揀擇---當然響有得揀嘅情況下，揀自己覺得好食嘅嘢！如果走難，食樹皮我都冇所謂架，馬死落地行啫！

我每種食物都留番少少，等姪女返嚟俾佢試，我會好坦白咁講我嘅感覺。喂！唔駛錢送俾你都仲阿之阿左，你咁煩架！親人上頭，更加冇必要講假話啦：當然可能佢覺得好食都未定，咁咪俾佢試吓，再交流吓意見囉！我一向做人嘅原則係：Who call who eat！用於飲中式早茶，咪係邊個叫、當食到尾仲剩番嘅時候，叫個位咪負責清左佢囉；同一原理，咪係who buy who eat囉--邊個買、邊個食晒佢！呢啲叫做責任負責制。

呢個制度從何而來？話說我未退休前，習慣過時過節請同事食中午飯(一般係飲茶)；負責叫嘢食嘅同事每次圈點心，便以人頭計，但係有啲食物唔係每個人都食，結果往往係剩左好多食物！所以我落左呢個柯打。我唔係介意俾錢，但原則係唔好浪費！食幾多叫幾多，你食得晒嘅叫幾多都冇問題。