紅磡新澳咖啡餐室
姪女怱怱在港幾天,我同佢食左兩次早餐,兩次都係響「新澳」。此店開左無幾耐,雖然我經常行過,但係無諗過光顧!何解?
可能因為依家食肆要劃分吸煙區與非吸煙區。酒樓地方大,當然冇問題;但一般小店,好難再分,所以依家食肆全是非吸煙區,煙民惟有走出食肆門外,呼吸佢地嘅新鮮空氣!
此店可能想遷就食客,於是在門外設左兩張梗檯,為吸煙客而設。但我每次午飯時行過,就見門外兩檯吸煙客高談闊論,我真係唔想行入去!哼,人地食煙關你鬼事呀?發哥話齋:「大聲唔代表我冇禮貌!」不過,此店大門唔起眼,加埋呢兩張檯,就更加唔想進內。
第一次入去係因為我告知姪女,樓下開左間茶餐廳,所以佢想去試吓;第二次係因為佢果朝食完早餐,便要拎行理去機場,無謂兩頭走,咪去最近果間囉!早上客人唔多,門外亦無人坐,所以感覺好啲。
睇吓餐牌:早餐價錢較隔離左右嘅茶餐廳貴五至十蚊,亦較黃埔花園果間「一品蜢蟻」(正式餐廳)貴兩至四蚊。姪女話佢裝修好有懷舊Feel,貴啲都值得!食肆最緊要唔係食物質素咩?我點解要幫佢俾裝修費?
午餐同晚餐嘅價錢與隔離間「皇后冰室」差不多,不過呢間服務好好多!
係咪有啲如置身馬路嘅感覺?
其實祇是窄窄的位置,虧佢諗得到!
姪女食嘅早餐:餐肉一叮、煎雙蛋、多士、凍好立克---咁就四十幾蚊!原本個餐$38, 一叮加幾蚊、凍飲又加幾蚊。
為左要證實貴幾蚊嘅一叮麵係咪有分別,我地叫一個普通公仔麵---真係有分別架:
第一次去果次我叫左麥皮餐,但係食完果件「好多事」同咁大份蛋都食唔落碟麥皮咯!姪女與我都有同感:貴幾蚊唔係問題,問題係份量太大我地都食唔落;當然每個人胃納不同!那麼,是否可以考慮提供輕量級嘅早餐俾人選擇呢?兩間「大」記都有啦!
至於食物質素:一位疑似老板嘅人走過來問我們覺得食物如何?
響人地主場,難道話人地啲嘢唔好食咩?
不過,真心話:呢度嘅麥皮與附近幾間茶餐廳比較,係最好嘅;炒蛋與「澳洲牛奶公司」比較差左少少、同「翠華」差不多;餐肉冇咩嘢特別(分別係用左邊個牌子嘅罐頭午餐肉啫)、奶茶亦冇咩嘢特別(特別細杯囉!依家唔少茶餐廳都用細杯,減輕成本)....咁咪正所謂咸魚青菜、各有所愛囉!我就寧願佢用大杯盛奶茶,減少食物份量。
貴過食個午餐!
一個普普通通的早餐都咁貴,銀紙愈來愈唔見使。