錢國偉執導、黃永峰監製的動作笑片《辣警霸王花》，將於下月13日上映，片中新一代霸王花岑麗香、鄭欣宜、何佩瑜、崔碧珈及李元玲等，為任務失敗的前輩復仇，個個上山下海跳樓等乜都做齊，瞓身賣命！索媽咪楊思琦，在片中大膽以三點式示人。處女躍身大銀幕的岑麗香為孭飛電影，迫出鬥志及膽量。特訓逾20名靚女飛虎上場的錢導，就激讚班靚女：「班女仔好捱得，全部有資格做打女！如果有女版《殺破狼》，可以諗吓㗎！」 主持:黃柏高
統籌:林永匡
攝影:李維隆、謝民光
採訪:林書鉉
場地:MaisonEight
錢國偉（Wilson）玩Gimmick有一手，睇準動作片復興，即睇中八十年代惠英紅、吳君如等主演的電影《霸王花》，誓要打造一部以全女班為主的搞笑動作片。揀人眼光獨到的Wilson，馬上找來二十多位靚女演特警。早前，劇組揼本遠赴馬來西亞實地拍攝兩個月，我前往當地探班，眼見班女演員毫不錫身，睇到人心痛。
《辣》片內容主要描述這班特警新丁，為20年前任務失敗的霸王花復仇，所以電影由扮演上一代的霸王花包括鄧麗欣（Stephy）、楊思琦、JessicaC.和陳嘉桓等，在泰國泳池邊性感「放蛇」掀起序幕。錢導：「同時要照顧二十幾個女演員，都幾困難，但合作好開心嘅。班女仔好捱得，動作武打場面都算密集，但她們全部親身上陣，不時有流血、跌傷、骨折等，外景場地又曬又熱，日日都有三兩個話唔舒服要Call白車。有人問『欣宜咁有份量都入選？』，其實佢飾演車隊嘅機械天才，亦係負責發放笑料，角色好重要。」
思琦以為「斷手指」
38歲的楊思琦在片中大晒三點式，她感謝導演畀機會她與一班後生女同場比併，思琦說：「估唔到自己做咗媽咪後，都keep到有腹肌。好開心自己都好快應付到一連串動作戲，其中要在5層樓高跌落嚟，又有好多爆破場面，要執生。最難忘係同Stephy的動作戲最講求默契，爆炸嘅同時，我又要揸槍逃命，不慎夾傷手指，嗰一刻手指無晒知覺，以為斷咗呀！哈哈！」
香香膝撞大石
片中飾演陣亡思琦妹乖女的岑麗香，為代母復仇加入女特警。首度躍身大銀幕就要打打殺殺的香香說，「以前演嘅角色，都係被保護、乖乖女嘅，今次完全唔同，要好硬淨。拍攝前，跟黑哥（武指）爬山跑步游水，練好體能打底。試過在沙灘拍攝時，撞到嚿大石跌倒，搞到入醫院，慶幸照X光後無大礙。成日去睇跌打同按摩，最痛苦喺肌肉痠痛。不過導演好好，有次我膝頭瘀晒，Wilson將佢罐冰凍可樂畀我敷膝頭，真係好窩心。」身體雖然受傷，但香香笑說愛上揸槍，她說：「開真槍實彈（粉彈）時，原來係一種發洩。而拍呢部戲的最大得著，就係膽量大咗，可以試唔同嘅嘢，同啲女仔相處又好開心，好滿足。」弱不禁風的靚女，苦練多月化身鋼鐵打女，咁瞓身演出，大家豈能錯過！ | 
