信者得救
2016/09/26 10:14:15 網誌分類: 經濟
友邦騰訊股價靚仔
港股收市後，美股上周五全線下跌。杜指收市報18261點，跌131點。納斯達克指數收市報5305點，跌33點。標普500指數收市報2164點，跌12點。
上個星期有兩隻股最威水，一隻係保險股友邦(1299)收造51.8元；另一隻騰訊(700)創上市新高，高見220.8元，收漲1.68%造218.2元。有中環茶友話，而家香港無乜生意好做，保險算係少有好做嘅行業啦，所以友邦走勢靚仔可以理解。至於騰訊升不停，就正如我所講，而家外圍炒科網股方興未艾，騰訊喺內地鮮逢敵手，外資入唔到內地科網市場，揸重騰訊都可以當係替代品。
臉書高估廣告時間
科網股?家估值高，尤其係龍頭，但茶友坦言，佢哋嘅價值四個字可以形容，就係信者得救。好似《華爾街日報》日前就引述消息話，社交平台臉書(facebook)高估網民收看臉書平台視像廣告時間，問題持續兩年。
根據報道嘅講法，臉書數周前在其「AdvertiserHelpCenter」貼文公開事件，指用戶平均收看視像時間被人為地誇大，主因是有關數據僅計算超過3秒鐘的觀看次數，聲稱公司已引入新計算方式以解決問題。按照廣告代理PublicisMedia給予客戶的信件，指稱獲臉書通知，早前的計算方式令收看視像時間被高估六至八成。
?家好多廣告公司同客戶落廣告到社媒，講法係唔理效果點都好，至少可以收到報告，知道效果，好多新廣告人好多都BUY呢一套，但呢啲報告後來俾人發覺有吹水成份，又或者各有不同計法。
不過，呢排科網股係外圍炒作氣氛同消息都多。社交網站twitter股價上周爆升，有報道指該公司已接獲收購建議。twitter近年備受競爭對手壓力，賣盤似乎係唯一選擇。茶友話，同臉書、twitter比較，騰訊至少估值平啲，加上有收入嘅業務比佢多，貨比貨下，你係基金又會點揀呢？
大股升勢側埋幾隻，股仔則跟消息炒作，若然撞中都幾和味。丹楓(271)獲天安(028)入股36%，丹楓復牌後升11.3%報2.66元，天安無升跌報4.19元。丹楓本身有唔少資產，但控股權唔係咁穩固，?家引入天安作為主要股東，股價即時爆上。理論上股權無咗爭奪嘅誘因，應該少咗刺激性，所以短期不妨睇吓有無人出嚟挑戰天安嘅地位。
工業股又有爆冷派彩
另一隻有派彩嘅冷門股係興發鋁業(098)，公司宣佈擬私有化，復牌後升17.51%報3.49元。興發上市8年，主要從事製造及銷售用作建築及工業材料之鋁型材。公司上個月公佈，截至今年6月底止中期業績，股東應佔溢利為1.35億元人民幣，同比增幅18.5%。每股基本盈利0.3239元人民幣。不派中期股息。鋁業係內地增長放緩下疲乏咗幾年，但最近因為供求改善，所以市場環境好咗。興發中期業績回升，反映公司已由低谷走出嚟。由於佢?家只有4.5倍市盈率，市值14億元左右，大股東趁平私有化。內地經濟差，好多循環性股份跌到好殘，一旦大環境改善，股價就變得有吸引力，但發掘呢類股份要好有心機，同埋仲要用唔等使嘅閒錢先好。
銀座商廈紛落成銅鑼灣食肆唔易做
香港做食肆一向競爭激烈，走大眾化市場要價廉物美，中高檔就要花不少心思，在包裝細節上都要做足工夫。最近銅鑼灣少咗人流，但後街就有唔少銀座式商廈落成，搞到餐廳數量大增，有茶友最近試過一間新近開業嘅日本菜，由於樓上都有唔少同業，所以搶客鬥到開巷，在配料上都搞了很多細節。
茶友當日試嘅套餐，主要有壽司同天婦羅有近六道菜，試了不下十款食材的壽司，再加海膽天婦羅。由壽司食材繁多，每都不同，每道菜有兩、三款，所以必須細味試真。通常食日本菜，都會有酸薑片伴碟，用來清理吃完不同菜式的餘韻，再品嚐下道菜的精菜。該店上菜除了安排客人每道菜由淡至濃進食，還預備了不同的伴碟清口，像吃完第一道菜的蝦和海蜇，第二道菜就會先吃一粒鮮楊梅。
幾道菜式中，較特別是拖羅，這道主菜的拖羅腩件頭夠份量，一看已是油份十足，伴碟用咗較少見的仙人掌。據介紹仙人掌味道是微酸，但入口感覺是外層薄脆，汁多而淡，有點像不甜的提子。吃過仙人掌後，再用紫菜包着大塊拖羅，呢個拖羅餐唔使一千銀，雖然價碼唔平，但單係件拖羅，好市時真係夠膽收你3、400銀一件。
大款飯堂配合財技
茶友話，佢早排試過樓上有間做鐵板燒嘅日本菜，除咗食材，間舖最大賣點係貴賓廳對正馬場，聽講間舖老闆係內地大款，佢係香港專搞財技，已經收咗幾間上市公司，呢個飯堂就係專用嚟應酬，咁樣做生意自然唔使好似佢試菜呢間做到咁身水身汗。
陸羽仁
回應 (0)
我要發表