紅磡牛涮鍋(二)

2016/09/27 11:32:33 網誌分類: 講飲講食
27 Sep

姪女剛從東京/大阪旅遊回港,大約逗留三個星期便回美。講開又講,尋日同佢行Aeon Style(前吉之島),發覺佢響沖繩買俾我嘅手信全部都有得賣,價錢亦相差無幾,激死(佢)!

黃埔地鐵十月廿三日通車,呢區最大果個出口就響我屋企附近,睇落好grand呀!到時由九龍各區嚟黃埔真係話咁快就到,第日搭車嚟黃埔食嘢都好方便。尋晚我地去牛涮鍋食九十分鐘牛肉放題。今次係第二次去,當然醒左少少啦。首先問吓侍應會員有咩嘢優惠先(上次光顧時入左會)?獲告之:

除會員享有的九折優惠外,因為上次光顧儲有積分,可以全單再減五十蚊 、或免費獲贈海鮮盛盒一份(原價$59)、或柯打其中一款牛肉,店鋪自動upgrade(升值)高一層次(即係貴啲)的牛肉一盒。

我同姪女傾過,最終決定要海鮮盛盒。

 

上次唔覺,今次果九十分鐘好似貶吓眼就到---如果祇顧食、唔傾計,九十分鐘當然冇問題啦。我地各自食左兩盒牛肉、一盒豬肉(上次經驗覺得雞肉相對嚟講,冇咁好食。所以落柯打時講左唔要雞肉)、一盒牛肩肉(餐牌講明可以柯打唔同部位嘅牛肉),我地食食吓先諗起,於是請侍應推介,佢建議我地叫牛肩肉。試後感:牛肩肉入口較「鞋」,但牛味較濃!

我地食果種牛肉論價錢係第二貴。食食吓隔離檯有一男一女入座(果位男士睇落有七十歲),佢地叫左最貴果隻,後來我地發覺原來此店有長者優惠架:價錢係減八十至一百蚊(視乎叫邊種牛肉)。姪女話下次等我攞左長者咭至嚟食喎!哈哈....

上面顯示有多種湯底選擇,我地叫左蕃茄湯同青檸湯。個人覺得青檸湯較好味。

如果冇特別聲明,會俾呢種牛肉---一般人都會接受,肉質較稔滑;稍後叫嘅牛肩肉,唔記得影相!

豬肉:相比下當然係牛肉惹味啲啦!如果特別喜歡食牛肉嘅,咪索性唔要豬肉囉!

我地胃納細,所以Bar檯任食嘅嘢,我地祇係食左好少----粟米同墨魚丸好食!

雪糕似富豪雪糕車果啲,汽水果汁任飲。

 埋單折後每位二百幾蚊。

回應 (0)
我要發表
user