新達廣場北京人家

星期五晚幾位姊妹（當然吾係親嘅啦）相約響大埔墟新達廣場「北京人家」晚飯，平時我地多數會響酒店內嘅酒樓用餐，今次去到咁遠，主要係C校監午間響大埔出席典禮，我地移船就磡方便佢啫。

我到達方知，原來「北京人家」屬美心集團，隔鄰便是同一集團的「潮江春」，據L總監講，兩邊食物可以撈亂叫。

我地約左傍晚六點半，我例牌早到；果陣人客唔多，我被安排進了一個廳房，裡面有十張八張大小不同的檯，但檯與檯之間非常迫夾，壓迫感重。其後姊姊們續陸抵達，個個都係講果句：點解咁迫嘅？

我：「可能係小周末，客多！所以排得咁密掛。講真，我地又唔可以將佢同酒店裡面嘅酒樓級數比較嘅：價錢都差好多啦！

隨後有兩批女士入左嚟，佢地一入房門口便有人大叫(我地都唔知發生咩嘢事)，跟住其他人又大叫(我地都係唔知發生咩嘢事)，可能朋友聚舊，好耐冇見所以咁興奮掛！但係佢地坐落之後一樣高談闊論，旁若無人，我地張係細檯，咁近距離都無法傾談！L總監建議我地轉檯。

我：「呢間已經係廳房，難道大堂會靜啲？」

L總監出去打個白鴿轉之後告知：大堂有張檯，應該靜啲。

於是我地同侍應講要轉檯。侍應首先表示唔想我地轉檯，但係我地堅持，佢於是同我地講：「好啦！你地自己拎埋啲杯杯碟碟茶壺過去喎。」咁係咩嘢意思？係咪即係：我地酒樓每位客人祇提供杯碟一份，你搬檯便要自己搬過去，我地唔會因為你搬檯而洗多幾套杯碟！

我份人都冇咩嘢所謂，乖乖地咁拎左自己份杯碟過去；當時大堂冇咩嘢人，檯與檯之間亦冇咩空間。

我：「一陣坐滿人咪一樣咁嘈！」最後我地決定唔搬，還原基本步！

今日要講嘅同食物無關！美心集團出品，一向不過不失：冇驚喜、亦冇驚嚇。今期用匯豐咭食一個四人指定套餐六折，我地五個人叫了這個套餐加個沙鍋魚頭。

用餐時，頭盆是麻醬粉皮、醉雞，跟著是片皮鴨。食完麻醬粉皮，隻碟一定唔會乾淨，我地於是叫侍應換過啲乾淨碟包片皮鴨；侍應好唔樂意咁替我們更換。

其後食花膠羹，侍應預告：你地食完羹用番呢隻碗啦！呢隻乾淨過你地原先用緊果隻架。

我明白依家請洗碗碟阿姊好難，但係除非間酒樓改用紙杯碟啫，咁樣做法，間酒樓咪越做越cheap---好似茶餐廳啫！

食完個餐剩左少少片皮鴨，律師叫人打包拎走。侍應告知：「膠盒一蚊、膠袋又一蚊！」咁都要架，肉隨砧板上喎---膠袋唔係五毫子咩？

果個膠盒直徑五吋，果個膠袋剛剛入得落個膠盒。C校監：「吓！咁「大」個膠袋？」

侍應：「我地個膠矮嘅尺寸係就住膠盒嘅大小做架！」

L總監：「一蚊個膠袋，拎返屋企都冇用！」平日我地大家習慣留番啲大膠袋做垃圾袋，咁先至叫做循環再用，環保吖馬！

諗諗吓，膠袋徵費同經濟不景有冇關呢？以我嚟講，徵收膠袋費後，我真係買少左嘢---我隨身攜帶嘅環保袋裝得幾多、我咪買幾多囉！要俾錢嘅嘢我唔做架。

食物入左袋後，律師問：「邊個拎走？」

我：「吓！你叫人打包嘅，唔係你要咩？我一向都冇打包嘅習慣喎！」

跟住你推我讓，最終L總監拎返屋企俾姊姊食。

我：「第日唔係諗住要嘅就唔好叫人打包啦！咁就兩個大餅咯。」

死啦！美心集團(我估係成個集團)咁樣做法，我都接受唔倒囉！