黃埔「煌府一號」

前日星期日，一早同姪女食左個「麥記」早餐，佢當時經已話唔多飽(鬼叫佢淨係食個「豬柳漢堡咩)，所以中午時份佢話想飲茶食少少嘢(其實我食唔食都得)，我問佢想去邊間？

佢問：「邊度有綿花雞食？」

我：「吓！咁傳統？咁不如去「煌府一號」啦！新式同高檔酒樓，點心多是綽頭嘢，冇呢啲舊式點心。」其實我唔係太喜歡飲茶，所以我祇係憑經驗咁講。

姪女：「你附近間「點點心」(點心專門店)會唔會有？價錢如何？」

我：「果間食物質素好一般，我唔肯定佢有冇「綿花雞」(我祇去過兩次)，但此類點心專門店既收幾蚊茶錢，茶的品種又冇得選擇，無謂去啦！至於價錢，相差唔遠。」

「煌府一號」我同「哎呀大仔」約大半年前去過一次，我地上午十一點坐到下午三點(閒日，幫佢撐場，算唔話得啦)，埋單祇係七十幾蚊！我地都覺得好抵，食物質素唔係特別好、亦唔算差！勝在冷氣夠、光猛，寬敞，坐得舒服！

我地當日一點鐘去到，雖然滿座，但不用等便剛有張細檯，姪女認為坐得幾舒服---依家好多酒樓背對背，傾計都傾唔倒！

我原本諗住暏一鋪：我估佢有「綿花雞」啫，原來真係有，仲有「山竹牛肉」添：唔駛食，睇個賣相都知得啦！

仲有傳統「蝦腸」、「千層糕」：

最精彩都係呢碟：「上湯雲耳雜菇」勝在一滴油都冇，食倒不同菜嘅甜味！

我地雖然思想傳統，但係都接受新事物架：「黑松露飽」淨係個造型都幾殺食，裡面啲餡都係菇嚟。

埋單一百九十幾蚊。食物質素，我覺得好過上一次喎，唔知係咪轉左廚呢？