紅磡「林記小食」

阿Van掃街，真唔真呀？好奇咩？以前我負責「大磡村」清拆時都經常趁住未有人識我，去大磡村食「車仔麵」啦；後來俾人認出我先收歛左，轉左入去街坊會食咋！

依家即使我買左街頭小食，都會「打包」返屋企食。尋日姪女挑起條筋(其實佢講過好多次想食，我亦帶過佢去呢間鋪嘅位置，但係此店下午才開鋪，所以次次去都係摸門釘)，話要去食！

去到果陣下午三點，門口排長龍。通常要排隊嘅嘢都唔好預我，今次又要破例。我問姪女係咪買番屋企食，佢答：「掃街？梗係要企響街度食啦！通常係踎響度食(踎街？)」好在旁邊個商場有空間可以企響度食。

賣相唔錯：

我食唔辣嘅魚旦(冇食腸粉，食唔落)，呢碟係姪女食嘅：辣魚旦加混醬腸粉！佢讚不絕口，話啲醬混得好好味、腸粉亦夠滑！好食過中午酒樓果啲腸粉。我食唔辣嘅，咁先試倒原味吖馬：魚旦好有魚味！唔好覺得我講緊廢話呀---依家雞有雞味、肉有肉味、魚有魚味...經已好奢侈架啦！

九蚊四條腸粉、七蚊一串魚旦，價錢一般，較「陳記」好食得多！