紅磡生記茶餐廳

此店稱茶餐廳，實則重點係食海鮮！咁算唔算係「掛羊頭、賣狗肉」呢吓？

最近「無線」個節目「區區開伙」續區介紹唔同嘅食肆，除左睇倒兩位主持好難睇嘅食相之外，響節目推介嘅食肆，我相信都會有一兩間係OK嘅。

講真吖！響街度咁多食肆，何解會推介某幾間？唔駛講大家都明啦。不過，我抱住嘅心態係：響節目度推介得嘅，即使唔算好食，都唔會難食掛！實情係：有啲真係好唔得！

姪女唔同，佢最喜歡睇飲食雜誌同嘗試佢地推介(特別係米芝蓮)果啲；今次回港，尚有幾天便返美，上星期日，大家去掃吓街，跟住晚飯佢想試吓「打冷」，最新一期KISS(新地雜誌附送)推介的「新忠記潮州打冷」。

我地果日中午飲茶，下午三時才掃過街；平時我五點幾食晚飯，那天真係食唔落！心諗：六點落去，咁早應該會有位掛。

誰料六時十五分去到經已全店滿座，要攞飛等位。姪女約左人睇戲，心急如焚，我建議轉去食蟹粥(因為六點鐘啲人入坐不久，有排等)----都係KISS推介，佢表示過想試，祇記得位置在老龍坑街，詳細地址不詳！我印象中，應該在「大酒店」附近。我住響呢區成廿年，過往因工作關係，經常要去「大酒店」，但係甚少在附近街道徘徊。如果我地一早打算去試蟹粥，出門前一定會查吓街道圖。

從「新忠記」往老龍坑街，沿內街行去經過唔少花店、長生店，對我來說，問題不大；但係姪女覺得有點陰森！原來標榜至「正」蟹粥此店近蕪湖街，基本上從蕪湖街入，便無需經過這些.....

我地入店時約六時三十分，店內祇有四位客人。全店大大小小都得六張檯，我地好彩，早一步所以還有檯；遲幾分鐘進來的客人，樓面位阿姊告知：全部檯已訂出，要進食便要預左要搬位(已訂坐者到達便要搬)，我見啲客人仍然接受(咁梗係佢地認為值得啦)。結果，果兩位女士搬完一次又一次；我心諗：再搬就要搬出門口坐！

此店看似家爺仔乸生意，樓面位阿姊都好有禮貌。祇因鋪細、人多，坐得真係唔舒服---想拎多張膠椅放隨身物品都唔得！

識我嘅人都知，我最討厭食粥！今次真係捨命陪姪女架咋。

我地叫左：

蜆蟹粥(例鍋)---人家名牌！唔食，真係俾人「眇」架：話你唔識食囉！我祇能夠講：啲粥好甜，姪女亦覺得好味！問我：我寧願原隻蒸蟹、蒸蜆食。依家得啲粥甜，蟹同蜆都冇咩味，有些蜆還有沙！

蒜茸蒸茄子：茄子蒸得唔夠熟，不過蒜茸汁調得唔錯。

蒜茸粉絲蒸扇貝：呢啲嘢最緊要食材新鮮啫，冇咩嘢特別！我好多時買嚟「自煮」，我買果啲扇貝厚肉得多！

粉皮蒸蠔(樓面推介)：粉皮包住蠔肉嚟蒸！創意我俾一百分，但係食味就一般--姪女寧願食炸蠔餅或蠔仔煎蛋呢類香口嘢。咁樣蒸最緊要蠔仔夠新鮮，否則好腥！我食左兩件，一件較腥，味道亦淡。

連一枝大啤，埋單四百個大洋。留意：樓面阿姊會叫你一次過落單，唔好分開叫。何解？咁仲唔明？

姪女晚上睇完戲回來，我地再次檢討(駛唔駛咁嚴重？)：佢仍然覺得果間店嘅位罝好陰森！去果陣得四位客人，佢心裡都有點怕(依家至夠膽講)！後來人山人海(好多人響外面等位)，佢先至冇咁驚。

我：「你肯定你見倒果啲係？」姪女：「係..係掛！」其實客人大部份係年青人，駛咩嘢驚吖！如果一個二個都係長者，咁就真係....

不過，姪女認為佢老豆(我阿哥)會有興趣試蟹粥。我咪建議佢下次有機會再去從蕪湖街果邊入，避開果啲？？店囉！而且，我相信以前此店客滿會在店外加檯，因為門外有一手推車放著十張八張摺檯。可能最近食環署捉得緊，才暫時收歛啫！

其實有心試食，最好揀閒日去試，留番假期響屋企「自煮」，無謂同人迫！