英國熱
2016/10/17 08:42:29 網誌分類: 經濟
美股尾市升幅收窄
港股收市後，美股高開，其後升幅收窄，美股三大指數稍升，杜指收市報18138點，升39點；納斯達克指數收市報5214點，升不足1點；標普500指數收市報2132點，升不足1點，反映投資者喺加息陰影下唔敢去咁勇。美股進入業績期，華爾街唔多唔少跟住業績炒一落。摩根大通和花旗集團上季公佈業績勝預期，令市場憧憬第3季美國上市公司業績期的表現；加上最新出爐的零售和通脹數據反映當前美國經濟擴張力度足以支持聯儲局在年底前加息，種種因素帶動美股氣氛稍好，杜指曾升超過150點。
上個星期，港交所（388）持續為深港通造勢，令股民產生一啲憧憬，但如果只係睇住呢個「好消息」，咁就俾淡友扑咗一棍好應。好似上星期四，港交所行政總裁李小加放料，表示深港通會優先考慮在周一開通，但「肯定不是11月中以前的星期一！」意味深港通極有可能在11月21日開通。不過，消息未有為港交所股價帶來太大刺激，股價跌完幾日之後只係彈番1.08%，收造205.4元。
港股呢一輪調整，觸發點之一係英鎊係首相文翠珊話唔排除硬脫歐後閃跌。英鎊匯價閃跌令全球資金避險，美匯指數應聲彈上，傳統智慧係美元強，港股弱，今次都唔例外。中環茶友話，新鐵娘子話係脫歐談判唔會特別照顧金融業，咁金融業就要畀番啲顏色大家睇吓，一隻「肥手指」督低英鎊匯價，都搞到英倫銀行有小小面青。雖然鎊匯偏軟有利出口同旅遊啫，但若然匯價急跌，英倫銀行有可能要被迫出來支持鎊價，一旦出現咁場面，央行都唔易搞㗎。
鎊匯急插樓價變相打折
鎊匯咁插法，中環茶友好多人又入市撈貨，皆因大家有係英國供樓，又有人供緊仔女係英國讀書，儼如一陣英國熱。佢哋有喺英國置業，而家雖然樓價跌咗，但好多人心態係趁低「加注」。佢哋嘅睇法係英國喺金融同法律基礎雄厚，脫歐之後長遠應該無事。英國樓升足二十年，而家樓價雖然無跌，但鎊價差不多插咗兩成，都係低買嘅機會。
中環茶友對鎊價咁有興趣，有機會同英資銀行嘅高層傾起，佢嘅睇法係鎊價今次一插試底，短期有可能反彈，明年大概會維持呢個水平，17年前後或者再試低啲，所以買鎊最好係低吸高沽，見佢插得平就入貨，見佢高就食胡。
銀行家一向做事講嘢都係「兜住蘿柚吊頸」，高層不忘補充，話而家呢個只係預期，英鎊匯價好睇政府點同歐盟斟數，若然真係硬脫歐，即係話完全脫離歐洲單一市場大家庭，咁鎊價肯定仲要大跌，若然係軟脫歐，特別係金融業若然減少衝擊，咁情況會好得多。未來談判多數係先難後易，大家開初多數起晒膀，來年三月開始啟動脫歐後，應該不乏機會炒上落喎。
留意渣打會否派息
問開英鎊，自然要問吓英資嘅銀行點睇，高層話匯控（005）終止咗漸進式嘅派息預測，睇番佢嘅生意，相信未來好難加到息，至於佢而家有回購支撐，唔加息都唔係問題，皆因佢而家嘅股息率都好高啦。至於渣打就要留意吓佢嘅新主席上場有乜搞作，渣打上任主席就風評麻麻，接任者似乎市場信心好啲，加上環球商品價格回穩，對佢一班主要做商品嘅客戶嚟講，環境應該好咗，渣打而家股本比率好高，所以要留意新主席上場會否回復派息。
趙樓神大學開TALK搞創投當回饋社會
社會而家潮流係乜，其一就係話創意囉。呢啲咁潮嘅嘢，長實樓神趙國雄都要講吓，佢仲自爆自己也投資了一些創投，支援年輕人創業，他們在大健康、航拍、水質處理等短期內很難賺錢的行業，作為對年輕人、對社會的支持。
上個星期，浸大前校長陳新滋同趙樓神齊齊上咗中山大學交流，大家都知佢讀過浸大，算得係該校得意門生，佢今次上去作主題演講。佢話，創業而家非常流行，從美國矽谷到英國，再到內地，有點想法的年輕人幾乎都在創業。最近和一些朋友聊天，都說現在招聘很困難。為甚麼呢？因為有本事的人都去創業了！
雖然佢係樓神，專管賣樓，但佢坦言不贊成大學生畢業後着急買房子，被房貸捆住自己，佢認為應該追隨自己的興趣，到香港、廣州、上海、蘇州、杭州，新加坡、甚至矽谷，去這些美好的城市多看看，去發掘先自己的潛能。一個人生存所需要的錢和空間是有限的，人活着最重要的是你能給周圍的人、給你的國家和城市帶來甚麼改變。
「一入創業深似海」
趙樓神話，自己非常贊成年輕人創業，但都要給大家澆點冷水：如果你沒有強大的Passion激情和夢想，沒有吃苦耐勞的思想準備，沒有改變周圍現狀的毅力，如果你以為可以在短時間之內成為一個名人，賺很多的錢，那你不適合創業。有沒有聽到這樣一句話：「一入創業深似海，從此快樂陌路人。」創業，意味着你一周7天、每天十幾個小時的工作時間，沒有娛樂，你要面對很多未知的困難，和前方一個又一個的坑。你做得不好，公司發展速度慢，你會很焦急；你做得好，公司發展迅速，你就要找團隊，很可能碰到不靠譜的人，付出成本，甚至遭遇背叛。如果你能夠頂得順呢啲考驗，先至好去創業，否則就不如學大多數人一樣，爭取入大機構做個打工仔嘞。
陸羽仁
回應 (0)
我要發表