港鐵黃埔站

紅磡區居民期待已久嘅觀塘延線，於上星期日正式通車，相信最開心莫過於黃埔區居民。理論上，我應該最開心，因為最大嘅出口響我附近，但又唔係直接響樓底---聽講樓底下係地鐵會好嘈！不過，我一向唔太喜歡乘搭地鐵，唔喜歡要上上落落；依家搭巴士既舒服、亦通常有位坐，何樂而不為？不過，有地鐵總好過冇，好似馬時亨話齋：多個選擇都好！

據講何文田站偏離該區屋苑，居民要乘搭地鐵，要行一段頗遠路程，所以即使設有何文田站，對當區居民來講不算方便。

上星期六此兩個港鐵站舉行開放日，供居民參觀。雖然近在咫尺，我冇去。既然第二日便通車，何必多此一舉？

此入口外一片空地，不知遲些會否加設坐椅，方便老人家坐立？對面嘅食肆給圍板遮蔽多時，總算是守得雲開；能否見月？咁就要睇吓佢地嘅食物質素咯！

遺憾嘅係黃埔站內兩邊月台並非打通，假如下雨，也不能通過港鐵站行過另一邊！我初時還以為呢個站會有個地下城，第日可以響下面「濕平」添！

朋友道賀：你間屋仔又升值不少了！

我：講真吖！我都唔想樓價係咁升。而且，要升的話，呢幾年都升左啦！好似股票咁，趁好消息出籠，好容易推低樓價！

地產代理點講：

「有代理指黃埔區住宅租金過去一個月升一成；有對正地鐵出口的食肆，近月業主加租逾5成至逾30多萬元，外圍舊區小店租金更升一倍至12萬元，惟後者未享鐵路人流已結業。商戶指有舊街已被發展商看中重建，住戶商戶隨時面對強拍命運。」

今早出旺角抽血，平日的會搭旺角小巴，預45分鐘，每次必早到；不過，落左車都要行幾個街口。今日試搭港鐵，理論上十五分鐘到油麻地，所以我預左半小時。結果：較預約時間遲左兩分鐘！

因為唔熟港鐵出口，響旺角站出錯左閘，行了不少寃枉路！不過，呢啲係適應問題，與港鐵無關！我唔會咩嘢都委過於人嘅。