自食其「餃」

2016/10/30 07:37:34 網誌分類: 生活
30 Oct

前日中學同學聚會。基本上,我地每次聚會都係竹戰加晚飯,今次因為有位移左民嘅同學還有兩天便回美,所以雖然唔齊人,都安排響同學家聚一聚,主人家建議「餃子宴」。

不過,人算不如天算:要回美的同學果朝早才告知,佢地兩夫婦食錯嘢,腸胃炎兼發燒,嚟唔倒!但係,果陣都萬事俱備咯,都要照去架!

約左上午十一時到太古城同學家,我當然係早到果個。原來同學祇叫「姊姊」切好晒啲料,買左餃子皮,其他如調味、包餃工作都未做!因為我唔食薑(我份人經已夠晒「薑」),所以朋友將肉料同齋料各分一份俾我,佢叫我自己調味、自己包、自己食喎!咁咪即係叫我自食其餃囉;佢仲要我包唔同款,以資識別喎!

圓形嘅餃子皮,可以點樣變呀?我咪將佢包成雲吞咁款囉(包雲吞用的是正方形的皮):

 

另一位同學整左兩味冷盆加料:麻醬青瓜同木耳。加埋主人家整左嘅鹽水雞翼,大家一齊開餐:

主人家好講求生活情趣,茶都沖左三款俾我地揀:薄荷金菊、鐵觀音同綠茶,每壺茶仲有保溫外罩!選擇唔多架啦:三款都有人揀!

 

呢個星期我好忙,否則我都會整啲食物拎去。不過,中午食嘢唔多,我地六個人夠食架啦;因為少左兩個人,有同學仲將未煮的餃子打包回家添!

回應 (1)
我要發表
2016/10/30 15:05:04 回覆

我家也經常包餃子,孫兒們自已包,我唔鍾意食。

user