陸羽仁周記
陸羽仁周記
陸羽仁周記

人仔要捱價

2016/10/31 08:41:56 網誌分類: 經濟
31 Oct
        港股上周結算前,出現四連跌,最後一個交易日,好友都放棄防守,指數一度跌逾二百點,收市雖然略為反彈,仍然要跌穿兩萬三千點。

        人民幣中間價上周跌穿6.78,市場擔心人民幣走勢續弱,本月期指上周五結算,恒指最多跌284點,低見22847點,尾市跌幅收窄報22954點,仍下挫177點;國企指數收報9515點,下滑93點,成交金額683.42億元。以全周計,恒指累積下跌420點;國指累積下滑171點。

        限銀聯卡買保險

        周五收市後,內地傳出限制用銀聯卡來港碌保險。呢個現象近月日益明顯,所以見到隧道口廣告牌,保險公司取代晒名牌成為最大客仔,本地保險股股價都係咁猛升。不過,上個星期睇到有周刊大字報道,陸羽仁已心諗掉忌,佢話到走資潮好似末日咁,內地部門睇到,你話敢唔敢唔做嘢先?可能周刊係想衰人仔搞吓局,但咁就隨時搞到香港班保險代理嘅荷包同公司股價啦。

        港股咁弱,一大理由係人民幣匯價偏軟。個多月前,滬港通相當活躍,唔少北水透過港股通南下買股,呢個月港股通數量急減,有中環茶友估計,可能係因為人民幣匯價下挫,為免影響信心,阿爺唔想俾人睇到咁多錢南下,而透過港股通買股的資金都識做,無謂公然走來買港股,令到北水減少,喺咁情況下,令到港股無力上升。

        唔習慣匯價有上落

        人仔上個星期滑落六年新低,而且低處未算低,令到投資者都好擔心,有啲人仲唱到低處未算低。陸羽仁有機會問大銀行家,究竟人仔咁跌法最後會點收科?大銀行家答案好簡單,要定啲喎。大銀行話要定,咁係乜意思呢?佢慢條斯理解釋,話匯價不外幾個因素影響,貨幣利息,市場供求同發鈔量,仲有就係實體經濟表現。

        佢話,?家全世界央行都係狂印鈔票,大家其實分別唔係咁大,至於供求,好多時受情緒同投資需求影響,市場點睇好影響短期表現,?家多人睇好美元,睇淡人仔,自然令佢匯價受到壓力。過去人仔息高、美元息低,今年起趨勢係美國加息、中國減息,咁自然令到人民幣匯價偏軟,從呢個角度睇,人仔雖然話由高位跌咗接近一成,但比起英鎊、歐羅,匯價唔係特別弱。港元同美元掛鈎,由於美元升值,其實好多人買外幣都要輸錢,只係大家習慣咗買人民幣必賺,心理上先覺得特別難受。

        大銀行家估明年見底

        佢又話,要預測佢兌港元表現,就要睇美元升跌周期。雖然美元?家強勢,但已升至近年高點,關鍵係未來仲有幾多水位。現時睇,美國未來有可能加多一、兩次息,咁就未必有力再上,強美元對美國的影響亦會否出現,如果從經濟周期睇,大陸經濟仲係調整緊,但調子唔係咁差,調整到明年可能差不多,加埋美國可能放緩,咁兩種貨幣嘅基本條件就會拉近。?家叫佢估,佢會估美元喺明年上半年有可能見頂,換言之,人仔匯價有可能見底。如果話兜底買人仔,暫時仲未係時候,但若然已經走避不及,而家係咪仲要加入拋售行列,就要自己諗吓喇。

        大銀行家講人仔講得咁淡定輕鬆,好大程度係佢自己都無乜貨,自然係講得輕鬆,若然自己有番咁上下人仔,見到佢日日插低啲,就點都有啲無癮,呢啲叫做針唔拮到肉唔知痛。不過,大銀行家至少俾咗個方向出嚟。按照佢咁講,如果而家手頭有人仔又唔想沽,咁就要預佢再跌啲,諗住博佢長線上番。港股喺人仔匯價因素拖累下,可能都會受壓,等匯價因素充份反映,所以無論係人仔定係股票,要入市就要預備捱先好郁手嘞。

        WINEANDDINE永遠有市場靚紅酒順氣化痰

        話咁快又係秋高氣爽好日子,中環茶友上個星期就變中環酒友,齊齊去吓係海港嘅美酒節。有茶友線路靈通,仲去埋夜晚嘅貴賓晚宴?。

        曾財爺變蜜糖兒

        今年嘅美酒節規模比去年又大咗,證明市道雖然一般,WINEANDDINE仍有市場。有份出席貴賓晚宴之茶友,話當晚見到唔少名人,最矚目當然係盛傳會出戰特首嘅財政司司長曾俊華,當晚記者見到佢好似蟻見蜜糖,成班湧埋去。諗唔到係傳媒散咗後,都有唔少賓客走埋去同佢影相,曾財長亦一貫隨和,係人走埋去SELFIE攞彩,佢都無任歡迎,可以估計如果阿爺一聲「你去馬啦!」咁就肯定佢會飛身出閘。

        曾財爺入唔入閘成中環最熱話題,佢受商界支持唔使講,關鍵只係阿爺點睇啫,佢而家上晒岸,如果無祝福,點解佢要出嚟搏命先?茶友笑言,上個星期賽馬,出現罕有意外,起跑閘機出現開閘時間不一嘅狀況,唔通係上天有啟示,特首選舉都係出閘時間唔一樣?有人就答咀話呢場賽事最後唔算數喎,咁即係出閘快都無用啦。

        講番當晚美食,一共有成六道菜,好多都係米芝蓮星級美食,一餐飯食了差不多十粒星落肚,而且道道菜都有紅、白酒匹配。

        茶友話,好菜不如好酒,當晚旅發局主席岳少私人擰咗兩支「默林」出來,開餐時已被人飲清,去到中段岳少再開咗兩枝靚酒,叫靚女公關勸飲,有老外即時不客氣走去斟番杯。老友見到都去試番兩啖,一入口同好似老陳皮入喉,順氣化痰,果然係正!

        陸羽仁

        
■港股上周結算前四連跌,收市雖然略為反彈,仍然要跌穿兩萬三千點。
■港股上周結算前四連跌,收市雖然略為反彈,仍然要跌穿兩萬三千點。
■人仔上星期滑落,而且低處未算低,令到投資者都好擔心。
■人仔上星期滑落,而且低處未算低,令到投資者都好擔心。
■十七公升的餐後甜酒。
■十七公升的餐後甜酒。
■呢味魚卷,五粒伴碟啫喱有五種味。
■呢味魚卷,五粒伴碟啫喱有五種味。
■田少滿場飛
■田少滿場飛
回應 (0)
我要發表
user

網誌分類