加辣DOUBLE SHOT
2016/11/07 08:41:57 網誌分類: 經濟
之後，美國公佈最新數據顯示，上月就業市道大致保持平穩，新增職位儘管低於9月向上修訂的數字，但仍錄得16萬份，失業率則再度跌破5%。至於聯儲局重視的工資升幅則見加快，顯然為儲局下月加息清除障礙。最新利率期貨顯示，聯儲局12月加息的機會接近80%。美股周五續跌。杜指收市報17888點，跌42點。外圍乏力，加上政府突然宣佈再重手加辣壓抑住宅樓價，估計周一港股開市會再受壓。
假日飲茶，茶友熱話離不開政治與經濟。講政治，兩名新進議員玩出火，引來阿爺釋法的雙輸場面，大家講起唔開心，真係講多無謂。美國佬就大選臨近，今個星期會衝向終點。本來共和黨候選人特朗普已經係一條鹹魚，但埋門佢嘅對手希拉莉嘅電郵門翻燒，令選情再變。茶友開局邊個會贏，不過，結果都係買希拉莉贏嘅多啲。
希拉莉勝出刺激有限
美國過去兩次大選，都係強弱懸殊之戰。奧巴馬先以CHANGE口號贏盡選民之心，繼而以強勢爭取連任，基本上無受乜挑戰。到咗呢次選舉，希拉莉同特朗普變咗海軍鬥水兵，有茶友坦言，?家希拉莉贏面較大，但諗起佢做總統都幾唔開胃。美國權威時事節目《六十分鐘時事雜誌》訪問咗多次顯示總統寶座最後誰屬嘅搖擺州份愛荷華，結果顯示希拉莉雖然輕微領先，但好多選民都話佢係大話精，同時認為佢嘅健康太差，睇完之後令人覺得今次係幾十年來，最差嘅總統人選決戰。
不過，華爾街顯然就支持希拉莉，有大行分析兩人當選不同結果，認為希拉莉獲勝股市會升，若然特朗普獲勝，避險嘅黃金就會升。先唔講特朗普若然獲勝，黃金係咪會升，但茶友就對希拉莉贏出總統大選，美股能否大升抱好懷疑嘅態度，佢嘅理據係美股而家一啲都唔平，以目前嘅估值，真係睇唔到希拉莉上台，有乜能力可以拉動到美國經濟大力向上嘞。
集中打擊住宅樓價
講完政治講經濟，單一話題係中資癲價搶地皮，搞到政府急急要加辣，嚟個DOUBLESHOT，大加住宅印花稅。呢次政府加辣，只係集中住宅，似乎係學精咗，因為之前佢出辣招，係所有物業都要收，結果資金無地方走，最後流番去最穩陣嘅中小型樓宇，谷到中小型樓宇猛飆，呢次佢唔郁寫字樓同商舖，至少令游資有啲地方去。畢道商業樓宇係做生意嘅人買，唔買可以租，住宅係民生啲，政治上最敏感。由於今次咁調整，相信反而對商廈同擁有呢類物業嘅股份有利。
上個星期啟德地皮開標後，造價比市值估計高咗八成，立即引起種種揣測，初期有人形容呢個係「志在必得價」，但就算係志在必得，照計都唔使去得咁盡，於是有業內人士甚至懷疑係咪落錯價，以為出價係包埋建築費！
得地產得天下
無論點估都好，中資接連掃地皮，已經令到本地發展商買地機會大減，未來佢哋喺樓市嘅議價能力下降。從政經角度嚟講，樓市一向係香港經濟嘅命脈，所以有人認為，阿爺都知喺香港得地產、得天下嘅硬道理，所以有理無理指揮班內房商嚟香港買地起樓，佢哋唔理賺蝕，都要分薄本港地產商嘅市場佔有率，削弱佢哋喺經濟嘅議事權，實行買起香港，所以中資高價掃地，唔會係單一事件，呢個方針唔改，樓價都唔會跌，所以加辣短期止到咳，長期始終要靠起多啲資助房屋，包括公屋居屋，甚至大量推出公屋發售，先至可以紓緩問題。
全球水浸搵嘢買商業樓或因禍得福
年初預言細價樓爆煲的資深投資者湯文亮因為預測應驗爆紅。最近他開始睇番好啲，仲話近年表現較弱的商舖，都嗅到了轉勢的味道。現時住宅加辣，商業樓宇暫時不受影響，且看會否因禍得福，成為資金避難所。
湯文亮話舖市見底
湯文亮手頭有過百億元的物業，當中包括過百個商舖。有中環茶友同佢食江蘇菜，啖其時令蟹黃灌湯包，論盡物業投資。他坦言，過去兩年租金走勢偏軟，基本上沒有升幅甚至略為回落，但最近續租情況反映市道逐步回穩。專做遊客生意，賣奢侈的貴舖仍然有壓力，但民生舖市道就有好轉，個別租金可以調升。
講起租金，租戶永遠都話貴，究竟佢哋心底點諗，由佢哋續約態度嗅得出來。湯文亮話，過去一、兩年，商舖租戶續約，不時提出簽一年，觀望味道濃厚，現時租戶很多提出一簽是兩年、三年，信心顯著加強。商戶開舖做生意，前景好壞心中有數，從他們態度轉變，他覺得市道應該走出了低潮。
他預言細價樓會爆煲，皆因供應增加，息口又向上，其後細價樓市道果然向下。但他說過去半年一個大變化，是游資有增無已，加上英國脫歐帶來不明朗，英國要走完整個過程，需要接近兩年，這段期間相信美國不會大手加息，以免全球經濟出現亂子。在水浸情況下，與美元掛鈎的港元資產就吸引了資金流入，令各類物業多了承接力，連曾經唱淡嘅大戶都咁睇，唔怪得政府要急急走出來加辣啦。
陸羽仁
回應 (0)
我要發表