冀籌一年四萬張飯票派基層明哥落老蘭賣飯盒！

2016/11/09 08:41:03 網誌分類: 生活

09 Nov

        蘭桂坊同深水埗，一處潮，一處貼地，好似「大纜都扯唔埋」，但派飯盒做善事嘅明哥（陳灼明）就把兩個地方聯繫起來，下星期四起明哥嘅愛心飯堂「北河同行」將衝出深水埗，移師蘭桂坊，展開為期約一個月嘅「北河同行．蘭桂坊慈善義賣限定店」活動，明哥會親自特選九款小菜飯盒義賣，希望籌募足夠一年嘅善款，用於向基層人士派發四萬張飯票，咁有意思，小妹去蒲老蘭，必定會記住支持明哥㗎！

        「北河同行」關懷社會行動進軍中環蘭桂坊，下星期四開始於蘭桂坊一號地下大堂舉行為期一個月嘅「北河同行．蘭桂坊慈善義賣限定店」，義賣九款由明哥親自特選嘅美味飯盒包括有「男人浪漫」豆腐火腩飯、乾炒牛河同（素菜）鮮茄蛋飯等，每日供應三款，真係睇見都感受到熾熱嘅香氣，流晒口水。明哥話，呢次活動嘅目標，係籌募足夠一年所需經費，用於向基層派發約四萬張飯票，佢好多謝蘭桂坊集團提供場地咁話喎。飯盒每個售價為港幣三十二蚊，慈善飯票售價為港幣二十四蚊。

        蔡瀾題字力撐

        明哥呢次善舉，吸引咗好多人主動出力幫忙，好似網上交易平台AndroidPay話，如果選用有關手機服務付款，就會額外捐出港幣四蚊予「北河（明哥）慈善基金」，而作家蔡瀾再度「出手」為九款北河小菜名稱再次揮筆題字，以行動力撐明哥，鼓勵及推動繼續行善。

        KellyChu