老人痴呆測試

2016/11/10 06:58:02 網誌分類: 生活
10 Nov

昨日同老伴去見家庭醫生打預防流感針,醫生問我"佢記性點呀?"

我答"成日唔記得熄燈,講嘢有時又重覆囉!"

醫生好好人,同佢做一個測試,問老伴"你知唔知今年係咩年呀?"老伴有點茫然,我估佢係唔知生肖,佢跟住答"2016年"

醫生"今個月係幾月呀?"  老伴"十一月"  醫生"今日星期幾?"  老伴遲疑左一陣,佢平時經常攪亂架,咁又難怪,佢唔洗返工,又唔追電視節目,禮拜幾對佢嚟講日日都係一樣,剛剛喺候診室時,佢問我今日係咪禮拜五呀?我話禮拜二呀!

於是我提佢"頭先喺出邊,我咪講過你聽囉!"  老伴同醫生講"我老婆話禮拜二喎!"

醫生"你知唔知你而家係住喺邊到呀?"  老伴答得好快"加拿大"  醫生"邊個省呀?"  老伴"魁北克省."  醫生"邊個城市?"  老伴"滿地可"  醫生"滿地可邊度?  老伴"Brossard"  

醫生"嗱!我而家講三樣嘢,講完你跟住我講一次,一陣我會再問番你,睇你記唔記得?"  跟住佢話"第一樣皮球,第二樣國棋,第三樣樹木."  老伴响呢度有啲甩漏,佢只記得皮球同樹木,唔記得國棋,隔左一陣做完其他測試後,醫生再重複問佢"頭先講果三樣嘢記唔記得呀?"  老伴依然漏左國棋.

醫生拎起支原子筆問佢"咩嘢嚟?"  老伴"原子筆."  

醫生拎起一張紙遞俾老伴,叫佢接過之後,摺疊起來,再用另一隻手遞番比醫生,老伴果然做到.

醫生叫佢心算,問佢一百減七係幾多?  老伴諗左一陣"93."  醫生"93減7呢?"  老伴又諗,"86?"唔係好肯定咁,  醫生"86減7呢?"  老伴有啲亂啦,答"59"  我同醫生講,其實佢年輕時都有啲數學障礙,叫佢抄幾個數目字,佢都會抄錯次序架!

醫生又叫佢寫一句完整句子,佢諗左一陣,寫中國人吃飯多多,笑死!

整個個程,醫生都係望住個電腦問問題,可能有一定嘅程式,又响度計分,最後佢話"ok呀!冇老人痴呆,放心!"

 

 

回應 (2)
我要發表
2016/11/12 13:41:32 回覆

van仔,老伴雖然未有痴呆,但醫生發覺佢行動比上次見時更差,追問之下,老伴承認因為驚跌,所以唔敢開步行,邊度都唔想去,醫生問我覺得老伴性格近來點?我話可能佢長期咁困住自己喺間屋度,有啲暴躁,醫生話老伴已經有輕微嘅抑鬱症象徵,開最輕量嘅抑鬱藥俾佢,但講明如服藥後感到有任何不良反應,馬上停藥.

2016/11/11 13:04:19 回覆

無痴呆就好呀,可以放心啦!年紀大記憶唔好架!

user