陸羽仁周記
陸羽仁周記
陸羽仁周記

一太古一世界

2016/11/14 09:42:44 網誌分類: 經濟
14 Nov
        上個星期股市有點狂亂,特朗普勝選令港股先跌後升,升完又跌。港股周五受騰訊(700)及瑞聲(2018)拖累出現回吐,恒指最多跌近400點,失守100天線(22572點),全日下挫308點,收報22531點,國企指數收報9433點,下滑112點,夜期仍然有壓力。以全周計,恒指累積下跌111點或0.49%;國指累積下滑58點或0.61%。美股周五就先跌後靠穩,杜瓊斯指數再創收市新高,收市報18847.66點,上升39.78點,納斯達克指數報5237.11點,升28.32點,標準普爾500指數報2164.45點,跌3.03點。杜指喺大選後連升4日,累積升幅近千點,上周累積升幅5.4%,創2011年12月後最大一周升幅,納指和標普指數都升3.8%。

        人仔終於跌穿鐵底

        串嘴大亨特朗普當選的效應,上周尾開始陸續浮現,市場估計特朗普會大搞基建,新政將會推高通脹,加上美債收益率上升,隔晚美匯指數一度突破99,升至兩星期高位。受美元強勢影響,中國官方今日開出的人民幣兌美元中間價報6.8115,較昨日中間價大跌230點子,是2010年9月1日以來最弱。中間價六日勁貶624點子,同時跌穿了官媒口中的鐵底,呢個係港股弱勢的一大理由。

        同一時間,由於市場憧憬特朗普增加基建推升銅鋼等金屬需求,加上內地商品炒風由黑色系轉戰有色板塊,金屬股延續升勢,個別冷門股好似中國有色礦業(1258)單日乾升25%,報1.31元。另外,深港通開通日期快將公佈,券商股見支持。

        狂人大亨勝出,會為世界帶嚟乜嘢轉變,大家拭目以待,普羅大眾固然期望明年會更好,商界就梗係想佢實踐增長加一倍嘅承諾。特朗普話會大搞基建推動經濟,但錢從何來呢?歷史顯示,民主黨嘅總統比較慳家,共和黨總統比較大使,所以民主黨執政期間美元會因為政府財政改善轉強,相反共和黨執政美元就會弱。共和黨總統大花筒嘅代表係朗奴‧列根,佢一把年紀上台,大搞軍備競賽,搞垮咗蘇聯之餘都搞垮埋美國財政,特朗普會唔會係同樣使錢唔手軟呢?若然係咁,對香港以至全球疲弱經濟,至少有短暫提振作用。

        過去幾年,全球陷入低增長嘅低氣壓,令到好多傳統行業受壓。啱啱過去一個星期,太A(019)發表公告作出盈警,股價隨後即插3.4%,報78.5元。太古嘅經營哲學係唔沾手高科技業務,反而專注做好傳統嘅生意,包括航空、地產、海洋石油勘探、貿易等。公司早前就預告,已就8月時作出的2016年中期報告發表後的業務前景進行檢討,當中地產、飲料和貿易及實業部門的前景大致與預期相若,惟受累航空業務前景轉弱、旗下港機工程(044)和太古海洋開發集團受減值支出等因素,將對今年股東應佔綜合基本溢利產生重大不利影響。

        瓣瓣黑仔內有因由

        早前,國泰航空(293)已變相發盈警,話航空公司業務前景轉弱,預計今年下半年的業績唔會好過上半年。港機工程近日再發出通告稱,今年的溢利預期錄得2.8億元的減值支出,當中太古公司應佔的減值支出2.1億元。至於太古海洋開發,即使前景大致與預期相若,但因為預料離岸業的復甦期較長及步伐較慢,所以就船隊帳面值做咗23.1億元的減值支出。幾瓣生意齊齊響警號,聽落好似好黑仔,實際內裏係有必然性,好似航空生意唔得,係同行業運力過剩及商務環境轉差有關,海洋勘探生意唔好就因為油價不振,減少了開發需求,呢樣嘢間接反映咗全球經濟疲弱。

        太A每股淨值有145元,上周收市價計股息回報接近5厘,真係大件夾抵食。睇番太古嘅生意,本來最主要收入係航空同地產,貿易等其他生意就賺錢買花戴,一向都係穩穩陣陣,而家基本上就得地產撐住。若細睇地產生意,佢嘅強項之一商場因為自由行滑落,要急急轉型,短期內難有增長,同樣酒店物業一樣受壓。比較好嘅係賣樓同寫字樓,不過寫字樓租金增長係細水長流,至於賣樓而家最好賺,不過公司唔係咁多土儲。可能正因為,所以佢會咁「抵買」。

        全靠地產一瓣撐住

        太古在商海浮沉過百年,有良好制度同傳統,?家面對咁環境,有個別原因,但亦有全球低增長帶來嘅低氣壓原因。佛語話一沙一世界,太古嘅情況唔多唔少反映咗香港以至全球經濟狀況。本來宏觀經濟有起有落,但央行唔想見到衰到,喺2009年金融海嘯後推出量寬,仲遲遲唔肯退市,咁做雖然避過大蕭條,但大量廉價資金推低咗營商回報率,好多生意面對高成本壓力,慢慢變咗微利生意,結果除咗因為游資氾濫推高咗資產價格,令到地產一枝獨秀,其他生意都要面對劇烈競爭,係成系公司中,太地(1972)股價因此係最硬淨。其實,?家成個香港都有呢種味道。不過,喺資金咁多下,生意就算賺得少都要做落去,呢個就係香港以至中西方營商環境嘅寫照。如果屁股無咁厚肉嘅公司,?家都幾惡頂,太古勝在家底厚,佢嘅股東就算坐咗艇,?家都可以坐喺處收息等待黎明。

        河船夠「的骰」郵輪玩法多

        聖誕假仲有個幾月至到,但好多茶友話股市淡薄,不如趁有多少斬獲,諗吓早啲去玩,上郵輪或者坐私人飛機去吓英國,貪英鎊夠平,?家比歐洲安全。有茶友早前拉到旅遊作家項明生,佢就介紹茶友坐船,佢話?家興去歐洲坐河船。河船無郵輪咁大隻,但玩法仲「的骰」,喺內陸穿梭。

        泛舟藍色多瑙河

        如果唔想只坐河船,可以先坐埋郵輪。佢早前就去咗德國、奧地利、斯洛伐克和匈牙利,由北海港口漢堡出發,泛舟藍色多瑙河,追溯歐盟發源。佢仲重返曾經留學的德國,由統一德國的普魯士出發、在德國窗口漢堡追溯歐盟發源,探訪「鐵血宰相」卑斯麥故居。

        行程還窺探了卑斯麥百年前為德國打下的工業化基礎,當年首先發展造船業,已由最古老的鐵皮船,變成現時世界最大船塢中的豪華郵輪,就連即將在香港首航、耗資一百億港元重金打造的「雲頂夢號」,也是出自德國造船廠。

        坐完郵輪,離開港口,又可以沿着藍色多瑙河,穿越昔日輝煌一時的奧匈帝國。他們坐豪華河船水晶莫札特號由音樂之都、奧地利維也納順流而下,船泊多瑙河明珠-匈牙利首都布達佩斯特,又回到一九一三年,去史太林、希特拉及佛洛伊德去開的同一間咖啡館喝杯奧地利咖啡。

        陸羽仁

        
回應 (0)
我要發表
user

網誌分類