陸羽仁周記
陸羽仁周記
陸羽仁周記

急炒車位不如等執平貨

2016/11/21 10:14:37 網誌分類: 經濟
21 Nov
        聯儲局主席耶倫上周四晚言論轉鷹派,美元匯價強上加強,恒指上周跌咗四日,喺最後一個交易日跌逾100點,其後係騰訊(700)及匯控(005)支撐下,收市升番81點,成交近560億元,叫做唔使跌足一個星期。以全周計,恒指累積跌187點,計落已連跌四周,是今年1月初內地「熔斷」以來最長跌市;國指累積下滑84點。

        美股上周五就微跌35點,收報18867點。狂人特朗普上埸,科網股乏力,搞到fb都話要回購托價。

        人仔跌到有啲麻木

        上個星期美元全線強勢,引發民幣連番下挫,上周五人仔兌1美元中間價報6.8796,較上個交易日貶值104點子,連續第11個交易日下調中間價,創近八年半來新低,創2005年6月逾11年以來最長連降紀錄。全球貨幣中,人仔唔係唯一下跌嘅貨幣,其他好似澳元、日圓都一樣滑落,個別幅度仲大。通常貨幣下跌最驚恐係開始嘅時候,大家唔知應該係揸定沽好,當跌到咁上下時,好多人就索性懶理,實行無眼睇,呢個情況喺今年英國脫歐後鎊價已經發生過。

        人民幣下跌之餘,內地外幣儲備都快速減少,除咗因為資金流失,另一個原因是美債回落,令資產減值。內地今年開始不斷減持美債,唔多唔少係應對美息向上,如果北京唔係減揸咗美債,咁呢輪外儲可能仲傷。

        發展商出貨計到盡

        呢排股市匯市金市係咁跌,大家無乜好炒,於是就走去炒車位,成班發展商見咁形勢,個個乘趁推出車位沽售。有中環茶友話,講算盤呢個世界無幾多個人密得過香港地產商,剩係睇佢哋開則起樓計到幾盡就知啦,?家雖然無乜好炒,但如果走去同發展商接貨,就真係要諗真啲。

        茶友話,呢排有代理畀個車位盤佢叫佢諗,話有近6厘回報,佢睇真原來係有租金回贈,咁即係話回贈期滿租唔租得返咁價錢無人知。佢話呢招好多人炒舖都用,自己搵個老友畀貴租,然後抬高個價賣樓,如果租客矇矇查查,就隨時接貴貨。代理聽完又介紹另一個車位盤,話呢個盤係九龍站上蓋,每個賣一百四十萬元。九龍站車位唔多夠,之前曾經有車位賣超過三百萬元,等如一個細單位嘅價錢,?家個價聽落好似幾筍。不過茶友話,佢知道呢批車位係最低層,而且九龍站最有米批客住係凱旋門,呢個車位同凱旋門就距離好遠,所以先至咁平一大截,所以發展商先至用「筍價」出貨,而且據佢所知,呢啲車位雖然係賣出街,但係就限定必須租畀區內居民。車位本來流動性已經唔多夠,若然仲有咁多限制,如果市況有變,銀行考慮按揭時未必實肯做,所以覺得都係諗唔過。

        消費散心靜候時機

        呢排樓市股市悶,好多人搵嘢炒,造就咗發展商賣車位嘅出貨潮。茶友話,?家地產股同高位比跌咗差不多兩成,主要係政府出辣招,加埋美國利息會向上,如果美息真係加,咁銀行利率慢慢上番,而家好多回報唔高嘅投資工具,好似得2、3厘回報嘅車位,就唔係咁吸引。呢啲資產流動性唔係咁好,買咗唔係咁易賣番出嚟,如果要買呢啲投資,不如畀啲耐性,等地產股跌低啲吸納好過,因為地產股?家可能未跌得夠,但至少佢哋有資產折讓,而且回報高啲,而且佢哋嘅管理層識得轉身,住宅唔好佢就賣車位,數口好過亂買嘢嘅小炒家,所以佢覺得與其急炒車位,不如拎啲錢買吓聖誕禮物,開心消費吓,等有平貨買先慢慢考慮。

        田少有個好老婆長袖善舞身家百億

        城中富豪女友爭產鬧哄哄,好多無錢人葡萄闊佬身家多,話錢多有乜用,咪又係未死已經驚爭產!有茶友就笑笑口踢爆,實情係爭產可以係一種樂趣,無錢嘅人根本領略唔到。

        有錢唔一定有煩惱,好似自由黨主席田北俊唔做議員住(聽聞佢?家又身痕想出返嚟選),得閒成日約班老友吹水,仲同太太一齊亮相好風騷。田少駐顏有術,田太肌齡都遠比實際年輕,尤其係一啲都唔似勞心勞力馳騁商界的女強人。

        酒庫靚酒飲唔晒

        田太係越南華僑,兩人是在美國唸大學時認識。好多人都知,呢十年田少掛住搞政治,生意都係老婆打理。田少間地產公司萬泰係最先喺九龍灣起商廈,當時地價千零元,建築費千零元,埋單三千元一呎,?家已經翻兩番。另外,佢係山頂樓仲未係天價時,就買咗大屋自住之餘,仲買地起樓收租,所以估計佢身家少少哋都過百億元,真係幾世食唔晒,酒庫靚酒飲唔晒。

        田少大把水,家中自然收起唔少靚酒,呢排佢開倉請客,各大名莊靚年份紅酒、香檳、單一麥芽威士忌,連送甜品的餐後酒同樣講究,茶友真係被列陣靚酒震懾。

        當晚茶友唔想表現得太貪心,每隻靚酒只係整兩啖,先嚟98年LAFITE,跟住其他名釀透夠氣再逐一品嚐,大家飲大兩杯,有人口痕話田少有個叻老婆,不如去選特首好過爭做議員啦。

        陸羽仁

        
回應 (0)
我要發表
user