毫無妙計劫金磚
2016/11/24 08:41:49
網誌分類:
經濟
劫金磚喎，一定要有一條好橋，雖然話電影反映現實，但真實生活又唔係咁！點解？因為現時電影奇難古怪，度都度唔到。
好似前日粉嶺，有人運載六袋金磚，一共二千一百五十八條，總值二千多萬，就係得一個運輸工人，駕車去到熔金工場門口，司機落車打開車門，拉出三袋金磚，放在手推車上。忽然，殺出五名蒙臉劫匪，亮出長刀，再噴胡椒噴霧，制服工人，就用十五秒時間，劫走二千萬金條。
警方話，匪徒手法純熟，好有組織，我好同意，但係，講到有無橋，真係「無」！賊人持刀噴椒當街搶，毫無妙計劫金磚，過程順利，唔係佢醒，而係事主笨。係人都問，點解運成二千萬金磚，一個保安都無。其實，事主係運六袋，而俾人劫了三袋。為何不做安全措施？唯一理由，事主係古龍武俠小說迷，愈危險就愈安全，他想用掩眼法，一個保鏢都無，唔慌係有貴重金屬啦，大賊不會打他主意。
但係，他忘記，古龍小說，仲有條絕橋，係「臥底」，江胡上人心險詐，係你周圍，係人係鬼，你係分不清。
能夠得悉這一條運金路線的，絕對係局內人，都係古龍一句，最親信的人，係最危險的敵人。
林超榮
回應
(0)
我要發表