霸王花栗子鮑魚骨湯

上星期一係我每月一次嘅香港唱局(其他均在深圳)，呢個局攪左四年多，我地兩個平喉、兩個子喉玩一局，每局每人唱四首曲。

除左我地四個唱口之外，頭架(音樂領班)同掌板係同兩個人，其他音樂師父如冇必要，基本上都唔會變，所以大家都好熟。

平日開局頭架祇有遲到，準時已經好難得！果日居然早到，一入門口拎住一袋二袋。佢話：「剛從鄉下回來，一人一袋禮物喎！」

一袋果皮、一包霸王花、一樽蝦醬：

通常祇有我地請音樂師父食嘢或者送禮物嘅啫，今次竟然有禮物收喎！曲友話：「此是早來了的聖誕禮物。」我就話係獲利回吐啦！

我地都好開心收倒果皮，因為中國人無論煲湯或煮餸，都喜歡用果皮。早前我地請班音樂師父響鯉魚門食飯「慶生」，頭架提到東莞蝦醬蒸豬肉好「正」。我當時講：「得個講字！」佢居然上心，今次真係買俾我地試。雖然蝦醬唔值錢(果皮我唔知價錢)，但係你講嘅嘢有人記得係好開心嘅事，閒話一句至喎！

尋日竹戰，一於用人地送嘅霸王花同果皮煲湯請豬朋飲啦(係咪好無良呀？送果個冇得飲)！尋日豬朋夫婦贏到開巷，我與另一位豬朋輸到血流成河呀！我地通常會抽水食晚飯，剩下的「水」錢平均分番四份；尋日果對夫婦決定餐飯佢地請，亦唔分「水」，由我地兩個輸家分，我地各自分番三百蚊！我地呢啲咪叫做衛生麻雀囉，一定唔會因財失義！豬朋話齋，響我屋企打麻雀最好：有湯飲、又有餅食！即使我唔煲湯，都會煲定糖水等人「劏」！

材料：

霸王花1/4包，浸透剪段

鮑魚骨(註)三舊，一開二飛水

有泥紅蘿蔔兩條切大粒

栗子十二兩去殼去衣

紅棗十二粒去核

煲滾適量水，下所有材料煲2 1/2小時，我通常唔落鹽，豬朋覺得夠味，仲食清晒啲鮑魚骨添。

註：

鮑魚骨是豬的某個部位(介紹我買果位肉販同我講係豬嘅膝頭，但係最近有聽聞是豬的「面珠登」)，與鮑魚無關；我喜歡用鮑魚骨煲湯因為油份少，煲完湯啲骨好稔滑，最重要係佢較豬展便宜。