美國加息無懸念
2016/12/05 08:42:05 網誌分類: 經濟
濠賭股升得多回吐
港股向下，一個原因係美元係加息機會喺近百分百下續強。美息向上推低咗債券價格，有資金流入股市。杜瓊斯工業平均指數上個星期收市報19170點，跌咗21點；標準普爾500指數報2191點，升不足1點；納斯達克指數報5255點，升4點。總結全周杜指上升0.1%，為連續第四個星期造好，標普500指數跌1%，納指跌2.7%。
上周五最受關注嘅消息係美國上月非農就業數據大致理想，失業率意外降至4.6%的九年低位，令市場確信聯儲局本月中將會加息。利率期貨市場顯示聯儲局本月14日的加息機會仍接近100%。國庫債券孳息率下跌，隔晚金融股偏軟，高盛股價跌1.4%，是表現最差的杜指成份股；富國銀行及美國銀行也分別跌1.4及1.3%。投資者同時關注星期日舉行的意大利憲法改革公投，投資者避險情況升溫，隔晚美股個別發展。
美國今個月加息成為近排主導世界金融市場的消息，內地相應都加強咗對資金外流嘅關注。早前傳出中央加強咗對大型海外併購嘅監管同審批。《澳門日報》報道，當地政府為反洗黑錢，正考慮要求攜帶逾12萬澳門元（折合1.5萬美元）以上現金之旅客申報資本狀況，若違規，資金超過上限1%至5%，罰款將介乎1000元至50萬澳門元，呢個估計都唔係澳門嘅自發行為，大行瑞信認為，資本申報主要是針對反洗黑錢，認為問題唔大，但就已經令到濠賭股喺最後一個交易日急挫。當中銀娛（027）下瀉4.7%收報35.75元；金沙中國（1928）下挫4%報收36.5元；永利澳門（1128）下滑4.5%收報13.16元；美高梅（2282）急跌3.2%收報16.38元；澳博（880）走低3.8%收報6.1元。
信安看好價值股
濠賭股呢排炒賭收反彈，累積升勢唔小。澳門博彩業經歷差不多兩年調整期，喺總理李克強訪澳後出現回穩。有熟悉澳門情況嘅茶友分析，喺澳門賭收飛升的時期，中央眼見大量民脂民膏流失，成為腐蝕管治的根源，認為要大力整頓。經過一輪清理，情況算係稍為受控，由於澳門社會比較簡單，對中央調整政策叫做配合，內地見到當地賭收跌咗咁多，覺得都做得差唔多，故此無再大力收緊。由於基數跌咗，所以形成反彈。不過，內地經濟未好轉，而且中央始終唔會好鼓勵國人賭博，所以見唔同賭收有大幅上升空間，加上?家人民幣貶值，中央都好關注外匯喺乜渠道會流失，所以加強申報，既有反黑錢，順手可以減少外匯轉走。聖誕、新年係澳門最熱鬧日子，曾經係炒濠賭股的旺季，今年兩大節日子接近，有可能兩個高峰一次過炒埋，所以想走短線者要留意。
喺呢排弱市中，內銀股相對硬淨，上周五恒指大跌，四大內銀股跌幅已算輕微，有基金經理就認為，美元轉強有利內地解除通縮威脅，對內銀股有利。
好多機會執平貨
根據美匯廣義貿易加權指數（U.S.BroadTradeWeightedDollar），美元由低位納入上升軌接近五年，近期已經接近2002年的高位。市場普遍預期在下任美國總統特朗普的經濟政策下，美元將會持續強勢，信安環球投資（香港）投資組合策略基金經理陳廣泰，美元強勢對美股、日股同內地股票都有利，其中看好價值型股票。除非中美真係打貿易戰，否則強美元對中國有好處，預期資金會流入估值低同持股比例唔高嘅內銀股。信安嘅觀點正好解釋咗點解內銀股呢排會跑贏其他股票。陸羽仁再加多兩句就係，強美元會增加港股波動性，咁即係話投資者有機會執平貨，所以如果無平貨就唔好亂咁買，仲有就係估值高嘅股票，?家就唔係咁易炒啦。
租渡輪開PARTY最好有埋懷舊餐蛋麵
雖然話大雞唔食細米，但做得財團就唔係咁講，必然係大小通吃。好似九倉集團大家都知最賺錢係做商場，但佢旗下做開嘅電車同天星小輪，咁多年都無放棄。九倉做電車，最發係用咗個車廠起時代廣場，做小輪無咁發，但都有啲碼頭可以收吓租，所以佢哋點都要不時諗啲新嘢搞，養住小輪生意。由呢個十二月份，就會推出由改裝過的「世星輪」暢遊服務，仲話準備行去迪士尼。
吹住海風歎美食
世星輪在一九八九年建造，這艘大船本來行走灣仔和紅磡之間，後來渡輪服務需求下降，該船再無用武之地，於是停航。今次用咗千幾萬元裝身，內櫳整得豪華咗，不過對乘客最吸引的，可能還是可以享受海風的開放式船頭。對中環茶友嚟講，海上遊大家未必有興趣，反而包船開PARTY有得諗，以兩小時起計，每小時兩萬二千元，可以約到百幾個老友落船。
上船開PARTY，自然不免有靚酒美食，天星早排就請咗班貴賓上隻船體驗，仲整埋日本美食到會，出席者固然欣賞，但有人就口多獻計，話和牛稻庭烏冬彈牙爽口，講食就認真一流，唯有小小失真之處，就係太過矜貴，如果改咗做當年搭小輪有得食嘅餐蛋麵加奶茶，即食麵仲要用福字麵至正宗喎，咁就夠晒懷舊兼夾夠風味嘞。
陸羽仁
回應 (0)
我要發表