喜訊！

CY昨日宣佈唔爭取連任，我相信香港七成市民都覺得係天大喜訊！我絕不是梁粉，但我絕對是親建制，愛國愛港人士。

何解我不喜歡CY？那應該問：何解那麼多香港市民不喜歡CY？我屬於大多數香港人。喜歡他的理由是：他任內推出長者及傷殘人士兩蚊乘搭車輛優惠！可惜，我未係受惠者，所以冇利益衝突。除此之外，我睇唔倒佢有咩嘢德政！睇吓佢嘅局長任命，有幾個係得嘅？而且睇得出佢根本冇咩嘢班底(冇咩社會經驗，得果廿多歲都可以當副局)，所以才攪到「政府」變「正苦」。

先不講CY，我以前在網誌內多次提及，特首人選最好係「死剩種」。聽落好似好灰，但係知唔知何解以前啲皇帝自稱「孤皇」？身為皇者真係好孤獨架：娶果個通常唔係自己喜歡果個！有咩嘢出奇啫，佢喜歡果個可能身份唔匹配、亦可能幫唔倒佢鞏固江山....所以以前皇室均是政治婚姻！今時今日，當得上特首，雖然唔駛搵個幫倒自己打江山/鞏固江山之人，但曼都要搵個唔會破壞自己江山嘅人至得。

常言道：成功男士背後均要有個好女人！何謂好女人？幫倒丈夫出謀獻計固然好、冇咁嘅本事嘅，照顧好屋企使男人無後顧之憂亦得！偏偏某人就係欠缺呢樣嘢囉！

「死剩種」點好？你睇吓「貪曾」咪知囉！冇人冇物就唔冇利益需要輸送，唔駛勞動廉署囉！雖然依家廉署行動樣樣慢幾年，有排風流快活，好命嘅死左都未入罪！但係成日要上堂都冇癮啦。

聽聞「林鄭」係因為CY獲「綠燈」連任才聲稱會退休，但依家形勢有變，佢嘅心意又會否變？

「胡鬚」同「胡塗」？唉，算罷啦！

如果淨係「葉劉」、「林鄭」，我睇好「林鄭」，但係阿爺會俾女人做特首嗎？

話番轉頭，CY決定唔參選，最失望可能係「飯民」。唔係咩？「老屍」指CY覆核佢係為自己選舉工程做勢喎！唔好意思：唔係囉！

之前「飯民」指「梁、游」係CY棋子喎！唔好意思：都唔係喎！

咁.....今後「飯民」咪冇左方向？你唔駛慌，任何唔係佢地屬意嘅人都係佢地針對目標；但係佢地屬意嘅人，又有冇可能選倒呢？「胡塗」？No way！當年嘅曾主席同依家嘅梁主席企圖做好人，討好佢地，咪攪到兩面不是人；須知道果啲「狗」係養唔熟架！人地係番狗嚟。

聞說真命天子尚未「蒲頭」，大家又不妨估吓，不過估中冇獎！