撈弱股要等插水價
2016/12/12 08:41:48 網誌分類: 經濟
阿爺堵漏水唔會咁快停
仲有兩個星期就到聖誕，有中環茶友想去澳門訂房度假，發覺市況唔差。不過，呢兩日濠賭股就幾唔靚仔，受到內地加強限制刷卡影響跌到一仆一碌。單係周五金沙中國(1928)收市挫咗9%，報34.55元，成為表現最差藍籌；銀娛(027)都唔好得幾多，跌逾7%，報收35元；永利澳門(1128)挫7.09%，報13.1元。呢排唱好嘅大行就出嚟發功護航，摩根士丹利仲大派「定心丸」，認為澳門賭業股股價近期受到內地嚴禁走資影響下跌，這同時為投資者提供一個長線投資的機會，該行維持對濠賭股「與大市同步」的投資評級不變。
有傳媒指銀聯卡在澳門的每日提款上限，由1萬澳門元降至5000澳門元，雖然銀聯下午否認，但澳門賭業股仍然全線下挫。收市後，澳門當局澄清，每日提款一萬澳門元的上限不變，但每一次的提款限額降低為5000澳門元，即是一天之內可以分兩次提款。
濠賭保險股未算係超平
濠賭股借限制刷卡消息大幅回落，陸羽仁一啲都唔覺得意外，因為內地外儲備跌得咁急，中央必然要出手，喺呢啲捕風捉影時期，濠賭股俾個浪衝一衝絕對唔出奇。呢次內地收緊刷卡，同兩年前打擊內地人、特別係高官去澳門博彩有個分別，就係上次主要針對澳門，覺得內地人去澳門咁輸錢，等如變相進貢咗大筆畀搞賭場嘅美資，而且官員去澳門賭錢，會好容易俾人捉住痛腳，咁對管治會有危險，故此大力勒緊。經過咗差不多兩年調控，內地對澳門睇法已經無之前咁緊張。今次嘅措施，相信主要係受到資金外流嘅影響，中央擔心外匯流失，所以限制各種渠道。雖然中央唔係特別針對濠賭股，但因為呢類股份始終對政策敏感，而且呢排佢累積升勢唔小，所以短期值博率唔高。
同樣道理，內地連買保險都「落閘」，阻止大陸客來港刷卡買保險影響，友邦(1299)曾創逾半年新低，收報43.7元，跌1.24%，連跌4日，累積下挫6.4%。友邦生意遍及亞洲，但內地係增長好快嘅市場，而且友邦市盈率唔平，大家睇好佢嘅增長。而家生意受阻雖然唔係長期性，但人仔未穩定，內地外儲個數字搵到支持，阿爺都唔會咁易鬆手。友邦股價由高位54元，已經下調咗接近10元。半年前內地首次傳出限制內地人來港買保險，友邦股價曾經插穿38元，跟住大幅回升，如果中央再有勒緊內地資金流出嘅消息，唔排除友邦仲有機會下試低位，所以想博反彈的投資者，可以考慮等個價再抵啲，又或者至少唔好一次入哂貨。
振英不連任炒作要識食胡
講起博反彈，呢排有幾個板塊由強轉弱，搞到股民對幾雙強股流晒口水，譬如好似騰訊（700）咁。但我覺得而家個市係轉緊大氣候，資金跟隨緊中美嘅財金政策執位。好似美國候任總統特朗普對產業喜舊嫌新，資金跟住佢嘅想法走，搞到科網股失寵，本來呢啲股估值反映咗有利嘅政策，而家環境改變，咁股價就要大幅調整，所以想博呢啲股反彈，最好係訂個「地底泥價」，如果唔跌到呢啲價，都唔好出手。好似濠賭股、本地保險股，都算係呢類股份，所以要真係見到插水價，先至有考慮出手嘅價值。
最後講兩句時興話題，就梁振英宣布不角逐連任，「脫英」概念股香港電視大升33.33%，收報1.64元。地產類股份亦向好，新鴻基地產(016)升2%，報收105.2元；長實(1113)升1.8%，收報52.95元；美聯(1200)更升4%，收2.63元。好多人唔鍾意梁振英，不過炒股唔需要夾硬將佢拉埋嚟講，好似港視股價唔得，係業務未有前景，而家連電視廣播都話盈利要跌五成幾，港視攞唔攞到牌，都已經唔重要，重要係佢搞嘅網購生意掂唔掂，呢樣嘢照計唔會因為梁振英落台就即刻好咗，帶動股價升三成幾啩。同樣道理，而家梁振英唔算，就算財政司司長曾俊華係咪就敢隨便撤走辣招，又或者美國即係加少啲息呢，如果答案係無乜影響嘅話，咁炒高可能就係出貨嘅機會啦。
玄學大師預告雞年經濟虛不受補
下個月就過春節，外資大行每年都會搞風水指數，本地玄學家就會批吓流年。早兩日術數高人蔡伯勵就講吓雞年運程，佢預言本地經濟好極有限，投資者最好自求多福。
四金匯聚未必好
過去每逢七字之年都有股災或金融震盪，包括八七股災，九七亞洲金融風暴、○七次按危機等，難道二○一七同樣有波動？高人淡定回應，天道有起有落，要發生的都要發生，差別只是時機配合而已。
講到經濟，來年「身弱逢財，尾大不掉，未許樂觀」。佢仲好五行解釋，話雞年有四金，但金多未必就是好，因為擾擾攘攘，未必能夠承受，尤如虛不受補。睇番呢個月美國開始加息，跟住去向未明，搞到美金強勁，最近內地資金湧港避險，港元又跟隨美金強勁，你話個虛不受補真係唔奇。
蔡伯勵去年批流年，話香港有三個破日，其中年初二撞正破日真係好少見，結果凌晨就爆單旺角暴亂，所以好多人都嘖嘖稱奇。來年經濟係咪咁，唔使好耐就會揭盅。
陸羽仁
回應 (0)
我要發表