出面食唔到
2016/12/15 08:42:07
網誌分類:
經濟
主人捧上家鄉小菜，或者苦心鑽研的獨門菜式，你客客氣氣讚好味，一家之煮更要你畀啲意見，你扮作食家，講啲乜嘢呢？
我聽得最多係呢一句——
「阿嫂，呢啲菜式，真係出面都食唔到。」
出面食唔到，係讚又好似彈，一般人理解係比較正面。
嘩，呢條魚，出面食唔到，有三個意思。
一係，出面食唔到咁平，起碼收你成千元。阿嫂，你買咗幾錢呀？
二係，出面無咁新鮮？幾百蚊，外面邊有游水畀你，邊有咁新鮮。
三係，出面無咁落料？嘩，真材實料，果啲果皮咁靚，千蚊一斤，阿嫂重本。
所以，「真係出面食唔到」，又顯示到，係屋企食，係超越了在外面吃而沒有的住家風味。
「外面都食唔到……」
「唔係外面食唔到咁渣。」阿嫂真係又自謙又有幽默感。
食家評語仲有一句「嘩，未食過咁整法，未見過，你邊度鄉下﹖」
中國廚藝，博大精深，各師各法，唔同師父就有唔同炒法。
你這一句話，唔係一般煮法，阿嫂就開心，佢一定話「你食得出，係我鄉下四川綿羊，阿婆教……我老公就食唔出啦……」，呢一句又超越好食唔好食的界線，叫轉移視線。阿嫂如數家珍，由家鄉炒法講到家族廚局的獨家秘傳。「獨家炒法」即係英超「獨家轉播」，唔包場波好睇唔好睇、特色在於獨家就夠殺。
林超榮
回應
(0)
我要發表