「煮」的疑惑

「無線」經常有烹飪節目，「都市閒情」分別有李錦聯、Annie師父同陳國賓每天輪流示範。個人唔喜歡李嘅表達方式、唔喜歡陳煮嘅菜式，祇得Annie師父可以睇吓。李嘅口頭譂「靠得住架」，我唔鍾意；陳是營養師，但佢煮嘅餸經常係口味重嘅，更差不多隔一次便煮鮮魷菜式！係人都知鮮魷膽固醇高，陳每次都話間中食吓冇所謂，但係你跟佢煮，真係隔日食一次，想唔死都幾難！

除左「都市閒情」之外，「無線」亦製作唔少個人烹飪特輯：May姐、阿蘇、黃淑儀、陳國強、熾哥、肥媽....跟住拎得起鑊鏟唔跌嘅都有份：胡蓓蔚 、Jade，瑋哥、..。後面果啲不值一提！前面果啲我地班「煮人」聚會都會傾吓佢地嘅表現，肥媽一致認為佢煮嘅嘢粗製濫造，總之食得落肚、食你唔死就算；後期加入個「六號」更加不知所謂，連一個烹飪節目都算唔上！

May姐煮嘅係高檔菜，唔入得我地呢啲尋常百姓家！

「阿蘇」？我地覺得佢係唔識煮嘅---自小屋企幾個工人，唔駛郁手，理論可能大把，但係...

黃淑儀？我信佢係烹飪能手，祇是佢煮味味菜都加隻辣椒，我真係不能認同囉！

陳國強係酒樓主廚，不過佢間中都會介紹一啲家常菜，我比較喜歡佢嘅示範方法。

至於熾哥，似乎唔習慣面對鏡頭，加上佢煮嘅都係貴價菜，唔啱我地呢啲cheap人！

依家播緊「阿爺廚房」，鼎爺出馬。早幾日我地中學同學聚會，大家一致認為鼎爺好嘢！可能我地一個二個都唔後生，喜歡「懷舊」...菜啦！

不過，睇左幾集，我真係有好多疑惑呀！烹飪書(包括名廚)教落，醃肉係先落糖、鹽、生抽，後落油同生粉，理由係先落油鹽包住啲肉，再落調味啲肉便吸收唔倒味道。

鼎爺卻千叮萬囑：要先落油同生粉，後落調味啲肉才會滑！

熾哥又好、陳國強又好、其他人都好，都指出煮肉一定要先落底味(糖鹽之類)，煮好唔夠再加，但鼎爺意見相反：唔好一早落調味！

哈哈....攪到我唔識煮添！