Modos新潮雞旦仔

我家附近有間「媽咪雞旦仔」(連鎖，分店不少)，我間唔中都會買嚟食。佢久唔久都增加新口味，至於好唔好食就見仁見智啦(綠茶紅豆咪唔好食囉)！最豈馬佢都保留住傳統雞旦仔果種外脆內軟嘅感覺；舊式單一口味未能跟上潮流，我見附近不少舊式雞旦仔店都結左業。

最近樓下又開左間雞旦仔專門店，祇有英文名！唔係係咪暗示佢整嘅係西式雞旦仔，你唔好諗住將佢同中式傳統嘅雞旦仔比較呢？

「羅宋湯雞旦仔」又有、「肉鬆蝦乾雞旦仔」又有...我都唔知佢屬中、屬西？不過，我咁勇於試新嘅人，都唔多夠膽試某些味道！其他人？心口掛個「勇」字係好嘅，唔成功、咪好似「梁游」咁，成仁囉！

我咁正常嘅人，梗係試正常啲嘅嘢(係貪平至真)，買左「斑蘭雞旦仔」同「原味格仔餅」，分別是$25同$19。

嘩！「相睇」呀？照片同實物相差咁遠？一面係扁平嘅，即係份量少左啦。顏色亦唔靚---色、香、味---缺左色！至於香，OK啦，味？OK啦！

不過，果件格仔餅，望落好似塑膠擺設咁款！

所以，兩樣嘢都係得個「脆」字！唔好意思，我唔會再幫趁！

呢個鋪位之前兩檔都係做新潮食品生意，但兩檔都做唔長；唔知呢間會點呢？